Бадӟым адямилы ним. Ася Петровалэсь вероссэ берыктӥз Евгения Гусоргина

Удмурт Дунне
By Удмурт Дунне 6 июля, 2020 16:22
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Евгения Гусоргина

— Кин мон?

— Тон пичи лудкечпи.

— О-о. Эшшо кин?

— М-м-м… — анай малпаськонэ усиз, — эшшо тон пичи кучапи.

— О-о, а эшшо?

— Тырмоз, дыр. Тон сотэк но лудкечпи но, кучапи но ини.

— Мон лудкечпи, кучапи но эшшо кин ке, со ту-у-уж пичи…

— Пичи… азьдага?

— Öвö-ö-ö-л.

— Пичи… слонпи?

— Öвöл, слонпи — со туж огшоры.

— Ну, соку мон уг тодӥськы.

— Нош тон малпаськы.

— Пичи… ӟазегпи.

— О-о. Эшшо мон пичи комок.

— Таиз мултэс ини. Оло, тон кин ке бадӟымгес луод?

— Уг. Мон пичи. Мон пичи комок, лудкечпи но кучапи. Эшшо пуныпи.

— Пуныпи — со кучапи ик вань.

— Öвöл, озьы öвöл.

— Ярам, тырмоз ни.

— Кызьы? Всё-а? Анай, я шуд на монэн эшшо кöня ке!

— Ми сотэк но вань пöй­шуръ­ёсты тодамы вайимы ни. Ну, пичи парсьпи луэмед потэ-а?

— Ачид тон парсьпи!

Милям котькуд ӝытмы
тазьы йылпумъяськылӥз. Изён азьын анае монэ чупаны лыктэ но, ми шудӥськомы. Анае монэ пöртэм мусо кылъёсын нима. Нош мон яке соглаш луисько, яке — уг. Бератаз мынам мусо понэмнимъёсылэсь быдэс гурезь бичаськиз.

— Нош мон пичи ӟозлы кельшисько-а?

— Уд, ӟоз — со нымы-кибы, — шуылӥз анае.

— Мон но нымы-кибы!

— Мар тон оломар но вераськод! — лекъяське анае.

— Мон пичи чиргетӥсь ӟозпи!

Со сяна, мынам потэ на вал, монэ пöртэм сямен мед нималозы шуыса: Петя. Вася. Ваня…

Анае монэ серем карылӥз, ми ӵошен серекъяськомы но, ваньмыз умой вал. Но одӥг пол кышкыт учыр луиз.

Кылем сӥзьыл школаын лыдӟиськонъя выль дыше­тӥсь­мы, ваньмы-а классын шуыса, эскере вал. «Петя Лапшин» шуэмез бере мынам киы ас эрказ ӝутӥськиз.

Суредаз Софья Миннигараева

— Тон — Петя Лапшин? — юаз дышетӥсь.

— Öвöл. Мон Витя Федяшев.

Дышетӥсь мон шоры туж паймыса учкиз, нош мон öй вала, кызьы солы валэктоно, анае монэ куддыръя Петя нима шуыса.

Урок бере дышетӥсь мон доры лыктӥз но юаз, котьку-а мон Петя нимлы вазиськисько. Мон шуи, оглом вераса, о-о. Соку со юаз, Саша нимлы но вазиськисько-а. Мон шуи, таизлы но — о-о. Соку со воксё öз паймы ни кадь, вань нимъёсме вераны косӥз. Мон кутски:

— Петя, Ваня, Костатин…

— Константин? — юаз со.

— Öвöл. Костатин. Мынам лыосы паськытэсь, соин.

Дышетӥсь мон шоры туж сак, синзэ кыньыртыса ик, учкиз.

— Эмъясь озьы шуиз, — валэктӥ мон, юнме верасько шуыса медаз малпа. — Тӥни озьы…

Дышетӥсь веранме йылпумъяны öз сёты, ваньзэ валай, пе. Нош мукет нуналаз анаелы классэн кивалтӥсьмы жингыртӥз. Мон уг тодӥсь­кы, мар сярысь соос вераськизы, но анаелэн мылкыдыз урод вал. Изён азьын со, котьку сямен, мынам висъетам лыктӥз. Монэным шудэм интые, со шöдтэк шорысь туж лек кариськиз но вераз, нимъёсын ум шудэ ни шуыса.

— Малы?

— Озьы уг яра. Озьы тон ноку но уд буды.

— Малы?

— Малы ке шуоно бадӟым адями, пичиеныз ӵошатыса, вала, кин со.

— Мон валасько, кин мон! Мон кöня ке кузя, мон — пичи калык!

— Öвöл. Тон калык öвöл, тон — пияш. Тон — Витя. Ӵу­ка­зе нуналысен нимыд сы­ӵе гинэ! — анае берытскиз но висъетысьтым öсэз усьтӥз.

— Иське, туннэ ми шудомы на?

Öс йыг! пытсаськиз.

Уйме мон изьытэк потӥ. Мынам уг луы нимъёсыным люкиськеме. Соос улэпесь. Соос — мынам оглюкетэ, котькудӥз аспӧртэм. Ваня саксофонэн шудэ. Петя акварелен зарезь суреда. Костатин нюръяськонэн выре.

Соку витьымтэ шорысь мынам йырам визьмо малпан лыктӥз. Нош мон ачим саксофонэн шудыны, суредаськыны но нюръяськыны дышетски ке?

Ӵукна мон анай-атаелэн висъетазы бызьыса пыри но ваньзэ верай:

— Анай, мынам устолыкъя, крезьгуръя но спортъя школаосы ветлэме потэ. Соку мон вань нимъёсме огазеяло.

Анае ум йылтӥз кема валаны тыршиз, мар мон бӧтьыртӥсько, собере валесаз пуксиз но нод-нод вераз:

— Умой малпан, но мае ке огзэ быръёно.

— Анай, мон тыныд шуисько ук, мыным ваньмыныз вырыны кулэ, соку нокыӵе мултэс нимъёс кулэ уз луэ ни.

— Нош мон тыныд шуисько, бадӟым адямиос бырйыны кулэ. Тон одӥг дыре котькин луыны но ваньзэ лэсьтыны уд бы­гатӥськы.

— Кызьы мон быръём?

— Ма, кутскы мар ке бордысен, собере адӟом.

Со нуналысен быдэс ар ортчиз ни, нош мон кык нимез гинэ воштыса вуттӥ ай. Суредаськыны турттӥ — номыр öз пöрмы. Соку валай, мон Петя öвöл. Собере нюръяськонын асме утчай — öз кельшы. Валай, мон Костатин öвöл. Ӵуказе крезьгуръя классэ мыно. Мон туж кышкасько: кин тодэ, оло, мон Ваня но öвöл?

— Анай, нош мыным ним быръён понна улонэ тырмоз-а?

— Тырмыны кулэ.

— Нош öз тырмы ке, тон уд ӝо­жомы-а?

— Уг ӝожомы, но тыныд улонэд тырмоз. Табере изь.

— Анай, возьма, мынам эшшо юанэ вань на.

— Кыӵе?

— Вожед уз поты-а?

— Уз поты.

— Зэм-а, мон пичи чир­ге­тӥсь ӟозлы кельшисько?

Удмурт Дунне
By Удмурт Дунне 6 июля, 2020 16:22 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<