Ӵуказе нунал понна сюлмасько дэмен

Удмурт Дунне
By Удмурт Дунне 30 июня, 2020 10:02
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Якшур-Бӧдья ёросысь Якшурысь быръёнъя 33/04 участок интыяськемын удмурт культурая «Туклячиос» центре. Арня ӵоже татын вазь ӵукнаысен бер ӝытозь удмурт крезьгур чузъяськиз, куара сётонэ лыктэмъёслы капчи мылкыд кузьмаса.

Якшур-Бӧдья ёросысь Якшурысь быръёнъя участокын вань куронъёсты чаклазы.
Туспуктӥз Валентина ЕМЕЛЬЯНОВА

Быръёнъя участоклэн председателез Григорий Широбоков верамъя, куара сётонэ пыриськыны быгатӥз Якшур гуртысь 625 мурт. Чекер гурт но участоказы лыдъяське на, но отын улӥсез ик ӧвӧл ни. Пандемия мынон вакытэ тросгес саклык висъязы тазалыкез утёнлы. Кылсярысь, адямиос одӥг ӧсэтӥ пыризы, нош потӥзы мукет-
тӥз. Котькуд пырисьлэсь температуразэ мертазы, маска, перчаткиос но ручка сётӥзы. Куара сётон 25-тӥ июньысен кутскиз ке но, комиссия ужзэ мытӥз ни 16-тӥ июньысен. Пандемиен сэрен участокын, пе, трос калык медаз люкаськы, соин ик нимысьтыз список кылдытӥзы, кин но ку лыктоз шуыса.

— Ваньмыз чакламъя мынэ, куара сётыны мылкыд карисьёс тросгес вал быръён кутскон нуналэ но шутэтскон нуналъёсы, — шуэ Григорий Юрьевич. — 7 мурт куриськон гожтӥз мукет интыын куара сётон вылысь, нош 5 мурт куриськон гожтӥз ми дорын куара сётыны. Ужрад арня ӵоже кыстӥське, соин ик тазэ куара сётонэз азьвылъёсыныз нокызьы ӵошатыны уг луы. Туннэ 28-тӥ июнь ай бере, тросгес калык ми доры лыктоз 1-тӥ июле. Гуртоос понна та нуналэ Мукшиысь но Сюровай гуртъёсысь артистъёс шулдыр концерт возьматозы.

30-тӥ июне 14 часлы Якшурысь 302 адями куара сётӥз, комиссилэн ёзчиосыз 19 мурт доры потазы, тросэз соос арлыдоос луо яке ветлыны шугъясько.

Конституцие ӵектэм воштонъёслы дурбасьтӥзы егит кузпалъёс Мария но Леонид Широбоковъёс. Мария Александровна ёрос больницаын медсестра луыса тырше. Ӵектэм воштонъёс пӧлысь солы тужгес матын луэ тазалыкез но нылпиослэсь правооссэс утён. Потэ вал, пе, ёрос больницаосын но туала ужан оборудованиез тросгес адӟемез. Соку троссэ адямиосты ёросын ик йӧнатыны луысал, висисьёс анализ лэсьтыны палэнэ ӧй ветлысалзы.

Якшур гуртын улӥсьёс Конституцие воштонъёс пыртон понна куара сётонэн огдыре пыриськизы «Столетие Удмуртии» викторинае но кинюртэм бичазы муниципал кылдытэтлэн дасям проектэз понна. Григорий Широбоков верамъя, Якшур гуртысь нылпиослэн шудон интызы вужмемын. Гуртоос ӵектӥзы удмурт культурая «Туклячиос» центр дорысь нылпи площадказэс выльдыны-тупатъяны. Малпанъёссэс быдэстон вылысь ик гуртоос пырисько «Определяем будущее вместе» элькун проектэ.

Валентина Емельянова

Удмурт Дунне
By Удмурт Дунне 30 июня, 2020 10:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<