Удмуртиын выплатаос бась­тӥзы 1 сюрс 899 эмъясьёс

Удмурт Дунне
By Удмурт Дунне 1 июня, 2020 15:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Суредаз Владимир Ижболдин

Инмарлы оскы, но ачид эн нырулы, шуиллям калыкын. Таӵе веранэз вылазы шӧдӥзы Россиысь коронавирусэн нюръяськись эмъясьёс.

Медикъёслы ватсаса коньдон тырон сярысь Президент Владимир Путин ивортӥз апрельлэн кутсконаз. Правительстволэн Тӧроез Михаил Мишустин 13-тӥ мае сюлмаськемзэ шараяз: эмъясьёслы выплатаос 27 миллиард манет чакламын, нош улосъёсын люкылэмын 4,5 миллиард манетэз гинэ. Кылемез 80 процентэз уксё эмъясьёслы ӧз вуы.

Та бӧрсьы эскерон машиналэн питранъёсыз золгес берганы кутскизы. Президент «Калык фронтысь» азьветлӥсьёсты мониторинг ортчытыны косӥз.
13-тӥ-14-тӥ майлы Президентэн сӥзем выплатаосты Россиысь 19 процентэз гинэ эмъясьёс басьтӥзы. Нош кыӵе сак чотало вылэм коньдонэз улосъёсысь минздравъёс! Ко­ронавирусэн нюръяськись эмъясьёслэсь ужамзэс Рязаньын нуналъёсын лыдъяло, нош Владимирын — минутъёсын. Соин котькытын пӧр­тэм лыдпусъёс-выплатаос по­тӥллям.

Россиысь «Калык фронлэн» 2-тӥ эскеронэз 18-тӥ мае йылпумъяськиз. Та дырлы 79 процентэз медикъёс ватсаса уждун басьтӥзы ни.

Удмуртиын выплатаос бась­тӥзы 1 сюрс 899 эмъясьёс. Федерал бюджетысь соослы вуиз 159 миллион манет — со чакламын Россиысь Правительстволэн 484 но 415 номеро постановлениосазы. Таӵе ватсэт тыриськиз Паласькись висёнъёсъя элькун больницаын, Дэри ёрос больницаын ужасьёслы. Озьы ик коньдон басьтыны быгатӥзы Ижысь 2, 7 но 8 номеро больницаос профильзэс воштэмзы бере. Со сяна, уксё тырозы Вот­каысь, Сарапулысь, Ижысь, Можгалась но Глазовысь «скоройысь» спецбригадаослы.

Эшшо ватсаса 36 миллион манет висъямын вал рес­публикалэн кисыысьтыз. Со коньдон тыриськиз сыӵе эмъясьёслы, кинъёс ӧз тупалэ Россиысь Правительстволэн постановлениоссы улэ. Кылсярысь, 2 арня карантинын ужаз Ижысь 1-тӥ больница. Татысь
79 ужасьёслы ватсэт тыризы. Соос пӧлын вал 19 врачъёс,
39 медсестраос, 10 санитаркаос но мукет 14 юрттӥськисьёс.

Озьы ке но эмъясьёслэн чиновникъёслы юанъёссы ӧз на быре. Кылсярысь, Глазовысь ог 100 медикъёс вуизы Минздравысь специалистъёсын но Следствиея комитетысь кивалтӥсьёсын пумиськонэ. Татын рос-прос кенешизы, кинлы но кыӵе выплатаос чакламын, валче сэрттӥзы-пертчизы споръяськон учыръёсты.

Уката трос юанъёссы «скоройын» ужасьёслэн. Таяз арняе пумиськон ортчиз Ижысь Ӝог юрттэт сётонъя станциын. Тазалыкез утёнъя министрлэн воштӥсез Никита Свирин пусйиз:

— Котькуд ужась быгатэ вазиськыны министерствое но, кивалтӥсьёслы но. Котькуд учырез тыро-пыдо эскером.

Ӝог юрттэт сётонъя станцилэн кивалтӥсез Олег Прузан ивортӥз, «скоройысь» ужасьёслы асьсэ учреждениысьтызы коньдон висъялозы шуыса. Уго тросэзлы ӝог юрттэт сётӥсьёслы уз тыриське федерал постановлениосын юнматэм выплатаос.

Та дыре Удмуртиысь Следствиея управлениын эскеро ватсэт тырымтэ сярысь иворез, сое шараязы вал вотэсын. Ужрад ӧз на йылпумъяськы. Следствиея управленилэн ки­валтӥсез Рустам Тугушев Правительствоын радъяськем кенешонын ивортӥз:

— Ваньмыз ик эмъясьёс валаса ӧз вуттэ, кыӵе учырын тыриське уждунзы борды ватсэт. Соин ик ивор сётон ужез ӟечгес радъяно. Вылаз ик, вань ини югдурез зуркатыны, калыклэн ӟырдам мылкыдыз вылын шудыны вырисьёс.

________

Елена СКВОРЦОВА

Удмурт Дунне
By Удмурт Дунне 1 июня, 2020 15:50 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<