Егитъёс понна шаерамы радъяське «Атмосфера» конкурс

Удмурт Дунне
By Удмурт Дунне 15 июня, 2020 15:07
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Атмосфералы» кутскон сётӥз кылем арын пыӵаны кутскем «Милям кичӧлтонмы» конкурс — таиз но сӥземын элькунамы улӥсьёслэсь проектъёссэс пыӵатонлы. Озьы калыклэн мылкыдыныз но элькун бюджетысь юрттэтэн валче пӧртэм гуртъёсын кылдӥзы нылпи площадкаос, спорт комплексъёс, выльдӥськизы сюресъёс. Калыклэсь вуэм 141 кичӧлтон пӧлысь устоен лыдъямын но быдэстэмын 83-ез.

— «Милям кичӧлтонмы» конкурсэ пыриськисьёс пӧлысь уноез — егитъёс. Тае лыдэ басьтыса, элькун Правительство радъяны малпаз егитъёслы нимаз конкурс — «Атмосфера», — шуиз Правительстволэн Тӧроезлэн воштӥсез Анатолий Строков. — Конкурсэ пыриськыны мылкыд каризы вань ёросъёсысь егитъёс. Келязы 1 сюрс 500-лэсь ятыр проектъёссэс. Пусйытэк кельтыны уг луы тазэ но: егитъёслэсь кичӧлтонъёссэс бюджетысь уксёен быдэстонлы сӥзем конкурсъёс ӧвӧл на одӥг улосын но. «Атмосфера» вожвылъяськонлы элькун бюджетын чакламын 50 миллион манет. Ёрослы быдэ висъяськоз 900 сюрс, бордаз коньдон ватсаны кулэ на ёрос администрациос. Итӥськыны быгатозы интыосысь спонсоръёс но — кин кӧня быгатэ. «Милям кичӧлтонмы» конкурсын чурыт курон пуктэмын вал: проектлы кӧня ке уксё висъяны кулэ калык но. Нош «Атмосфераын» егитъёслы ватсаса коньдон бичано уз луы.

Егитъёслы луонлык сётэмын вал 3 пумо проектъёссэс келяны: кыӵе ке объектэз ӝутыны, яке ужрад ортчытыны, яке ивор вотэсын
тодон-валан сётӥсь сайт усьтыны. Куриськонъёсты кутон но устоосыз понна куара сётон йылпумъяськиз ни. Озьы 1 сюрс 500 кичӧлтон пӧлысь быръемын 280-эз. Июль толэзьысен соос улонэ пыӵаны кутскозы ни.

— Конкурсэ вуэм проектъёс тунсыкоесь, пайдалыкоесь, — пусъе «Атмосфера» конкурсэз радъян понна кыл кутӥсь Финансовой просвещениея центрлэн кивалтӥсез Наталья Симкина. — Но ваньзэ улонэ пыӵатыны туэ уз пӧрмы. Кылемъёсыз борды басьтӥськыны быгатом вуоно арын.

Конкурсэ вуэм проектъёс пӧлысь устооссэ бырйыку, лыдэ басьтӥськиз соослэн пайда вайыны быгатэмзы. Кылсярысь, Дэри черкогуртысь Молдаванка микрорайонын туж трос егит семьяос уло, со арысь аре паськыта.
Тэшкылиоссы лачак, нош шутэтскон интызы ӧвӧл. Буш улӥсь музъем кесэгъёссы вань ке но. Егит семьяос та ужпуменызы ёрос администрациязы вазиськизы. Куронзы быдэсмиз: нылпиосын шудыны инты висъямын. Табере кылиз на сое радъяны, нылпиослы шудон комплексъёс пуктылыны. Та понна ик егит семьяос пыриськоно кариськизы «Атмосферае». Проектъёссы устоосыз пӧлы шедизы.

— Проектмес бырйизы, озьыен, туэ гужем микрорайонамы вӧл-вӧл площадка усьтӥськоз. Сое мон но, 4 пиналъёсы но чидатэк витиськомы ни, — шуэ Молдаванка микрорайонын улӥсь Ирина Вотинцева.

Нош Пичи Пурга ёросысь Яган каргуртысь егитъёс конкурсэ ыстӥллям «Яганысь батыр» проектсэс. Видео дасяллям: нылаш ӝӧк сьӧрын шаньги сиыса пуке, пияш — компьютер азьын, куинетӥез пинал — азбар шорын. Мугорез кыдатон площадкамы луысал ке, тазьы, пе, тэк ӧй пукысалмы. Возьматӥллям тупась инты но — культурая юртысьтызы висъетэз — отчы, пе, тренажёр пуктыны умой луысал.

Висъяськизы Можга ёросысь Бадӟым Уча школаын дышетскисьёс но. «Атмосферае» соос ыстӥллям «Уча-робофест» проектсэс. Покчи классъёсын дышетскисьёс пӧлын, пе, робототехникалы сӥзем ӵошатскон ортчытыны малпаськом. Тэшкылиос компьютер но смартфон сьӧрын гинэ медаз пуке, ваньмон дырзэс пайдаё мед ортчытозы — роботъёс кылдытыса. Со понна, пе, кулэ луоз «Лего» шудон. Кичӧлтонзы устоосыз пӧлы шедемын. Озьыен, выль дышетскон арын покчиосты вите тунсыко ужрад.

________

Елена ТУГАШОВА

Удмурт Дунне
By Удмурт Дунне 15 июня, 2020 15:07