Экономикаез ӝутыны кужыммы вань. Кыӵе юанъёс ӝутӥськизы Кун Кенешлэн сессияз?

Удмурт Дунне
By Удмурт Дунне 25 июня, 2020 10:21

23-тӥ июне ортчиз Кун Кенешлэн 26-тӥ сессиез. Солэн ужаз пыриськиз Удмуртилэн Тӧроез Александр Бречалов, экономикаын кылдэм югдур сярысь вераз.

udmgossovet.ru
Кун Кенешлэн сессияз эскеремын лэчыт ужпумъёс
Туспуктэм: udmgossovet.ru

Тросгес эмъюм но машина

Коронавирус вӧлмемен, Удмуртиысь уноез предприятиос ужзэс огдырлы дугдытоно луизы.

— Туэ промышленной вузъёс поттэмын ог 197 миллиард 300 миллион манет тыр. Чакламлэсь со 98,7 процент луэ. Россиысь шоро-куспо лыдпусъёсты учконо ке, 1,1 процентлы уногес вуз поттыны пӧрмытӥмы, — сессие люкаськем депутатъёс азьын вераз Александр Бречалов.

Тӧро пусъемъя, кылем арын сярысь, 41 процентлы уногес поттӥмы эмъюм но тазалыкез утёнын кутӥськись тӥрлык. Со сяна, ог 32 процентлы тросгес бичамын машина. Туэ нырысетӥ квартал ӵоже шаерамы ог 17 миллиард манет тыр кыскемын инвестициос, миым сярысь, со 7,4 процентлы уногес.

— Январь-апрель толэзьёсы шоро-куспо уждун шаерамы 34 сюрс 482 манет луиз, — вераз Тӧро. — Кылем арысь та вакытэн ӵошатыса, со 6,8 процентлы уногес. Зэм, кӧня ке будӥзы дунъёс но. Берло ӝыны ар ӵоже ужтэк кылемъёслэн лыдзы 2,7 поллы йылӥз но 2,68 процент луиз. Оглом али ог 20 сюрс 400 мурт ужтэк пуке. Май толэзе гинэ пособие басьтон вылысь вужерысь потӥз ог 9 сюрс 700 мурт но уже интыянъя службае учётэ султӥз.

Ӧз вуы 7,8 миллиард

Экономикаез ӝутыны шаермылэн кужымез вань. Кылсярысь, промышленность удысын 34 проектэз улонэ пыӵатыны чакламын, со ог 2 сюрс 600 ужан инты кылдытыны юрттоз. Со сяна, гурт хозяйствоосын пуктӥське 25 ферма, озьыен, эшшо ог 200 муртлы уж луоз. Александр Бречалов пусъемъя, шаерамы али ужало пичи но шоро-куспо 57 сюрс 610 предприятиос, отын тыршисьёслэн лыдзы ар кутсконысен 1 сюрс 231 муртлы будӥз. Оглом та ӧрын ужало 205 сюрслэсь ятыр адямиос.

Январь-май толэзьёсы шаермылэн бюджетаз прибыльлы налог гинэ 3 миллиард манетлы ичигес вуиз. Кулэсмиз адямиослэн доходысьтызы выт но. Оглом бюджетэ ӧз вуы 7,8 миллиард манет. Экономика 3-4 процентлы усёз шуыса чакламын. Котьма ке но бюджет удысын ужасьёслы ваньзылы уждун тырон, пуктӥськон дугдытэмын ӧвӧл. Али чакламын шаерысьтымы автопаркез выльдыны. Кылсярысь, врачъёст висисьёс доры 10-20 аръем маши­наосын вуттӥськоно луо. Соосты тупатъяны ик олокӧня уксё кошке. Соин ик чакламын 69 «Лада Веста» машина басьтыны, 40-эз вуоз ёрос больницаосы. Соос пӧлысь 39-эз газэн ворттылозы. Бензин вылын арлы быдэ озьы ог 4 миллион манет шыръяны луоз, шуиз Александр Бречалов. Со уксёен школа автобусъёсты выльдыны луоз.

Вуоно анайёслы юрттэт

Кылем арын бюджетлэн доход люкетэз 80 миллиард 651 миллион манет луиз,
ог 57 миллиардэз вуэм вытъё­сысь люкаськиз.
Расход люкетэз 82 миллиард 949 манет вал. Коньдон ужпумъёсъя министр Станислав Евдокимов пусъемъя, арлы быдэ йылэ социальной ужпумъёсты быдэстыны юрттэт. Тазалыкез утёнлы, калыкез улон-вылонын утёнлы, дышетонлы, спортлы, туризмлы, культуралы миым висъяськиз 54 миллиард манетлэсь ятыр. Калыклэсь улон-вылонзэ умоятон сярысь сюлмаськыса, законэ ялан воштонъёс пыртэ Кун Кенеш,
депутатъёс валче ужало Правительствоен. Кылсярысь, нылпи вайыны дасяськись нокытын ужасьтэм ёрмись нылкышноослы толэзьлы быдэ июньысен туэ ар пумозь бюджетысь 10 сюрс 333 манет висъяны кутскозы. Кун Кенешлэн Тӧроез Владимир Невоструев пусъемъя, туэлы бюджет оглом чакламын вал 72,8 миллиард манет тыр, дэмен ужаса, сое йылтыны луиз 8 миллиард манетлы.

— Калык понна сюлмаськыса ужаны тыршиськомы. Озьы кылем арын луиз городысь школаосы дышетыны лыктэм егит специалистъёслы подъёмной висъяны. 220 визьнодасьёс 1-тӥ арзэ ужамзы понна басьтыны быгатӥзы ни быдэн 40 сюрс манет. Эшшо 60 сюрс сётӥськоз 2-тӥ арзэ ужамзы понна, нош 3-тӥ араз — 80 сюрс манет. Со сяна, сыӵе ик юрттэт басьто гуртысь школаосы лыктэмъёс. Дышетскемзы бере армиысь бертэмъёслы, нылпи вайыса декретысь потэмъёслы но сыӵе ик юрттэт чакламын. Трос нылпиё ог 23 сюрс семьяосысь школаосын дышетскись пиналъёсты табере нуналаз огпол дунтэк пӧсь сиёнэн сюдо. Асьсэ вылэ ужасьёслы (самозанятойёслы) луонлык сётэмын ужбергатӥсь кариськыны. Соослы ичизэ 4 процент выт тупатэмын, — вераз Владимир Невоструев.

Школаосты
вуттоно

Александр Бречалов вазиськиз депутатъёслы, кун долгез коммерческой займъёсын йылтоно шуыса.

— Со уксёен социальной объектъёсты вуттыны луысал. Шаерамы азинтӥськыны но ужаны дась предприятиос вань. Кылсярысь, гурт хозяйствоослы техника басьтыны, тысь шертон но куасьтон комплексъёссэс выльдыны субсидия висъяны уногес луысал ке, бюджетэ ватсаса выт вуысал. Вавож ёросысь Кионгуртысь, Дэри ёросысь Ягул черкогуртысь но Пыӵанка гуртысь, Сьӧлта черкогуртысь школаосты ӝоггес вуттон вылысь но со коньдонэз кутыны луысал, — шуиз Александр Владимирович.

Та ужпумез Кун Кенешысь ялан ужась комиссиос одно ик эскерозы.

Азбарын курытсэ уз вузалэ

Туэ 1-тӥ августысен шаерамы уз лэзе никотин суретъёсты вузаны. Кун Кенешлэн Тӧ­роезлэн нырысетӥ вош­тӥ­сез Надежда Михайлова вераз: 9 улосын сыӵе закон ужа ни. Шаерамы снюсэз но никотинлэсь лэсьтэм мукет арбериосты быдэ вуымтэослы вузаны алэмын ни вал. Котьма ке но сое дышетскисьёс пӧлын вӧлмытӥсьёс шедьы­лӥ­зы. Табере сыӵе суретъёсын вуз карыны шаерамы нокытын но уз луы ни.

Со сяна, 1-тӥ августысен улоно коркаосын интыяськем баръёсын, буфетъёсын алозы курытсэ вузаны. Ижын гинэ 171 сыӵе учреждениос. Таин валче азбаръёсын юыса аляктӥсьёс йыло, артысь коркаосын улӥсьёс курадӟо. Сиён-юонэн вуз кариськомы шуыса, куд-огез уен-нуналэн но курытсэ лэзья. Табере корка бордысь кафеосын но ресторанъёсын гинэ курытэныз вуз карыны лэзёзы, зал 50 квадрат метрлэсь бадӟым ке. Закон улонэ пыӵаны кутскиз ке, «наливайка» шуонъёс пытсаськозы.

Туризмъя закон кылдӥз

Удмуртилэн кунлык басьтэмез дырысен 100 ар тырмонлы сӥзем «ДаУР» проектъя 350 ӵектон вуэмын вал. Ваньмыз со — Удмуртиысь паймымон интыос. Ваньмаз луэ эшшо тросгес калыкез кыскыны. Наукая, дышетонъя, культурая, нациосын но егитъёсын ужан политикая но спортъя ялан ужась комиссиен кивалтӥсь Татьяна Ишматова пусъемъя, шаерысьтымы туризмез азинтыны кулэ. Соку Удмуртиез эшшо тросгес адямиос тодозы. Табере туризмъя закон кутэмын. Кылдытоно туризмъя кластер, туризмез вӧл­мы­тонэн вырись иворъёсъя центр, малпано огъя символика, кылдытоно огъя стиль. Соку шаермы эшшо чебергес воректоз.

________

Елена Сараматова

Удмурт Дунне
By Удмурт Дунне 25 июня, 2020 10:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<