«Шудон корка» передача видеоблогеръёсты будэтоз

Удмурт Дунне
By Удмурт Дунне 8 июня, 2020 10:52

17-тӥ арзэ ини пиналъёсты шумпоттэ «Мынам Удмуртие» телеканаллэн «Шудон корка» передачаез. Туэ гужем куспын со выльдӥськоз — передачаез лэсьтонэ пыриськозы асьсэос нылпиос.

Ужъёсты ыстоно социальной сетьёсысь «Шудон корка» передачалэн группаосаз #мынамгуртэ хештэген.

Кинлэн гуртэз самой чебер? Оло, кытын ке аспӧртэмлыко писпу будэ? Яке нош гуртады 100 аресъем песянай-песятай улэ? Оло, верамды потэ гурттылэн кылдэмез сярысь? Тае ваньзэ возьматыны луоз, «Шудон корка» программалэн «Мынам гуртэ» акцияз пыриськыса. Со сӥземын Удмуртилэн кунлык басьтэмез дырысен 100 ар тырмонлы. Отчы пыриськыны быгато 3 аресысен 14 аресозь нылпиос.

— Туала пиналъёс — гуртын-а соос уло, городын-а — быгатыса уже куто
телефонъёсты. Та бордысь ик малпан кылдӥз: нылпиос гаджетъёссы сьӧрын дась видеоосты учкыса медаз пуке, асьсэос мед пыриськозы сое лэсьтонэ. Валтӥсь курон — видеосуредзы сӥземын луыны кулэ гуртсылы. Соос возьматэмын луозы «Шудон коркаямы», — шуэ передачаез нуись Ольга Ардашева.

Видеоез пӧртэм сямен лэсьтыны луоз: гуртэд сярысь кадрын вераны яке кыӵе ке тунсыко адямилэсь интервью басьтыны. Ужъёсты ыстоно социальной сетьёсысь «Шудон корка» передачалэн группаосаз #мынамгуртэ хештэген.

— Пӧртэм гуртъёсысь нылпиос пӧлын юалляськон ортчытӥмы вал, кин луэмзы потэ, — веранзэ азьланьтэ
О. Ардашева. — Тросэз шуизы, путешествиослы сӥзем передачаез нуись, пе, луысалмы, пӧртэм интыосы, пе, вуылысалмы. «Мынам гуртэ» акцимы соослы луонлык сётоз асьсэды телеведущей чотын эскерыны. Азьланяз, оло, та акцие пыриськем нылпиос пӧлын удмурт журналистикаын ӝужалозы выль кизилиос. Мукет пайдаез та акцимылэн: нылпиослэн вордскем интыенызы тунсыкъяськонзы, данъяськонзы ӝутскоз.

Устоосыз ужъёс пусъемын луозы синпель кузьымъёсын.

Видео лэсьтыку, лыдэ басьтоно таӵе куронъёсты:

видеосуред луыны кулэ 1920 Х 1080 разрешениен (full HD);

горизонтальной съёмка мед луоз;

куара ӟеч мед чузъяськоз;

паузаос медаз луэ.

________

Елена Тугашова

Удмурт Дунне
By Удмурт Дунне 8 июня, 2020 10:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<