Ижысь больницаосты выльдо

Удмурт Дунне
By Удмурт Дунне 19 июня, 2020 10:19
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Та вакытэ Ижкарысь 9 больницаос «Бадӟым ремонт» проект улсын выльдӥсько. Кызьы ужъёс мыно 7 но 8 номеро больницаосын, эскериз Ижкарлэн йырыз Олег Бекмеметьев журналистъёсын ӵош.

Ижысь 7 номеро больницаын ремонт сӥзьылысен мынэ.
Туспуктэм: izh.ru

Шуныт липет улын

Воткинск шоссе ульчаысь 7 номеро больницаын ноку адӟылымтэ ремонт ортче, соос кылем сӥзьылысен мытэмын. Али ке но корпусъёс азьын музъем гудэмын, юрт пушкын буяськон, утялтӥськон мынэ. Озьы ке но больница одӥг нуналлы но ӧсъёссэ ӧз ворсалля.

— Та больницалы 50 арлэсь трос ни, — вера валтӥсь врач Игорь Стародубцев. — Арлы быдэ пушсэ утялтон, буян сярысь сюлмаськиськом ке но, татын ноку рос-прос тупатъян ӧз на ортчылы вал. Зэм, операция лэсьтон, реанимация ортчытон ёзэтъёссэ туала куронъёслы тупамон каримы вал. Озьы ке но таиз ремонт — бад­ӟым вамыш, больницамы быдэсак выльдӥське, шуыны луоз.

Больницаын бадӟымъёслы поликлиника, стационар, роддом нимаз юртъёсын интыяськемын. Ваньмызлэсь сямен липетъёссэс тупатъязы. Та ужъёсты кылем арын ик быдэстӥзы, кылем тол возь­матӥз: ужъёс рос-прос лэсьтэмын шуыса, пусйиз валтӥсь врач.

Озьы ик кылем арын стационарын, поликлиникаын укноос вошъямын. Шуныт луиз, нокытӥ уг пельты, палатаосты тӧлатыны капчигес луиз. Озьы ик выльдэмын тыл езъёс, мисьтӥськон сэрегъёс, ӧсъёс, выжъёс вылэ линолеум вӧлдэмын, борддоръёс сайкыт буямын. Ваньмыз лэсьтэмын: висисьлэн мылкыдыз капчи мед луоз, ӝоггес мед бурмоз шуыса.

Та вакытэ лэсьтӥськон азинтӥське на нейрохирургияя но ЛОР отделениосын. Уж озьы радъямын, соос одӥг нуналлы но ӧз пытсаськылэ. Ӝыны люкетсэ кылем арын тупатъязы, табере отын висисьёс кыллё ни, али кылемзэ выльдо. Нялтас вераса, 7 номеро больницаысь нейрохирургияя ёзэтын быдэс Удмуртиысь калыкез йӧнато. Отын ар ӵоже 800 пала операция лэсьто.

Кызьы ужъёс мыно 7 но 8 номеро больницаосын, эскериз Ижкарлэн йырыз Олег Бекмеметьев журналистъёсын ӵош.
Туспуктэм: izh.ru

Ньыль ӧс

Серов ульчаысь 8 номеро больница но шӧдскымон воштӥське. Терапияя но хирургияя отделениосын ву но шуныт вайись гумыос, укноос вошъямын, тылпу сярысь ивортӥсь тӥрлык пуктэмын. Одӥг корпусысь мукетаз выжонын укноос выльдэмын. Азьвыл толалтэ куазен отӥ висисьёс кынмыса ветлӥзы, табере эмчиос отчы сяська мерттон сярысь малпасько ни.

Эшшо огез шумпотон ивор: терапевтической отделенилэсь тупатъям 2 этажзэ но хирургилэсь оглюкетсэ сётозы Софья Ковалевскаялэн урамаз интыяськем поликлиникалы. Таиз юрт 1956-тӥ арын пуктэмын, отын ужаны но, висисьёсты но эскерыны кышкыт ни. Туэ ар куспын вань документъёсты бичам бере та палъёсын улӥсьёс выльдӥськем юртын йӧнатскыны быгатозы ни.

— Озьы ик бадӟым ремонтлы луыса табере больницаямы 4 нимаз ӧсъёс пуктэмын, — вера больницалэн валтӥсь врачез Валерий Ватулин. — Огетӥз висьёс пырозы, мукетытӥз приёме кыкетӥзэ лыктӥсьёс, куинетӥетӥз — диспансеризация ортчисьёс. Озьы висись муртъёс тазаосыныз уз ни пумиськылэ.

Олег Бекмеметьев верамъя, «Бадӟым ремонт» улсын 9 больницаосысь оглом 30 пала корпусъёс туала куронъёслы тупамон луозы. Талы ог 800 миллион манет висъямын. Та ужъёс «Ижевские электрические сети» предприятиез вузам уксёен радъясько. Ремонтлэсь ӟечлыксэ эскеро город Думаысь депутатъёс, эмчиос. Ӝожтӥськонъёс пусъемын ӧвӧл на.

________

Ангелина СНИГИРЁВА

Удмурт Дунне
By Удмурт Дунне 19 июня, 2020 10:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<