«Уг» шуыны уг быгаты

Удмурт Дунне
By Удмурт Дунне 23 июня, 2020 08:57
Надежда Вахрушева — Якшур-Бӧдья ёросысь Выжойылысь фельдшер
Туспуктӥз Элина Кумачёва

Надежда Вахрушева Якшур-Бӧдья ёросысь Выжойылэ фельдшер луыса ужаны лыктӥз 21 аресказ. Табере 43 арзэ ни со гуртоослэсь тазалыксэс уте.

Красногорск ёросысь Тура гуртын вордскем нылаш йылпумъяз Ижысь медучилищеез.

Выжойылэ егит фельдшер направлениея вуиз 1977-тӥ арын. Со дырысен татысь котькуд семьяез пыр-поч тодэ ини. Соку вордскем пиналъёс табере асьсэос кемалась анай-атай луэмын, со вакытысь мумы-бубыос — кӧня ке полэс песянай-песятайёс ни. Паймоно кадь: Надежда Анатольевна гуртысь котькуд адямилэсь атай нимзэ но тодэ — ваньзы шоры озьы гажаса вазиське.

— Гуртамы та вакытэ 203 улӥсез, со пӧлысь 39-эз — нылпиос, 6-ез — 2 аресозь, — шуэ Надежда Анатольевна. — Улыны лыктӥсьёс но вань. Куд-огез берытске, пенсие потыса. Егит семьяос анай капиталэн корка басьто. Калыкмы татын туж зӥбыт. Огвакытэ картэлы, ПМК-ын ужакуз, ёрос центре квартира сёто вал. Мынам Выжойылысь кошкеме ӧз поты, озьы асьмеос корка пуктӥм.

Надежда Вахрушева эмъян удыслэсь котькыӵе вакытъёссэ адӟылӥз ни. 1990-тӥ аръёсы со воксё куашкан калэ вуылӥз — шуккиськем интыосты биняны бинтъёс гинэ но ӧй вал. Нош совето вакытъёсты со туж шунытэн тодаз вае, соку но капчи ӧй вал ке но.

— Гуртамы «скорой» пыраны ӵемысь уг быгаты вал, — шуэ со. — Толалтэзэ сюресъёсы букосъёс пуксьылӥзы, тулыс-сӥзьылзэ зор-котэн пырантэм-потантэм луылӥзы. Соин ик шуге-леке вуэмъёсты ёрос больницае нуыны колхозысь грузовой машина куриськом вал. Мон соосты келяса ветлылӥ.

Надежда Вахрушева тодэ ваемъя, тросэз секытэн нылкышноос вазь ӵукна пинал вайыны кутско вал. Озьы 4-5 часын ӵукна машина утчано луылӥз. Огвакытэ картэз молоковозын ужаз — со келяса кельтылӥз ини. Нош одӥг пол машина шедьтыса ӧз вуттэ, нуны вордскиз. Фельдшер али пайме: кызьы, пе, ӧй куалекты, эшшо ик гуртын тыл ӧй вал.

Надежда Анатольевна 3 ФАП-ын ужаса вуттӥз ни. Лыктӥз ай воксё вуж медпунктэ — 2 квартираем колхоз коркан интыяськемын вал. Собере вӧл-вӧл 5 борддорен юртэ выжтӥзы. Нош со ӝуаны шедиз. 1997-тӥ арын нош ик выль инты сётӥзы: юртлэн огпалаз контора, мукет палаз медпункт. Со дырысен татын номыр ӧз воштӥськы. ФАП шорын, кылсярысь, йӧн-йӧн сылэ гур. Толалтэ соин шунтӥсько. Гурез ӵемысь санитарка эстэ, но куддыр фельдшерлы но та уж усе.

Юрт вужмиз ни ке но, Надежда Анатольевна сое чылкыт, шулдыр возьыны выре. Одӥг аре депутатъёс 2 сюрс манет висъязы, со уксёен вӧлдэтэз буяз, обой басьтыса лякылӥз. Вуж пуконъёс чильпам-керттэм шобретъёсын валемын — таоссэ, пе, гуртысь песянайёс кузьмазы, медпунктазы шулдыр мед луоз шуыса.

— Но туж оскисько, куке но гуртамы выль ФАП пуктозы шуыса, — пусъе Надежда Вахрушева. — Туэ ик лэсьтом ни шуизы вал, но уж ӝеганы быгатоз, пе, соин ик толалтэлы нош ик пу вайизы на.

Нош ачиз Надежда Анатольевна кылем арысен пенсие кошкиз ни вал — тырмоз, малпаз. Озьы ӝыны арлэсь ятыргес дораз пукиз, нунокъёссэ учкиз — 1 нылыз но 2 пиез 7 внук кузьмазы ни. Но сюлмыз вӧсь луыса учкылӥз гурт калыкез шоры: укол пуктыны, анализ сётыны, справка басьтыны гинэ но ёрос больницае ветлоно луылӥзы.

— Выль фельдшер ӧз шедьы но, выльысь монэ потыны куризы, — азинтэ веранзэ Надежда Вахрушева. — Туэ декабрёзь сертификатэ вань на бере, пумит ӧй кариськы. Ужаме потыса, выльысь потӥ. Кошкыкум но шумпотыса ӧй кошкы вал, угось мукет интыын асме адӟыны дышымтэ.

Ма, ужамысь дугдылыкуз но, гуртысь фельдшер доры юрттэт курыса вазиськисьёс ӧз бырылэ. Надежда Анатольевна нокинлы «уг» ӧз шуылы. Табере тани нош ик быдэсак ужаз выйиз. Эшшо ке коронавирус аляз на, соин уката сак кариськоно луиз. Гуртазы вань вахта амалэн ужасьёс, палэнысь вуисьёс — фельдшер соослы дырын-дырын жингыръя, тазалыксы сярысь юалляське.

— Медпунктэ ветлӥсьёс али трос ӧвӧл, — шуэ фельдшер. — Ачим но ӵемысь гурт кузя ветлӥсько. Висьыны усемъёслы верасько, ачим дӥнязы вуо шуыса. Толэзяз 2 пол ветлӥсько вож нуныос доры. Чакласько арлыдоосмес но. Гуртамы вань на ожысь ветеранмы. Арлыдыз шоры учкытэк, ялан ужаны выре на, муш вордэ. Алигес турнаськыны потэм но, сюлэмыз шуг луэм.

Гуртэ кылем арын терапевт кварталлы быдэ вуылӥз — фельдшерлы капчигес вал. Нош туэ ёрос больницаысь специалистъёс, педиатр сяна, ӧз адӟиськылэ на. Март пумын колёсаос вылын ворттылӥсь эмъян центрез возьмазы — калык диспансеризациез тыро-пыдо ортчысал. Но коронавирус малпанъёсты уретӥз. Соин ик гуртысь фельдшер али кыштыр огназ ужа. Гуртоос шуо: милям со терапевтэз но, мукет специалистъёсты но воштэ, котькыӵе сюлмаськонэн дораз мын — шуныт кылыныз гинэ но юрттоз.

________

Элина КУМАЧЁВА

Удмурт Дунне
By Удмурт Дунне 23 июня, 2020 08:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<