Фронтовикъёслэсь салам

Удмурт Дунне
By Удмурт Дунне 9 июня, 2020 14:10
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Алнаш черкогуртын шедьтӥзы фронтовикъёслэсь 1990-тӥ арын гожтэм гожтэтсэс. Шараяськиз со, Быдӟым ожын быремъёслы сӥзем мемориал пулэз выльдыку.

Алнашысь памятник выльдӥське.
Туспуктӥз Людмила СУРЧАКОВА

Кылем арын гужем ик мемориал комплексэз выльдон, котырзэ паськытатон но югдытон пумысен ужпум ёрос администрациын ӝутӥськиз. Юалляськон ортчытӥзы калык пӧлын но. Памятник угось вашкала кызьпуос сьӧрысь уггес адскы ни вал, ачиз но куашкан калэ вуэмын. Туйлэсь рос-прос памятник лэсьтоно, шуизы. Туэ Быдӟым Вормонлы 75 ар тырмонэн валче ёросъёсысь синпелетъёсты выльдыны элькун бюджетысь уксё висъяське. Алнаш ёросысь памятникъёсты тупатыны вуиз 8 миллион 700 сюрс манет. Со ик лэсьтӥськон борды басьтӥськыны луонлык сётӥз.

Памятникез тупатъясьёс 28-тӥ мае шӧдтэк шорысь шедьтӥзы сыномем корт юдэсэз. Учкизы но, капсулалы кельше. Пушкысьтыз ватоссэ адӟыса, воксё абдразы. Быдӟым Вормонлы 45 ар тырмон аре ёросысь ветеранъёс вуоно поколениослы гожтэтсэс, машинкаен печатласа, капсулае понӥллям. Валамон ни, аръёс ортчемъя со сярысь воксё вунэтӥзы. Соин ик та гожтэт али вашкалаысь куара кадь чузъяськиз.

Ветеранъёс 2000-тӥ аръёсысь егитъёслы вазиськиллям: «Милям поколенимылы секыт адӟон усиз. Вир кисьтыса, улонзэс сётыса, утизы песятайёсты шаерез фашизмлэсь. Дан понна ӧм, тӥ, егитъёс, та музъем вылын улыны мед быгатоды шуыса, тӥледыз малпаса, ожмаськыны султӥмы, вань луонозэ но луонтэмзэ лэсьтӥмы вой-
на вакытэ но ож бере. Ми чидамы, ми вормимы. Таин валче ӝыны даур ӵоже ни калык огсыр улэ.

Котькуд поколенилы история кыӵе ке шуг-секытъёс дася. Тӥледлы, 1980-тӥ аръёсы вордскемъёслы, 20-тӥ даурлэн кутсконаз милесьтым мытэм ужмес, перестройкаез азинтоно луоз. Ми тодӥськом, тӥляд сюрес вылады розаос гинэ вӧлдэмын уз луэ, тӥляд асьтэлэн шуг-секытъёсты луозы. Ветеранъёслэн кышкасьтэм, геройлыко луэмзы но ужез гажамзы тӥледлы адӟем карымон, вормонлы кужым басьтон мед луоз».

Фронтовикъёс косо ог-огмес яратыны, гажаны, эшъяськыса улыны, берпуметӥ нуналозь Атыкай музъемлы оскымон луыны. Быдӟым ожын геройлыко быремъёсты но ожмаськемъёсты вунэтыны уг лэзё. «Ужен но ӟеч кылын юрттэ ветеранъёслы, соос та улонлэн улэп легендаосыз луо», — шуэмын гожтэтын.

Гожтэт пумын кинюртэмъёсыз ӧвӧл. Но 1990-тӥ арын ёросын ог 400 ветеранъёс улэпесь вал на.

Отчы гожтэтэн корт капсула понэмын вылэм.
Туспуктӥз Людмила СУРЧАКОВА

— Туннэ пӧламы вань на 5 ветеранъёс, — шуэ Алнаш ёрослэн йырыз Алексей Семенов. — Соос та шедьтос сярысь трос вераны быгатозы, малпаськомы. Коронавирусэн югдур капчигес луиз ке, одно ик доразы мыномы, гожтэтэз возьматомы. Со вазиськонзы ваньмылэсь сюлэммес бугыртӥз. Котькуд кылыз малпаса гожтэмын. Гожтэтын ветеранъёс осконзэс верало, черкогурт, выль поколениослэн сюлмаськеменызы но тыршеменызы, арысь аре котыр ласянь чеберскоз, улон каньылгес луоз шуыса. Туннэ вераны быгатӥсько: ёрос арлы быдэ выльдӥське. Кылем арын черкогуртын выль школа усьтӥмы. Табере нылпиос ваньзы одӥг сменаен дышетско. Туэ черкогуртын выль нылпи сад ужаны кутскиз. Эшшо огез ясли-сад пуктӥське. Со но вуиз ке, черодзэс возьмаса пукисьёс уз луэ. Ву но шуныт вайись гумыосты вошъяломы. Алнаш черкогуртын ӧвӧл ни аварийной коркаос, пуктӥсько кирпичлэсь выль юртъёс. Туэ чакламын 6 азбарез тупатъяны. Таӵе улонэз адӟыса, ветеранъёс шумпотысалзы, малпаськомы.

Капсулаен гожтэт Алнаш музее сётэмын. Туэ мемориал комплекслэн борддораз вуоно пиналъёслы выль гожтэт поныны чаклало. Сое гожтозы 5 ветеранъёс.

________

Елена САРАМАТОВА

Удмурт Дунне
By Удмурт Дунне 9 июня, 2020 14:10 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<