Тон дуно аслыд ачид. Кызьы дуннелы усьтӥськоно?

Удмурт Дунне
By Удмурт Дунне 29 июня, 2020 13:25
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Психолог, гештальт-терапевт Марина ТИХОНОВА

Туала вакытэ улон туж ӝог воштӥське. Нуналлы быдэ уже дыртыса, корка котырын бергаса, ӵемысь вунэтоно ачид сярысь. Кин мон сыӵе? Мар мыным кельше? Малы туала вакытэ астэ шӧдыны но дунъяны кулэ? Та сярысь вераськиськом психологен, гештальт-терапевтэн Марина ТИХОНОВАЕН.

— Марина, кыӵе шуг-секытъёсын ӵемысь вазиськыло адямиос?

— Адями психолог доры лыктэ, курадӟе ке, ужезлэсь, улонэзлэсь шумпотон уг басьты ке яке нылпиосыныз огкыл шедьтыны уг быгаты, соосты зол яратэ ке но. Кышномуртъёс ӵемысь ӝожтӥсько, семьяязы керетонъёс, валамтэос кылдо шуыса. Соос корказэс но чылкыт возьыны туртто кадь, тусьты-пуньы мисько, сиён пӧрало, нылпиоссэс но учко… Но ӵемысь та ужез соос мылзы потытэк лэсьто, уго малпало: коркаез утялтыны но нылпиосты будэтыны кышномурт кулэ. Соос асьсэос озьы будэтэмын. Но улон воштӥське, туала вакытэ кышномурт но уксё поттэ ни, пыриське общественной улонэ, куддыръя, гуртаз бертыса, солэн ӟигарыз ик уг тырмы ни юртъер котыраз берганы. Но сиён уг пӧра, уг утялскы ке, ассэ виноватэн шӧдэ.

Со сяна, нылкышноос ӝожтӥсько на, картъёссы тыршемзэс уг адӟо, уг дунъяло шуыса. Татын валаны кулэ, кышномурт но пиосмурт пӧртэмесь шуыса. Кышномурт буйга, шуг-секытсэ вера ке, сое кылзӥськыны гинэ кулэ, нош воргоронлы шугъяськонзэ одно ик сэрттоно-пертчоно, со понна мар ке лэсьтоно. Та пӧртэмлыкъёсмы сярысь тодыса, кусып тупатыны капчиенгес луэ.

Туала вакытэ туж кулэ ог-огеныд вераськон. Шуом, куспады кенешыны, кин мар понна туннэ кыл кутоз: кин сиён пӧралоз, тусьты-пуньы миськоз, нылпиосты школа-садэ нуллоз но мукет. Уж котьку трос, ваньзэ лэсьтыса вуттоно ӧвӧл. Татын нош ик вераськыны умой луоз. Кӧня ужез мон дась али быдэстыны? Зэм но-а али ик кулэ
чылк-чылк миськем тусьты-пуньы яке ӵош шутэтсконо-а? Нош огкыл шедьтыны уг луы ке, мон малпасько, нырысь ик ачид сярысь сюлмаськыны кулэ.

Туала дыръя кышноен картъёс азьвыл мында уг жугисько ке но (яке сыӵеосыз уг лыкто психолог доры), вань трос мукет сюлмаськонъёс. Кылсярысь, куке одӥг адями мукетызлэсь мылкыдзэ зӥбыса возе. Шуом, кышно картэзлы ӵемысь шуылэ: тон небыльток, номыр уд лэсьтӥськы, уксё ӧжыт поттӥськод, нылпиослы уд юрттӥськиськы но мукет. Озьы адями пумен ассэ дунъямысь, аслыз ачиз оскемысь дугдэ, кышканы кутске, собере депрессие усьыны быгатэ. Таӵе вакытэ тонэ валась адямиосын вераськоно, «уг» шуыны дышетсконо, мылкыдэз ӝутӥсь книгаос лыдӟоно, котыр дуннедэ паськытатоно. Ӵемысь уго озьы луэ: адями, кузпалэныз сяна, нокинэн кусып уг возьы, уг эшъяськы ни.  

— Тросэз адямиос ултӥян улэ шедё, куддыръя быдэс улонзэс озьы ик чидаса уло.  Малы адями уг мозмытскы зӥбетлэсь?  

— Котькуд адямилэн вань аслаз дуннеез, отчы со кинэ ке лэзе, кинэ ке уг. Адями ассэ валаса улэ ке, «о-о» но «уг» шуыны быгатэ, аслаз улонэныз кивалтэ, со вакытэ ик мукет адямилэсь но малпанъёссэ, мылкыдъёссэ гажа. Кин зӥбонлы сётске, таӵе адямилэн сямыз ляб, сюлэмыз небыт, солы «уг» шуыны секыт, аслыз осконэз ӧжыт, пушказ умоез но, уродэз но ганяк пыро.
Со мукетъёсызлэсь кылзӥське, кивалтонлы сётске.

Адямиос эрикогес луысалзы ке, куштӥськысалзы ке кышкан сямзылэсь, туж трос лэсьтыны быгатысалзы.
Туспуктӥз Мария Векшина

Ваньмыз потэ семья бордысь. Адями пичи дырысеныз ӧз тодылы ке, мар со яратон, ог-огдэ валан, солэн сямыз ӵемысь ляб луэ. Пичи дыръямы ми ваньзэ матысь адямиослэсь пыӵатӥськом. Кызьы анай-атай асьсэзыз возизы, нылпи но ӵемысь озьы азьланяз улоз. Бадӟым будыса но, со кузпалэныз ассэ анай-атаеныз кадь возёз. Сыӵе веран но вань ук: пиосмурт кышно вае мамаез кадьзэ. 

Психолог доры вуо сыӵе дыръя, куке, огласянь, адямилэн ваньмыз вань кадь: семьяез, ӟеч ужез, уксёез, но со ассэ шудоен уг лыдъя. Кемалась ик ӧвӧл дорам бухгалтер вуылӥз. Быдэс улонзэ ни со 3-4 ужын тырше, но берло дыре ӵем висьылыны кутскем. Вераськыны кутским но валам: бухгалтер солэн ноку но луэмез уг поты вылэм. Ужезлэсь солэн ӧскемез потэ ни — зэмзэ но вукекъяське. Но со ужзэ ваньзылэсь умой лэсьтэ. Вераськыса-вераськыса мырдэм валамон луэ, со дизайнэн вырыны, суредаськыны яратэ шуыса. 

— Таӵе дыръя ужез воштоно?

— Адямилы валано: кин мон, кыӵе мон? Тросэз зэмзэ но уг тодо, кыӵеесь соос. Юаськод ке, верало, кыӵеен соосты адӟо мукетъёсыз. Куд-ог дыръя анай-атайёс нылпиоссылы вералляло: тон небыльток, пеляд гондыр лёгиськем, кукыд
кожой но мукет. Озьы пинал ачиз шоры анай-атаезлэн верамез пыр учкыны кутске. Со синучконлы но, мукет адямиослы но уг оскы ни. Ми дышетӥськом адямиез ассэ адӟыны сыӵеен, кыӵе со зэмзэ но вань. Висъяськом солэсь зол но ляб палъёссэ.

Куке адями вала, мар солы зэмзэ но кельше, мае со быгатэ, вань-а солэн кужымез улонзэ воштыны, соку со быръе, кыӵе сюрестӥ вамыштоз: кылёз-а та ужын яке кошкоз, яке висказ аслыз кельшись ужен вырыны кутскоз.

— Кин чутрак улонзэ воштыны быгатэ, со эрико, дыр… 

— Кин ке чаляк воштӥсь-конъёслы дась, кин ке кема малпаське. Эриклы астэ дышетыны кулэ. Нылпи-
осты ӵемысь пачкатыса возё, тужгес но со шӧдӥське вал
совето вакытъёсы. Кыӵе тыныд сиён понӥзы, одно ик сое сиёно, эшшо пумозяз быдтоно на. Мае косӥзы, сое ик лэсьтоно, дышетсконо «витьлы» гинэ… Нылпи весь сыӵе косон-куронъёс пӧлын будэ. Быдэ вуыса но котырысьтыз адямиослэсь возьма, мар карыны косозы. Со уг шӧды ни ассэ, уг вала, кызьы улэмез потэ. Вань сыӵе серемес веран. Анаез пиезлы шуэ: «Ваня, пыр доре!» Пиез пырыса юа: «Мама, мон кынми-а?» — «Ӧд, тынад сиемед потэ». 

Совето вакытэ будэмъёс туала улонлы секытэнгес дышо. Уго соос будэтэмын одӥг сямен, нош ужало но уло мукетызъя. Со сяна, та адямиослэн нылпиоссы асьсэзыз эрикогес возё, уго будэмын ни воштӥськон вакытъёсы — анай-атайёслы та уг кельшы. 

Улонлэсь, матысь адямиосын вераськемлэсь шумпотон басьтӥськод ке, шудо луиськод. Кыӵе ке куронъёсъя улӥськод ке, йырад весь юан кылдэ: шонер-а мон лэсьтӥсько, шорам кырыж уз учке-а? Тон аслыд ачид уд оскиськы, соин ик мукетъёсызлэсь кылзӥськиськод. Нош пушкад аслад но мукетъёсызлэн малпанъёссы ваче вуо ке, секыт луэ. Соин ик тон нырысь ик аслыд ачид дуно луыны кулэ.

Адямиос эрикогес луысалзы ке, куштӥськысалзы ке кышкан сямзылэсь, туж трос лэсьтыны быгатысалзы. Тани уноез уксё потто, яратоно уженызы вырыса: кин ке торт пыже, кин ке киужен выре, бизнес малпа. Кибашлыос, быгатӥсь адямиос пӧламы трос, но соосты мар ке но дугдытэ дуннелы усьтӥськыны. 

Мылкыдзэ зӥбо ке, адями:

  • кылъёссэ бырйыса вераське, матысь адямиезлэн йырыз кур медаз луы шуыса;
  • аслыз уг оскы, уго солы ӵем шуыло: «озьы ӧй вал», «тон озьы ӧд вералля», «тон ваньзэ шонертэм валад»;
  • вӧсь карись кылъёсты сюлэмаз мур басьтэ;
  • кайгыре, уго матысь адямиез вормонъёссэ уг адӟы, нош пӧрмымтэ ужез понна янгыше уськытэ, аламаез сярысь ӵем тодаз вайытылэ;
  • малпаськылэ аслаз выросъёсыз сярысь: мар мон кари, кызьы югдурез тупатоно, уго матысь адямиез ассэ я кезьыт возе — уг вераськылы, адӟем уг кары, я ортчыт яратэмзэ возьматэ.

________

Мария Векшина

Удмурт Дунне
By Удмурт Дунне 29 июня, 2020 13:25 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<