Берекет: Толлы компотъёс, сокъёс, джемъёс

Удмурт Дунне
By Удмурт Дунне 13 июля, 2020 15:43
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Р. Резенова мыртпум компотэныз

Бакча емыш кисьман вакытэ нылкышноос толлы пӧртэм компотъёс, сокъёс, джемъёс лэсьто.

Сутэр но апельсин

Компотлы кулэ: 3 стакан горд сутэр, 4 стакан сакыр, 1 апельсин, 2,5 литр ву.

Сутэрез миськоно, сузяно, апельсинэз вандылоно, кӧмзэ палатэк.

Стерилизовать карем посудаосы апельсин но сутэр пононо. Быректэм сакыр вуэз банкаосы кисьтыса, ӵоктэтэн шобыртоно.

Бадӟым кастрюле шуныт ву пононо, пыдэсаз ӵушкон вӧлдоно но пӧсь банкаосты со вылэ пуктоно. Кастрюльысь ву банкаослэн чыртыозязы луыны кулэ. 15 минут пичи тыл вылын пӧзьтэм бере (стерилизовать кароно яке «водяной баня» вылын возёно), банкаосты корт пытсэтэн ворсано но, выж вылэ йырин-
уллань пуктыса, шобыртоно. Нунал ортчыса, компотэз гулбече интыяно.

Алыча но кабачок

Компотлы кулэ: 500 грамм кабачок, 400 грамм алыча, 200 грамм сакыр, 1 литр ву.

Кабачокез, кӧмзэ но пушсэ сузяса, пичи кубикъёслы юдоно. Алычаез миськоно.

Банка пыдэсы пононо алыча, кабачок, вылтӥзы
сакырен дасям пӧсь сироп кисьтоно. Вылаз ӵоктэт поныса, сӥятыны пуктоно. Бӧрысь со сиропез кастрюле кисьтоно но выльысь быректытоно, нош ик банкае кисьтоно. Посудаез пытсаса кезьыт азе пуктоно.

Персик

Компотлы кулэ: 1 килограмм персик, 250 грамм сакыр, ӝыны чечы пуньы лимон кислота, 500 грамм ву.

Кастрюле ву, лимон сок но сакыр поныса, 3 минут пӧзьтоно.

Персикез миськоно, шори вандылоно, мульызэ куштыса, но стерилизовать карем банкаосы тыроно. Бӧрысь персикен банкае пӧсь сироп кисьтыса, 15 минут стерилизовать кароно на. Банкаосты, одӥг нунал шобрет улын возьыса, салкым азе пуктоно.

Каун

Компотлы кулэ: 1 килограмм каун (тыква), ӝыны литр ву, 1 боды корица, 1 чечы пуньы лимон кислота, 5 пуньы 6 процентъем уксус.

Каунэз сузяно но кубикъёслы юдоно.

Кастрюле пононо ву, лимон кислота, корица, уксус но юдэм каун. Суралтоно но 1 нуналлы кезьыт интые пуктоно.

Ӵуказеяз кастрюльысь соксэ нимаз посудае кисьтоно.
Со вылэ сакыр ватсаса, пӧзьтыны пуктоно. Сакыр быдэсак небӟиз ке, сӥсысь каунэз кисьтыса, эшшо 4 минут, ялан сураса, пӧзьтоно. Бӧрысь каунэз банкаосы тыроно, вылаз маринадзэ кисьтоно, корица бодыез куштоно, ваньзэ пытсано но шобрет улэ пуктоно. Компотысь каун ананас шӧмо луоз.

Соклы кулэ: 1,2 килограмм каун, 800 грамм ӵужкушман, 100 грамм сакыр, 1 лимон.

Ӵужкушманэз но каунэз миськоно, юдоно но соксэ пызьыртоно. Ӵужкушманлэн сокез 250 миллилитр пала люкаське, каунлэн — 300 миллилитр. Ӝыны лимонлэсь соксэ пызьыртоно.

Пызьыртэм емыш бервылэз куштыны эн дыртэ, вӧзад 1 литр ву ватсаса, быректэ. Пӧзьтэм суретлэсь соксэ кастрюле сӥсъяно, отчы ватсано ӵужкушман, каун, лимон сокъёсты, шӧмызъя сакыр. Ваньзэ пичи тыл вылэ шунтыны пуктоно. Быректыны кутскиз ке, соку ик тыл вылысь басьтоно но чылкыт банкаосы калленэн кисьтоно. Пытсэтэн ӵоктам бере банкаосты шобыртоно.

Боры

Компотлы кулэ: 4 килограмм боры, 1 килограмм сакыр.

Емышез миськоно, сакырен суралтоно но 8-10 часлы
салкым азе пуктоно. Бӧрысь борыез банкаосы тыроно, кылем соксэ но бордаз ик кисьтоно. 10 минут стерилизовать карыса, корт ӵоктэтэн пытсано.

Облепиха но легезьпу мульы

Компотлы кулэ: 1 килограмм облепиха, 1 килограмм улмо, 600 грамм легезьпу мульы, 1 литр ву но 450 грамм сакыр.

Улмоез сузяно, вандылоно, 3-5 минутлы пӧсь вуэ тырылэм бере кезьыт вуэ пононо.

Легезьпу мульыосты миськоно, шори вандыса сузяно.

Облепихаез, яблокез но легезьпу мульыез банкаосы сӥен-сӥен радызъя тыраз тыроно но вылтӥз пӧсь сиропен кисьтыса, стерилизовать кароно: 0,5 банкаосты — 15 минут, 1 литръем банкаосты — 25 минут. Бӧрысь банкаосты ӵоктэтэн пытсано но кезьыт азе пуктоно.

Крыжовник

Компотлы кулэ: 1 но ӝыны стакан крыжовник, 1 лимон, 5 модос бутник (мята), 1 стакан сакыр.

Стерилизовать карем банкае тыроно миськем крыжовник, бутник, 2 юдэс лимон, вылаз кисьтоно быректэм ву. 15 минут сылэмез бере банкаысь вуэз берен кастрюляе кисьтыса, сакыр ватсано но быректытоно. Пӧсь суретэз банкае кисьтоно, ӵоктэтэн пытсано но, выж вылэ йыринуллань пуктыса, шобыртоно. Компотэн банкаос сӥязы ке, соосты салкым азе пуктоно.

________

Валентина ЕМЕЛЬЯНОВА

Удмурт Дунне
By Удмурт Дунне 13 июля, 2020 15:43 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<