Улон — со аспӧртэмлыко проект

Удмурт Дунне
By Удмурт Дунне 8 июня, 2020 10:07

Юлия Шахтина — Ижысь К. Герд нимо гимназиысь дышетӥсь, кивалтэ отысь Удмурт дышетскисьёслэн офисэнызы. Нылпиосты дышетэ проект дасяны, улонэ пыӵатыны. Солэн кивалтэмез улсын гимназиысь пиналъёс Россиын ортчылӥсь пӧртэм конкурсъёсын грантъёс утыло.

— Юлия, шуо, тон удмурт сямен вераськыны, пе, чик уд быгатӥськы вылэм. Удмурт кылын вольыт лабыртӥськод ук!

— Зэм, 18 аресозям ӟуч сямен гинэ вераськылӥ, малы ке шуоно вордӥськи ӟучомем гуртын — Шаркан ёросысь Сосновка черкогуртын. Семьяям анай кыл чузъяськылӥз ке но, удмурт кылэз школаын дышетӥм ке но, удмуртлык тодын ик ӧй вал. Но одӥг пумиськон ваньзэ йырин-чукин берыктӥз, шуыны луоз.

1999-тӥ арын Дэбес ёросын быръёнъёслы сӥзем ӝыт ортчиз. анаелэн агаез, Россиысь дано кырӟась Николай Кардапольцев, монэ сцена вылэ поттӥз. Быдэстӥ «Италмас» кырӟанэз. Ӵапак со ужрадын вылӥллям Удмуртиысь калык артистка Надежда Уткина но Кун Думаысь депутат Светлана Смирнова. Надежда Эдуардовна синйылтэм монэ, дорам лыктӥз но шуиз: Юли, тыныд будоно, нош будод тон «Шундыкарын»! Отын мыным сокем тунсыко потӥз! Озьы мон «Шундыкаре» 8 пол вуылӥ, отын будӥ но пушйи, шуыны луоз.

— Бӧрысь «Малпан» группаын кырӟад. Озьыен, пичи дырысьтыд артист луон пумысен малпанэд быдэсмиз. Нош малы бӧрысь сцена вылысь кошконо кариськид?

— Зэм, пичи дыръям туж потэ вал артист луэме, малы ке шуоно быдэс выжымы кырӟась-верась.

Черкогуртамы, школаямы кыӵе гинэ ужрадъёс ӧз ортчылэ, котькудаз пыриськылӥ, кырӟай-верай. Нялтас вераса, мамае, географилы дышетӥсь, мынам классэным кивалтӥз. Со ноку но ӧз висъялля монэ мукет пиналъёс пӧлысь. Та понна солы бадӟым тау! Кузям ветлысал ке, оло, мон аналскысал, улонысь ваньзэ капчиен басьтыны дышысал.

Школаын дышетскон вакыт

Семьяямы ми 2 нылпиос: мон но Даши сузэре. 17 аресозям  огнам будӥ. Школаез быдтэме бере мама мынэсьтым нырысьсэ визь-кенеш куриз — нуны витемез, та пумысен сюлмаськемез сярысь вераз. Табере, Даши сузэре шоры учкыса, кӧты уг тыр. Кызьы ми сотэк улысалмы? Висмы бадӟым ке но, со мыным — зэмос эш. Мама шуэ, ми туж пӧртэмесь. Мон пичи дыръям ас дуннеям, ас поннамгес улӥ. Нош Дашимы дорын пукыны уг чида…

Сосновкаын 9 классэз йылпумъяса, городэ кошки, Ижысь 44 номеро Гуманитарной лицее дышетскыны пыри. Сокугес ик Иже вуиз эше, али тодмо кырӟась Светлана Ручкина. Озьы «Шундыкарысь» «Эстрада» отрядмылэн дышетӥсез Марина Галичанина милемыз «Малпан» группае огазеяно кариськиз. Бордамы итӥськизы на мукет жингрес куараос: Эльвира Панченко, Снежана Эскендерова. Соосын ӵош мон 2 ар пала кырӟай. Но лицейын дышетскон капчиен ӧз сётскы, тужгес но гуртысь школа бере. Трос лыдӟиськоно, выльзэ тодоно. Соин ик группаысь кошконо луи. Со сяна, капчи ик ӧй вал городлы дышыны.  Аслам школаям мон кизили вал, нош городын — уно калык пӧлысь одӥгез огшоры адями. Та шӧдон нырысь монэ зӥбыса возиз. Ас азям ужпум пуктӥ: пушкам выёно-усёно ӧвӧл, лицейлэсь мае луэ, ваньзэ басьтоно. Лицейысь ачим кадь ик удмуртъёсты пумитай, кылсярысь, ёросысьтым ик Пороз гуртысь Нелли Лопатинаез. Удмуртлыкен тунсыкъяськонмес бурдъяса во­зиз  дышетӥсьмы Ангелина Ефремовна Решетникова. Лицеез ӟеч йылпумъяй, со улонам трос инвисъёс усьтӥз.

— Лицей бере Удмурт кун университетысь история факультетэ пырид. Та вакытэ «Шундыен» кусыпъёсыд эшшо но юнмазы.

— Ужась муртлы уж шеде, шуо. Лицейын сямен ик, университетын но улонэ тырмемын вал ужрадъёсын, пумиськонъёсын. Ачим но валатэк кыли кадь, кызьы 3-тӥ курсысен «Шундылэн» кивалтӥсез луи. Ас бордам туж трос ужано луиз. Дышетски дырез
валаса радъяны — мед тырмоз университетлы но, общественной ужлы но.

Шумпотӥсько но данъяськисько, «Шундыын» нимо-дано удмуртъёсын ужаны кылдӥз шуыса: Надежда Уткинаен, Татьяна Ишматоваен, Василий Морозовен, Василий Ушаковен, Владимир Соловьёвен, Владимир Завалинэн но трос мукетъёсыныз. Басьтӥськи выль проектъ­ёс кылдытон борды. Эшшо но бадӟымгес саклык висъяны кутскимы ёросъёсысь-гуртъёсысь егитъёслы. Шаерамы нырысьсэ ортчытӥмы удмурт егитъёслэсь форумзэс. Тол но, гужем но удмурт лагерьёс ужаллязы. Усьтӥмы «Артана» клуб. Отын сэрттылӥмы-пертчылӥмы егитъёсын герӟаськем ужпумъёсты. «Вамыш» лагерьлэсь но пуштроссэ воштӥм: туала вакытэ кулэ луись ӧръёсъя карим — ужбергатон, дизайн, политика.

«Шунды» улонам бадӟым пытьы кельтӥз. Али, лэсьтэм ужъёсы шоры учкыса, ваньзэ мукет сямен карысал кадь потэ. Малпасько, егитъёслэн огазеяськонэнызы кивалтыны кулэ та ужлы рос-прос дасям мурт. Умой луысал, удмурт кивалтӥсьёсты дасясь школа усьтӥськысал ке. Татын будысалзы вуоно удмурт политикъёс, кивалтӥсьёс. Кин тодэ, оло, та проектозь но киосы вуозы ай…

Университетын дышетсконме ке верано, история факультет пушкам исследователез усьтӥз. Археологияя но шаертодонъя кафедра кыкетӥ доре луиз. Трос тодон-валан пыӵатӥз научной кивалтӥсе Ирина Григорьевна Шапран. 5 ар ӵоже эскери топонимикаез. Диплом уже Шаркан палъёсылы, Вотка шур котырысь инты нимъёслы, сӥземын вал.

Сцена вылысь но ӧй васькалля, шуыны луоз. Трос пол пыриськылӥ «Студентъёслэн тулыссы» ӵошатсконэ. Берпу­метӥ курсын элькунамы вормисе потӥ. Озьы Россиын ортчись «Студвеснае» пыриськыны шуд усиз. Со ортчиз Тюменьын.

— Тодӥськод на-а, малы сӥземын вал нырысетӥ проектэд? 

— Ма со проект, нырысьсэ тодӥ, лицейын дышетскыкум. Солэсь азьвыл чик уг валаськы вал, малы со кулэ. Но нырысетӥез мильыммы пӧрмиз ик: дышетӥсеным А. Решетниковаен но эшеным Н. Лопатинаен кылдытӥмы «Сосновка но Пороз гуртъёслэн кылъя школазы» нимаськись проектмес. Со пыр малпамы гуртъёсмылэсь историзэс, отысь калыклэсь кызьы вераськемзэ чакланы, эскерыны.

Женеваын ООН-ын фин-угор культурая
шоркар сярысь кенешонэ вуылыкуз.

Университетэз йылпумъяса, малпаськыны кутски азьлань улонэ сярысь. «Шундыын» кыдаса, выль вормонъёс басьтэме потыны кутскиз. Нырысь аспирантурае пыри. Собере витьымтэ шорысь нош ик адӟиськи Светлана Смирноваен. Али малпасько ни: улонын одӥг пумиськон но юнме ӧвӧл. Котькудӥз тодматскон тыныд выльзэ усьтэ. Светлана Константиновна ӵектӥз мыным Улосэз азинтон стратегияя институтаз ужаны. Туж шумпотӥсько солэн бурд улаз шедемелы. Со мыным кыкетӥ анае кадь потэ, монэ но «нылы» гинэ шуэ. Нокыӵе кайгуос шоры учкытэк, гижысь-пиньысь ужаны быгатэмезлы паймемысь уг дугдӥськы.

Пӧртэм проектъёс бордын ужано луылӥз грантъёсты утон вылысь. Трос дышетски, проектъёсты кылдытонъя пӧртэм семинаръёсы пыриськылӥ. Та ик монэ кыдатӥз. Угось проект — со бадӟым уж, кыл кутон. Проект юрттэ кыӵе ке ужпум шоры пӧртэм сямен учкыны, сое
сэрттон-пертчон понна выль амал шедьтыны. Огъя учконо ке, адямилэн улонэз — со но проект.

Институтын мон 7 ар тырши. Нырысь кивалтӥсезлэн С. Смирновалэн воштӥсез луыса, бӧрысь кивалтӥсе юнматӥзы. Та аръёс куспын институт кӧня ужрад ортчытӥз, кӧня проект пыӵатӥз — лыдъянтэм! Кылсярысь, «Егит азьветлӥсьлэн школаез», «Удмуртилэн феноменэз», «Активатор», «Кылъёслэн фестивальзы», гурт туризмлы сӥзем проектъёс… Ӵапак соку улонам эшшо одӥг тунсыко удыс кылдӥз  — «Быгы — фин-угор дуннелэн лулчеберетъя шоркарез» программалэн быдэсъясь директорез луи.

Мукетыз шудо учыр — Америкаысь экотуризмлы сӥзем программае пыриськон. Отчы мыныны мылкыд кариз вуоно кузпалы Виталий но. Май толэзе Америкаысь ӧтён вуиз. Но кушетским: программае кузпалъяськем егитъёслы пыриськыны уг яра. Нош ми июнь толэзе Виталикен сюан ортчытыны дасяськимы вал ни. Номыр шоры учкытэк, кузпалъяськимы но Америкае лобӟимы. Туж кышкамы, берлань бертыны косозы шуыса. Ярам, программаез ортчытӥсьёс семья кылдытэммы пумысен ӟечкылазы гинэ. Экотуризм сярысь отын трос выльзэ тодӥмы. 

Америкае вуылэммы выжыкыл кадь потэ. Уйпал штатысь одӥгаз семьяын 2 арня улӥмы. Ог-огенымы сыӵе эшъяськимы — нокыӵе переводчикъёс кулэ ӧй вал ни. Ми али но соосын кусып возиськомы. Бадӟым праздникъёс дыръя почта пыр ог-огмылы кузьымъёс ысъяськомы. Кузпалэным бадӟым малпанмы вань нош ик доразы вуылыны, но таяз радэ нылпиосынымы ӵош ини.

— Нош кызьы Виталиен ог-огдэс шедьтӥды?

— Милемыз тодматӥз но герӟаз удмуртлык. «Шундыен» кивалтыкум, кырӟасен Дмитрий Загребинэн ӵош ужаны кутскимы. Ӵапак соку Ижын удмурт дискотекаос ортчылыны ӧдъязы. Огаз монэ но ӧтизы люкаськем калыкез шулдыртыны, кырӟаны. Нош диджейлэн пультэз сьӧрын — Алнаш ёросысь Кузёбай гуртысь пиос. Огез — Виталий Шахтин. Мон солы крезьгурен флешкаме сётӥ, со ноутбуказ пуктӥз. Нош отын вирусэз вылэм — техникаез гуньдӥз. Но та бордысь керетон ӧз поты. Виталий со ӝытэ ик монэ кафее ӧтиз. Кӧня ке пумиськылэммы бере дораз куное чортӥз но монэ воксё абдратӥз. Сыӵе аспӧртэмлыко сиён пӧрам — нокытысь  тодэме но, адӟеме но ӧй вал на. Ӝӧк вылзэ но рес­торанын выллем туж чебер дасям. Калыкын шуо: пиосмуртэз аслыд синмаськытэмед потэ ке, сое ческыт сюд. Нош мон та веранэз воштысал: нылмуртэз ас палад карод, ческыт пӧраськыса.

Куке анаелы Виталик пӧраськись шуыса верай, солэсь ымнырзэ адӟоно вал… Укыр огшоры потӥз, лэся. Но Виталик сое буйгатӥз, шуиз: «Адямиос котьку но сиськозы, соин пӧраськисьёс котьку но кулэ луозы». Кузпалы мынам романтик. Ӵапак сыӵе адями мыным кулэ. Со весь паймытыны, шумпоттыны быгатэ. Туж яратэ ас ужзэ. Котькуд нунал пӧраськыны мылкыд кулэ ук!

Зэм, мон шудо кышномурт, маин туннэ семьяме сюдоно ай шуыса, йырме уг висьытӥськы. Ваньзэ дася Виталик.

Декретын пукыкум, дизайнэн тунсыкъяськыны кутски, малы ке шуоно выль корка улыны выжим. Туж потэ вал сое ас киосыным аспӧртэмлыко но шулдыр кареме. Соин ик кутски нылпиосылэн висъетазы вигвамъёс, куар­лы укшась небыт выж лёгетъёс вурылыны.

К. Герд нимо гимназиын проект гожъяны дышетэ.

— Ижысь Кузебай Герд нимо гимназиын кемалась ик уд ужаськы ай, нош тыршемедлэн емышез быгыльске ни — Россиысь егитъёслэн агентствозылэсь грантсэ басьтыны быгатӥды. Кыӵе проектэныды вормисе потӥды?

— К. Герд нимо гимназиен монэ нимысьтыз номыр но уг герӟа вал. Но огпол солэн кивалтӥсеныз Татьяна Геннадьевна Волковаен пыриськимы Йошкар-Олаын ортчем семинаре: сое радъяз «Россия — Финляндия» огазеяськон, сӥземын вал фин-угор азьветлӥсьёсты дасянлы, проектъёс бордын ужанлы. Озьы кичӧлтонъёс бордын ужан ик Татьяна Геннадьевнаен  огазеяз. Со ӵектӥз гимназиын асме эскерыны, нылпиослы проектирование сярысь тодон-валанъёс сётыны. Угось азьлань улон — проектъёс бордын. Пайда вайись малпанлы, кичӧлтонлы котьку уксё шедёз. Проектъёс юртто пӧртэм ужпумъёс шоры выль сямен учкыны, пӧртэм шуг-секытъёсты вормыны. 

Огпол Татьяна Геннадьевнаен малпаськонэ усимы: школаосты проектъёсын-грантъёсын ужаны косо, нош кызьы соосты гожтоно-кылдытоно — рос-прос валэктӥсь ӧвӧл. Соин ик ми талы сӥзем школа усьтоно кариськимы. Озьы вордӥськиз Удмурт дышетскисьёслэн офиссы. Ӵапак та проектэнымы ик вормисе потӥм Россиысь егитъёслэн агентствоенызы радъям конкурсын. Та бӧрсьы ужмы эшшо зол ӧръяськиз.

Ёросъёсы потаса, валамы: пиналъёс тодо «проект» кыллэсь пуштроссэ, нош малы со кулэ, кызьы соин ужано — уг валало. Проектын луыны кулэ кыӵе ке ужпум. Усто, со удмурт культураен, калыкмылэн улон-вылонэныз герӟаськемын ке. Проектной семинаръёсын вуылӥмы Шаркан, Пичи Пурга, Красногорск но уно мукет ёросъёсы. Пиналъёсын ӵош тодон-валанзэс будэтӥзы дышетӥсьёс но. Котькудӥз дышетскись аслэсьтыз проектсэ утьыны кулэ вал. Шаркан ёросысь пиналъёс пусйизы: ёросамы нылпиос удмурт кылын шер верасько. Югдурез воштон понна ӟуч мультфильмъёсты удмуртэ, пе, берыктыломы. Ижысь 56 номеро гимназия кылдытоно кариськиз аслэсьтыз удмурт клубзэ. Отын, пе, ӟучомем пиналъёс ог-огенызы удмуртэн вераськыны, анай кылзэс волятыны быгатозы. Трос проектъёс сӥземын вал инкуазез утёнлы, туала профессиослы, медиа-центръёс кыл­дытонлы но мукет. 3-ез  устоен лыдъямын но соосты пыӵатонлы грант висъямын вал.

Шахтинъёслэн семьязы.

Кунгож сьӧры ӵем поталлясько бере, асьмелэсь ужан амалъёсмес ӵошатӥсько соослэнэн. Финляндие, Германие, Америкае вуылыса, мон валай: отын «проект» кылэз туннэ нуналэ чик уг поттыло ини. Кыӵе ке ужпумез синйылто, шаплы малпасько, кызьы сое палэнтоно, соку ик уж борды кутско. Асьмелэн, жаляса верано, уж дыго-мого мынэ. Кыӵе ке ужпумез нырысь шараяськом, сое кема  сэрттӥськом-пертчиськом но… вунэтӥськом.

— Гимназиын но, дорад но уж сярысь малпаськыса, кыле на-а дырыд нылпиосыдлы?

— Мон тыршисько отчы но, татчы но вуттӥськыны. Угось валасько: нылпиосылы но мон туж кулэ. Тани самоизоляциын дорамы тэк ум пукиське, ӵошен англи кылэз дышетӥськом.

Зэм, коронавирус куд-ог малпанъёсмес сураз-пожаз, улонэ пыӵатыны ӧз сёты. Но та югдурлэсь но умой палъёссэ утчасько. Кылсярысь, алигес С. Смирнова ӵектэмъя пыриськи Евразиысь калыкъёслэн ассамблеязылэн бадӟым онлайн-кенешоназ. Ужрад сӥземын вал тунсыко, кыӵе ке пайда сётӥсь проектъёслы, ужрадъёслы. Угось вуоно арын шаерамы Евразиысь калыкъёслэн саммитсы. Солы али ик дасяськоно ни, кылсярысь, мае возьматыны быгатомы мукет выжыысь калыкъёслы, макем пайдаё ужаськомы, шуом, удмурт калыкмес, кылмес утён ласянь. Малпанъёс но, ужъёс но туж трос. Соин ик сюлмаськисько: быгато-а, вутто-а меда ваньзэ лэсьтыса? Но тодам лыкто анаелэн кылъёсыз: тынад ваньмыз пӧрмоз! Юнгес луисько кадь.

________

Ольга Корепанова

Удмурт Дунне
By Удмурт Дунне 8 июня, 2020 10:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<