Эмчи Елена Наговицына: Улонлэсь дуно номыр ӧвӧл

Удмурт Дунне
By Удмурт Дунне 19 июня, 2020 14:09
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Елена НАГОВИЦЫНА — Дэри ёрос больницалэн валтӥсь врачез. Республикаямы коронавирус вуэм бере отын усьтӥзы ковид-центр. Озьы та вакытэ бадӟым коллективеныз ӵош Елена Николаевна уй но нунал адямиослэн улонзы понна нюръяське. Котькуд бурмем мурт — бадӟым вормон. Кытысь пичи гинэ мугоро нылкышно сомында кужым шедьтэ?

Елена Наговицына

Ковид-центр

— Елена Николаевна, Шарканысь Дэрие тӥ туэ январе гинэ вуиды. Кема ик дыр ӧз ортчы, ёрос больницае вайыны кутскизы коронавирусэн черламъёсты. Малпамтэ шорысь ӧз луы-а?

— Шуак луиз быдэс коллективлы. Ми ог-огмылы умой-умой дышыса но ӧм вуттэ на вал. Мон сокугес гинэ ортчыны кутски ёросысь ФАП-ёстӥ, амбулаториостӥ — соос 60 пала. Ёросысь тазалыкез утён удысын оглом ог 800 мурт ужа. Тросэз паймизы но кадь: выль валтӥсь врачсы санитарияя но гигиеная куронъёсты, вань эмъюмъёсты но трос мукетсэ пыр-поч тодэ. Озьыен, зол чаклалоз, кызьы бурмыто котькуд адямиез.

Коронавирус вуиз но, асьмеос но валатэк, одӥг юн командае огазеяським. Угось 2-3 арня куспын ваньмыз воштӥськиз. Валамы: больницаямы озьы ик пӧртэм висёнъёслэсь йӧна­тӥсь­козы, кылсярысь, аппендицитлэсь, инсульт-инфарктлэсь, ӝут­каськись вирзӥбетлэсь. Но та сяна, бордазы кырмиськемын луоз коронавирус. Нырысь ми кутыны кутским карантинын пукисьёсты — кинъёслэн матысь адямиоссы пӧлын коронавирусэн черламъёс вань, кин мукет кунъёсысь, улосъёсысь вуэмын. Ми соослы озьы ик операциос но лэсьтылӥм. Туж чаклаським: кудзылэн меда коронавируссы шараяськоз ини?

Ремонт лэсьтыны дыр ӧй вал. Нырысь ик палатаосы кислород кыским, паськытатӥм операциос лэсьтон, реанимация ортчытон интыосты. Табере ваньмылы тодамы возёно: одӥг ӧсэтӥ пыриськом, нош потоно ни мукетэтӥз. Нош кытчы ке но воксё пыраны уг яра. Больницаын вань «горд» но «чылкыт» зонаос — одӥгысьтыз мукетаз шедён понна нимысьтыз куронъёс пуктэмын. Ужано инфекцилэсь утись костюмъёсын, соосын вамышъяны гинэ но туж секыт. Вылаз ик, куазь пӧсь луыны кутскиз, нош больницаын вентиляторъёс­ты лэзьыны уг яра. Валамон: врачъёслы но, эмъясь сузэръёслы но талы дышыны капчи ӧй вал. Куд-огез ужаны пумит луизы. Соосты валаны луэ: одӥгъёсызлэн арлыдзы вал ни, мукетъёсызлэн кема кыстӥськись висёнъёссы вань яке пичи пиналъёссы будо.

— Тодӥськоды на, вылды, нырысетӥосызлэсь коронавирусэн черламъёслэсь вуэмзэс?

— Нырысь ик вуттӥзы 13 муртэ. Ми соосты керӟегъ­ясь­кы­тэк пумитам. Но мынам туж бад­ӟым шӧдонэ вал: дасяськоно секыт нуналъёслы. Одӥг пол уйбыт реанимациын ужай — дежурствоослэсь али но ӧй куш­тӥсь­кы. Нош ӵукнаяз валасько: ӝе­гатскытэк люкано бадӟым бригада — котьмалы дась луоно. Кема ик дыр ӧз ортчы, ивор вуэ: Ижысь 1 номеро больницаысь карантинын пукемъёсты, 51 муртэ, ми доры келяло. Тӥни соку пӧсь йӧтӥз ке йӧтӥз! Вань лык­тӥсьёсты интыям. Но интыяны сокем секыт ӧвӧл — табере соосты йӧнатоно. Та сярысь уйшор бере 3 часын кенешыса пуким на.

Коронавирусэн черламъёслы больницаямы 118 койка чакламын, со пӧлысь 12-ез — туж секыт висисьёслы. Йӧ­на­тӥськисьёсмы али 90 пала, пӧ­лазы — 5 нылпиос. Жаляса верано, вань секыт висисьёс но. Вутто вань ёросъёсысь, Иж, Вот­ка, Можга городъёсысь шуге-леке вуэмъёсты. Тужгес пичиезлы висисьмылы 1 толэзь гинэ вал. Ог 200 муртэ бурмытӥм ни. Озьы калленэн выль улон-вылонлы дышиськом кадь.

Вордӥськем нуналыз тупаз коронавирус алян вакытлы.

Вань ужасьёсылы валтӥсь курон: кышкытлыклэсь утиськоно — утёно асьмелэсь, ӵош ужась эшъёсмылэсь, ӵыжы-выжыосмылэсь тазалыксэс. Уката секытгес тае валэктыны больницаямы ик ужась электрикъёслы, сантехникъёслы, лифтёръёслы но мукет та выллем профессиен ужасьёслы. Угось «горд» зонае пырыкузы, соос азе, врачъёслы музэн ик, чурытэсь куронъёс пуктӥсько, кылсярысь, перчатки, респиратор дӥсяно.

Бен, 2-ез врачъёсмы висьыны усизы. Но мар карод — ковид-центрын ужаськом. Москваысь Коммунаркаысь гинэ но врачъёс черлало ук, со паласькись висёнъёсъя нимысьтыз клиника луэ ке но. Кыкез но врачъёсмы секыт ӧз висе, доразы гинэ йӧнатӥськизы.

— Коронавирусэн ужасьёслы кунокуаын улыны дэмлазы. Пӧлады вань-а отчы выжыны мылкыд карисьёс?

— Та понна нимысьтыз тау кароно Удмуртилэн Тӧроезлы Александр Бречаловлы, Правительстволы. Отын улыны мылкыд каремзэс соку ик веразы семьяосын, нылпиосын, арлыдоосын улӥсь тросэз врачъёс, эмъясь сузэръёс, санитаркаос.

Гостиницаосы ик карисько мукет интыосысь дорамы вахтаен ужаны лыктэмъёс. Ковид-центрез усьтон азьын мон валай, ас кужыменымы гинэ со быдӟа ныпъетэз ум ворме шуыса. Соин ик, юрттэт курыса, вазиськи Тазалыкез утёнъя министерствое. Тодам вайи аслэсьтым тодмо врачъёсме, эмъясь сузэръёсме. Пушкам туж шуныт луиз, Шарканысьтым ӵош ужам терапевт, инфекционист но эмъясь сузэр нырысетӥ нуналъёсысен ик бордамы итӥськизы но. Та вакытлы отысь ик вуизы ни огъя практикаен врач, невролог но 3 эмъясь сузэръёс. Мынам кужыме уката тросгес луэ кадь, угось больницаямы ужало соос, кинъёсты мон кемалась тодӥсько, кинъёслы оскисько.

Озьы ик вань Балезиноысь, Эгралась, Ижысь лыктэм эмъясьёс, кылсярысь, дорамы та вакытэ ужало Нырысетӥ элькун больницаысь пульмонолог но валтӥсь анестезиолог. Лыкто частной клиникаосысь специалистъёс. Ас ужан интыосазы соос отпуске потон сярысь заявление гожто. Эмъясь сузэр луыса юрттӥсько студентъёс.

— Озьыен, та вакытэ туж умой шӧдӥське: кин эш, кин ӧвӧл?

— Нырысетӥ нуналъёсысен ик ваче пельпум ужаны кутским Паласькись висёнъёсъя элькун больницаысь специалистъёсын. Соос котьку юрттӥсько визь-кенешен. Но табере ми но ӟечезлы ӟечен ик берыктӥськом, оглюкетсэ черламъёсты дорамы басьтыса.

Туж шумпотоно, огшоры адямиос но палэнэ уг кылё шуыса. Кылсярысь, али но уг тодӥськы, кыӵе ужбергатӥсь милемлы тайвек комбинезонъёс ваем — приёмное поныса кельтэм. Шарканысь трикотажной фабрикалэн кивалтӥсеныз Надежда Георгиевна Зайнаковаен кусыпъёсмы умоесь. Ковид-центр усьтэммы бере ик юрттэт дэмлаз — ужан комбинезонъёсмы улэ шокась басмалэсь дӥсь вурыса сётӥз.

— Нош кыӵе ке пайдаез вань-а ёрос больницалы, татын ковид-центр усьтӥськиз шуыса?

— Нырысь ик, специалистъ­ёс­­мы воштӥськизы — трослы чидасесьгес луизы. Кы­ке­тӥез, дорамы вуэ туала куронъёслы тупась эмъян тӥрлык. Кылсярысь, басьтӥм тыосы кислород сётыны юрт­тӥсь ИВЛ аппаратъёс. Туж шум­по­тӥсь­ком компьютерной томографлы, УЗИ лэсьтон тӥр­лыклы. Коронавирус куке но чигналоз, вылды. Нош та тӥр­лык ёрос больницаямы ик кылёз. Озьыен, висёнъёсты шараяны ӝоггес быгатомы. Соин ик азьланезлы милям бадӟымесь малпанъёсмы. Нош али тау кароно республикамылы таӵе секыт ужез огшоры ёрос больницалы оскемез понна.

Испаниысь ӵыжы-выжыез дӥньын.

— Шаерамы улӥсьёс коронавируслэсь утиськон сярысь вунэтыны кутскизы ни кадь, укыр вазь ӧвӧл-а?

— Мыным потэ, вазь. Чиданы кулэ на: лавкае маскатэк ветлоно ӧвӧл, эшъёсын шергес пумиськылоно, луонлык вань дыръя дорын пуконо, таза улонэн эшъяськоно. Угось эмъясьёслы сяна, асьсэлы коронавирусэн черламъёслы но туж секыт йӧтэ — жаль пото соос мыным: лумбытэн чидало ӝокыт палатаосын, нокытчы потаны уг яра.

Коронавирус котькудмес улонлэсь дунзэ валаны ды­ше­тӥз. Со сяна, валаськиз, кытын, кызьы азинскемын тазалыкез утён — мукет кунъёсын ӵошатыса, Россия висёнлы паськыт аляны ӧз сёты. Медаз но аля ни вылэм.

Анай-атайлэн сӥзёнзы

— Асьтэлы та вакытэ ма тужгес секыт потэ?

— 3 толэзь ӧй бертылы ни Шарканам. Анай-атаелэн арлыдзы вань ни. Соин ик туж куректӥсько: мар меда карыны быгато бакчаын? Нимаз коркан улӥськом бере, уж тырмыт. Ярано, тодмоосмы вань — соос пыр ог-огмылы саламъёс лэзьылӥськом.

Ковид-центрын ужало шуыса тодэмзы бере доръёсы нырысь туж куалектӥзы вал, али огкыл шедьтӥм кадь — буйгазы. Номыр уг куарето. Но тазалыке сярысь ялан юаллясько. Сюлмасько мон сярысь эшъёсы но. Пумиськылыны нокинэн уг пумиськылӥськы — эмъясьёс азе сыӵе курон пуктэмын. Но али телефон, социальной сетьёс вань. Берлозэ но тани смс басьтӥ — медучилищеын ӵош дышетскем эше тазалыке сярысь юаське.

— Пичиысен ик эмъясь луон сярысь малпаськиды, луоз?

— Зэмзэ вераса, вордскеме бере ик анай-атае шуиллям: та нылмы врач мед луоз. Дорамы али но вань терапевтлэн справочникез. Басьтэмын со ӵапак мон вордскон аре. Малпасько, кудзылэн ке но асьсэлэн эмъясь луэмзы потэ, дыр, вал. Нош ужазы соос гурт удысын. Анае, Анна Степановна, ёросамы колхоз председательёс пӧлын нырысетӥез нылкышно вал. Берло ужаз Шарканысь гурт хозяйствоя управлениын. Атае, Николай Степанович, быдэс улонзэ механик вал.

Выжыосы Шаркан ёросысь Быгиысь кыстӥсько. Мон но отын ик вордски. Быгиын туж паймымон ӟеч калык улэ. Отчы ӵыжы-выжыосмы кылемын, адӟиськыны ветлӥськом.

Нош садике, школае Шарканэ ветлӥ ни. Шарканэ ик миленымы ӵош улыны выжиз песянаймы но, Евдокия Алексеевна. Жаляса верано, песятаймы улонысь вазь кошкиз. Анай-атаймы вазь ӵукнаысен бер ӝытозь ужын вал бере, милемды выныным песянаймы будэтӥз, шуыны луэ ни. Со удмурт сямен гинэ вераськылӥз.

Пинал, егит дыръёсы туж ӟеч вакытъёсы тупазы. Компьютеръёс ӧй вал на, но мӧзмыса ӧм пукылэ: шудыны пегӟылӥм, плотэн уяллям, макулатура, эмъюм турынъёс октылӥм. Адӟи, кыӵе со октябрёнок, пионер, комсомолец луон. Семьяямы бадӟымез пинал вал бере, кыл кутоно луылӥ выны понна, корка котырын юрттӥськылӥ. Ноку пудотэк ӧм улэ, соин ик скал но кыскыны, турнаськыны но быгатӥсько. Ой, кыӵе уг яратӥськы вал пастуханы ветлыны! Но ветлӥ. Ваньмыз та сямы вылын шӧдӥськиз, луоз — ачим но валатэк, отличник­лэн синдроменыз «висьыны» кутски. Татчыозь солэсь ӧй мозмытӥськы. Мон котьку малпасько: лэсьтоно ке — тыро-пыдо, котькуд вамышед понна ачид азьын кыл кутоно. Котырысь адямиослы, оло, со умой но, ачим понна — туж секыт. Аслым дыры уг кыльы ни.

Нош анай-атаелэн мылкыдзыя кариськи, эмъясь луи шуыса, ноку жаляме ӧвӧл. Нырысь дышетски Воткаысь медучилищеын. Сое горд дипломен йылпумъяй. Али но туж умой тодӥсько, кызьы одӥгзэ экзаменме «4»-лы сётӥ вал. Та понна анае-атае тышкаськизы. Мед­училище бере ужаны кутски Шаркан ёрос больницаын реанимациын эмъясь сузэр луыса.

Дуннелэн пӧртэм сэрегъёсаз шутэтскылэ.

Секунд-минутъёс

— Кыӵеен тодады кылизы ужаны кутскон вакытъёсты?

— Шокчыны маза ӧй вал. Медучилище бере огеныз эшеным ӵошен ужаны кутским, солэсь кылъёссэ али но тодӥсько: электровеник луыса весь ужаны уг малпаськы! Нялтас вераса, бӧрысь со медакадемиын дышетскиз, гажамон эмъясь луиз.

Тодон-валан басьтонме мед­академиын азинтӥ мон но. Дышетскыкум но ужамысь ӧй дугдылы. Дежурствоосы поталляй Ны­­ры­се­тӥ элькун больницае, Нылпи элькун больницае. Котьку —
реанимацие. Дежурствоысь жа­дьы­са бертӥськод но валась­код: дорысь ужез лэсьтоно, ды­шет­скы­­ны мыноно на. Мукет сямен уз луы — ачид сыӵе удысэз быр­йид: эмъясьлы одно зэмос профессионал луоно, тон кыл кутод адямиослэн улонзы понна.

Медакадемиез йыл­пумъяса, берен берытски Шаркан палъёсам. 16 ар ужай анестезиолог луыса, начмед вал. Городын сярысь, ёросын ужась анестезиологъёслэн мукетгес ужзы: соослы больницаысь вань отделениосы вуттӥськоно. Соос юртто али вордскись нуныослы но, арлыдоослы но. Ӵемысь ӧтчало нылпи ваён юртэ. Азьло ӧй вал на кылдытэмын сюрес вылын шуккиськон учыре шедемъёслы юрттэт сётӥсь центръёс — ваньзэс вуттылӥзы ёрос больницаосы. Одӥг пол ёросамы кышкыт авария луиз — 6 мурт отчы шедиз. 1-ез интыяз ик кулӥз. Нош 5-сэ вуттӥзы ми доры. Ваньзы егитэсь. Кесясько, ӝушто. Пӧлазы однокласснике но вылэм. Но ымнырыз нелькиськемен, соку ик ӧй но тодма. Ма, учкылыса но ӧй улы, кудӥз кин шуыса. Юрттоно! Кудзы кӧня ке чидалозы на — секундъёс-минутъёс куспын тае валаны турттӥськод. Туж шумпотымон, ваньзы улэп кылизы.

Котькуд эмъясьлэн тужгес бадӟым шудэз — йӧнатэм муртъёссэ тазаен, шудоен адӟон. Ӵемысь ульчаысен тау карыса дугдыто, куд-огзэ уд но тодмаськы ни. Сюлэм уката шумпотэ, будӥсь пиналъёсты адӟыса. Кылсярысь, пичи нылаш парсьёс бордысь паласькись пыэдэн черлам — искусственной амалэн шокатыса возим, элькун больницае келяно луиз вал. Табере со будӥз ини!

— Шаркан палъёслэсь мӧзмемды шӧдӥське на.

— Шуысалзы ке, берен отчы берытске — берытскысал, дыр. Но мукет ласянь, Дэри ёрос больницаын но 4 толэзь куспын сомында лэсьтӥм ни! Юасалзы ке, Шарканысь мае сьӧрам басьтысал, могатэк верасал: ӝог юрттэт сётонъя бригадаез. Отын зэмос профессионалъёс люкаськемын. Шарканэ кылизы мынам туж визьмо дышетӥсьёсы, бадӟым стажен эмъясьёс.

Ог 5 ар талэсь азьло Иже ипотекаен квартира басьтӥ вал — малы, ачим но соку ӧй вала. Нош табере со туж кулэ луиз. Коронавирусэн сэрен гостиница ӵектӥзы вал ке но, отчы ӧй мыны — огнам улӥсько. 7 часын мон ужын ни, ӝыт 9 часлэсь вазь уг кошкиськы. Куддыр уйлы но больницае ик кылисько.

Туж уг яратӥськы, мыным трос саклык висъяны кутско ке — дышемын ӧвӧл. Бен, али югдур таӵе бере, чидано луисько ини: ужаммы сярысь верало котькин но котькытын. Но таин валче мынам пушкам кышкан каръяськыны кутске: тонэ ушъяло ке, Инмар медаз сёты осконзэс быдэстытэк кельтыны.

— Жадён вакытъёсты но луыло, вылды?

— Яратӥсько дуннеез котыръяны. Вуылӥ ни Польшае, Францие, Испание но мукет кунъёсы. Но туэ палэнэ потаны уз кылды шуыса, валасько ни. Туж яратӥсько на сикетӥ калгыны — оскисько, Шаркан палъёсам губияны коть вуыло. Ӵемысь огнам шыпыт поръясько.

Туж яратӥсько лыдӟись­кы­ны, уката но Антон Чеховез. Яра огшоры, валамон кылыз, улонэз мур валамез понна. Со но эмъясь вал бере, оло, соин но матын потэ. Туж яратӥсько на дышетскыны. Ялан кыӵе ке курсъёсы ветлӥсько, али магистратураын юристлы дышетскисько. Тодэм-валам ноку нокинлы мултэс ӧй вал на.

________

Элина КУМАЧЁВА

Удмурт Дунне
By Удмурт Дунне 19 июня, 2020 14:09