Якшур-Бӧдья ёросысь Мукшиысь школаез выльдо

Удмурт Дунне
By Удмурт Дунне 8 июня, 2020 14:53

«Бадӟым ремонт» проект чотын туэ шаерысьтымы 140 объектэз тупатъяны-выльдыны чакламын. Пӧлазы шедемын Якшур-Бӧдья ёросысь Мукши школа но. Та вакытэ отын резь-куаж лэсьтӥськон ужъёс мыно.

Туспуктӥз Валентина Емельянова
Якшур-Бӧдья ёросысь Мукши школаысь завхоз В. Адисанова, директор Ю. Ардашев но муниципал кылдытэтлэн йырыз А. Брюхачев эскеро ремонтлэсь мынэмзэ.
Туспуктӥз Валентина Емельянова

Та школаын котьку но удмурт кылэз дышетӥзы. Правительстволэн Тӧроез Ярослав Семёнов верамъя, Удмуртилэн кунлык басьтэмез дырысен 100 ар тырмонэн валче таӵе школаослы туэ эшшо но тросгес саклык висъяны чакламын. Озьы бадӟым ремонт ортчытыны кулэ Вавож ёросысь куд-ог школаосын, К. Герд нимо гимназиын но Можгаысь педагогикая колледжын.

Мукшиысь школа 1977-тӥ арысен ужа, со дырысен рос-прос тупатъямын ӧвӧл шуэмысь, липетсэ, укнооссэ
вошъязы, спортзалзэ выльдӥзы ик вал.

— Милям школаямы 5 гуртысь пиналъёс ветло, ог 10 ар талэсь азьло гинэ 300-лэсь трос нылпиос люкасько вал, — вера школалэн директорез Юрий Ардашев. — Одӥг юртын ӟоскыт луиз но, покчи классъёсы ветлӥсьёсты нылпи садэ выжтӥмы. Та вакытэ дӥнямы 105 пиналъёс дышетско, 11-тӥ классэз 5 нылпиос йылпумъязы, 9-тӥ классэз — 9 нылъёс. 25-тӥ майысен школаямы бадӟым выльдӥськон кутскиз, лэсьтӥськон ужъёсты йылпумъяны чакламын 1-тӥ августлы. Ремонтлэсь мынэмзэ котькуд нунал сак эскериськомы.

Та вакытэ школалэн пушкыз пуштэм бервылын кадь: ваньмыз сэрттэмын-таркамын. Арня кутсконын отын ужазы электрикъёс, соос лампаосты но езъёсты куязы. Электрикъёсты воштӥзы сантехникъёс — шуныт сётӥсь гумыосты вандылӥзы. Огкылын вераса, лампаосты ошылоно, вӧлдэтсэ, выжзэ выльдоно, борддоръёссэ буяно, ӧсъёссэ но корт гумыоссэ воштоно. Озьы ремонт огъя 16 миллион манет тыр дунъямын. Табере школаын нимысьтыз саклык висъялозы кышкытлыклэсь утиськонлы, тылпулэсь но лушкаськисьёслэсь утиськон сигнализациос пуктозы.

— Ёрос школаос пӧлысь милямез тужгес вужез лыдъяське ни, кылем арын ик ремонт ортчытыны чакламын вал, но коньдон ӧз шедьы, — шуэ завхоз Валентина Адисанова. — Бадӟым йыр висёнмы — сьӧрос, со нимаз сылэ, отчы ульчаетӥ мыноно, нӧд коласа, зор-кот ултӥ. Табере школа борды итэт пуктозы, отчы шедьыны луоз ни, ульчае потатэк. Одӥгез ӝожомытэ: школаямы выль инвентарь вуттыны чакламын ӧвӧл. Партаосмы но шальтрамын ни.

«Бадӟым ремонт» проект чотын школа азьысь пыдын ветлон сюресэз но выльдыны чакламын, отчы плитаос вӧлдозы. Али дышетӥсьёс школа азбарез шулдыртон сярысь сюлмасько. Дышетскон ар али гинэ йылпумъяськиз кадь, нош мукшиос чидатэк витё ни 1-тӥ сентябрез.


Валентина Емельянова

Удмурт Дунне
By Удмурт Дунне 8 июня, 2020 14:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<