Аръёс матэгес каро

Удмурт Дунне
By Удмурт Дунне 9 июля, 2020 14:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

8-тӥ июле Россиын пусъё Семьялэсь но яратонлэсь нуналзэс. Таин валче шаерысьтымы котыр ласянь адӟем карымон 81 кузпалъёсты данъязы «За любовь и верность» гадьпусэн. 7-тӥ июле сое сётӥзы Алнаш ёросысь Кузёбай гуртысь Елена но Юрий Прокопьевъёслы но.

Туспуктӥз Людмила Сурчакова
Алнаш ёросысь Кузёбайысь Елена но Юрий Прокопьевъёс бадӟыменыз нылынызы. Туспуктӥз Людмила Сурчакова

Прокопьевъёслэн семьязы 29 ар талэсь азьло кылдӥз, 5-тӥ классысен ӵош дышетскизы. Фамилиоссы но огкадь вылэм.

— Туж умой тодӥсько на, школаын дышетскыкумы, математикаен дышетӥсьмы, журналэ оценка пуктыкуз, милемыз «Прокопьевъёс» гинэ шуылӥз, — вера Елена Михайловна. — Озьы верамез мыным ӧз кельшылы, вожме поттылӥз, нош али малпасько ке, озьы вазиськемез ик милемыз ог-огмы шоры сакгес учкыны косӥз, дыр. Студент дыръямы валамы ини, милемлы ӵошен умой шуыса.

Школаез йылпумъяса, Прокопьевъёс Удмурт кун университетын вылӥ образование басьтӥзы. Кыкназы ик Кузёбай школае ужаны берытскизы. Елена Михайловна ӟуч но удмурт кылъёсъя урокъёсты нуэ, трос аръёс ӵоже директорлэн воспитательной ужъя воштӥсез вал. Юрий Николаевич география предметэз нуиз, 24 ар школаын ужа ни ке, 13-зэ школалэн кивалтӥсез вал, али обществознанилы но историлы дышетэ.

Кузпалъёс общественной ужлы но бадӟым саклык висъяло. Кыкназы но кӧня ке пол бырйылэмын Кузёбай муниципал кылдытэтысь Депутатъёслэн Кенешазы.

— Ӵошен улыны кутскеммы дырысен оломае но адӟим ини, аръёс милемыз кыдато, матэгес каро, — шуэ Елена Михайловна. — Улонлы бадӟым тау, вӧзам яратоно но монэ валась адямие вань шуыса. Ваньмыз возиське яратон, гажан, ог-огдэ валан бордын. Дорын-а, ужын-а, ми котьку артэ, ог-огмылы юрттӥськиськомы, дурбасьтӥськомы но одӥг ӧретӥ мынӥськомы.

Прокопьевъёслэн шумпотонзы — нылъёссы. Бадӟымез Ольгазы ужбергатӥсь луыса ужа. Пичиез Татьяна анай-атайзылэн пытьыетӥзы вамыштӥз, дышетске УдГУ-ын исторической факультетын. Кузпалъёс уг вато: школаын ужаса, куд-ог дыръя асьсэ пиналъёссылы тырмыт саклык висъяны ӧз быгатылэ. Сыӵе дыръя котьку но бордазы вал Юрий Николаевичлэн анаез, ас вакытаз со но школаын ужамын.

Елена но Юрий Прокопьевъёслэн туала улонлэсь бере кылемзы уг поты, ужазы выль технологиосты кутыны тыршо. Нылпиосын артэ вамыштон понна, пе, аслэсьтыд тодон-валандэ будэтоно. Шутэтскон дыръязы художественной литература лыдӟыны, кроссворд лэсьтыны ярато. Юрий Николаевич яратэ на чорыганы но губияны. Гужемлы быдэ семьяенызы ӵош Удмуртилэн палэназ шутэтскыны ветло, мылкыдзы вань на Байкалэ вуылыны, нимысьтыз маршрут но малпаллям ни.

________

Людмила СУРЧАКОВА

Удмурт Дунне
By Удмурт Дунне 9 июля, 2020 14:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<