Сюмси ёросысь Ӟатча: 4 коркан ужаны бродитьто на

Удмурт Дунне
By Удмурт Дунне 17 июня, 2020 12:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Сюмси ёросысь Гура муниципал кылдытэт одӥгез кыдёкысез луэ. Ёрос центрысен Гура черкогуртозь 30 иськем. Муниципал кылдытэтэ 12 гурт пыре, 10 гуртын 50-лэсь но ичи улӥсез. Пӧлысьтызы одӥгез — Ӟатча.

Гуртысь ульча.
«Зятцы» огинлэн «Одноклассники» бамысьтыз

Матюшлэн топольёсыз

Гуртын вашкала топольёс будо. Соосты, пе, ас вакытаз мерттӥллям Федосья Петровна Ермолаева но Матвей Лукъянович Крякушкин. Та воргоронэз гуртоос Матюш песятай шуылӥллям, бӧрысь солэн семьяез Сюмси черкогуртэ улыны выжем, нош Пролетарской но Бородинской пролкаос вожын сылӥсь коркаяз колхозэ ужаны лыктӥсьёс улылӥллям. Мерттэм писпуоссэ гуртоос туннэ но Матюшлэн тополь-
ёсыз шуо.

Вашкала дырысен гуртъёс кылдылӥзы шуръёс котыре, нош татын одӥг шурзы но ӧвӧл, со понна ошмесъёссы трос. Вузы ӵыпетэ люкаське. Нырысь сое Максим ты шуылӥллям, нош бӧрысь Ӟазег ӵыпет нималлям. Ачиз гурт интыяськемын бамалэ, соин гуртоос выллапалъёслы но уллапалъёслы люкисько. Гурт шорын вылэм магазин, колхоз контора, медпункт, школа.

— Документъёсты учкыса потоно ке, Ӟатча гурт сярысь нырысь гожтэмъёс 1859-тӥ арын шедьтэмын, соку гуртлэн нимыз Ӟатча-Шудзы вылэм, 15 юртын 126 адями улэм, — шуэ та гуртын вордскем но али Сюмси черкогуртын улӥсь Елена Ермолаева. — Вукозы но вылэм. 1891-тӥ арын гуртмы Ӟатча ёрос центрен лыдъяськылэм. 1903-тӥ арын школаын 51 пинал дышетскем. Ас вакытаз ёросысь тужгес кужмо колхозэн лыдъяськылэм, нимыз гинэ вошъяськылэм: «Рассвет», «Маяк». Гуртын сир бичанзы но вылэм.

Гуртлэсь нуналзэ пусйыку.
«Зятцы» огинлэн «Одноклассники» бамысьтыз

Елена Николаевна шумпотыса тодаз вайиз 1950-тӥ-1960-тӥ аръёсыз. Гуртазы 50 пала корказы вылэм, школа, магазин, кебит, пилорама, скал, ыж но вал гидъёс, гаражъёс, муш пасека. Школаын, пе, мамаез Римма Алексеевна Ермолаева дышетэм. Одӥг кабинетын 3 классысь пиналъёс тодон-валан люкаллям, котькуд класс нимаз рядын пукем. Гурт шорын 2 этажъем юртсы вылэм: колхоз контора (вылӥяз), библиотека но медпункт (улӥяз). Колхозэн кивалтӥсьсэс — Андрей Григорьевич Касихинэз — гуртоос туннэ но шуныт кылъёсын тодазы ваё. 1970-тӥ аръёсы Ӟатчаысь хозяйство ёросын азьветлӥсьёс пӧлын вал. Вазен ик татын пичи пу фермаоссэс кирпич комплекс-
лы воштӥллям. Ваньмон
дырзэс но гуртоос пайдаё ортчытъяллям: клубазы кино учкиллям, агитбригадаосын сьӧр гуртъёстӥ концертъёс пуктыса ветлӥллям.

Ӟатчаын нырысь тросгес улӥллям ӟучъёс, нош котырысьтыз пичи гуртъёсын — удмуртъёс. Пичи гуртъёс быриллям, отысь тросэз адямиос Ӟатчае улыны выжиллям, озьы гурт удмуртомем.

Матюшлэн вашкала топольёсыз.
«Зятцы» огинлэн «Одноклассники» бамысьтыз

7 кузя

Гура муниципал кылдытэтысь валтӥсь специалист Людмила Кутявина ивортэмъя, та вакытэ гуртын 7 улӥсез: 4 пенсионеръёс, 1 инвалид но 45-49 аресъем кузпалъёс.

— Кин тодэ, оло, туннэ гуртмы быремын луысал ни, 1990-тӥ аръёсы вордскем палъёсазы Казахстанысь Старковъёс ӧй вуысалзы ке, — шуэ Александра Ермолаева. — Татын Пасынковъёс но Ермолаевъёс кема уло ни, Николай Чеков алигес вуиз. Гужемзэ гуртын шулдыр, юртъер котырын ужаны бродитьтӥськомы (выриськомы), толалтэзэ мӧзмытгес луэ.

Александра Васильевналы 64 арес, вордӥськемын артысь Сьӧлта ёросын. 1974-тӥ арын татысь колхозэ скал кыскыны лыктэм но татчы ик бызем.

— Гуртмы бадӟым вал ай соку: 30-лэсь трос корка, котькуд коркан 3-4 нылпиос, — веранзэ азьланьтэ Александра Васильевна. — Тросэз семьяос пудо вордӥзы, скалъёс гинэ 32 лыдъяськылӥзы, ыжъёсты но нимаз уллёен пастухе поттазы. Аръёс ортчемъя калык гуртысь кошкиз, нош милям нокытчы кошкеммы уг поты, ӟигармы вань дыръя татын ик уломы ай. Гуртмы ышыг интыын, палэнысь адямиос уг ветло.

Татын ик вордскемын но быдэ вуэмын 49 аресъем лесник Александр Крякушкин. Та вакытэ Гура черкогуртын улэ, быгатэмезъя вордскем палъ-ёсаз бертылыны тырше. Школаын дышетскон вакытаз, пе, гуртазы 11 корка вылэм ай, тодон-валан люканы Гураысь школае ветлӥллям.

Пудо вордо на.
«Зятцы» огинлэн «Одноклассники» бамысьтыз

Вольыт сюрес, югыт ульча…

Гураысен Ӟатчаозь 4 но ӝыны иськем пала люкаське. Муниципал кылдытэт сюресэз толбыт сузяса возе. Гуртазы 4 корка гинэ ке но, толалтэ ульчаязы тыл ӝуа. Пусйыны кулэ созэ но: ульчаысьтызы телефонзы гинэ но умой ужа. Гуртоос дышемын ни, кытын ке марзы ке тӥяське яке ужамысь дугдэ ке, соку ик муниципал кылдытэтэ жингырто. Ульчаязы вазенгес 3 колонказы вылэм. Али соос ӧвӧл ни. Александра Ермолаева толалтэзэ башняысь флягаен ву нуллэ, нош гужем ву сярысь пиез сюлмаське — капка азяз вуэн тырмытэм бекче пуктэ. Татьяна Пасынковалэн азбараз колодчаез вань.

Пасынковъёс но Ермолаева доры арняяз 2 пол юрттӥськыны ветлэ Гураысь социальной ужась Елена Лебедева. Юрт котырын юрттӥськем сяна, нылкышноосты куд-ог дыръя Гурае басьяськыны но нуллэ, кулэ дыръяз аптекаысь эмъюм но вае. Магазинзы ӧвӧл, толэзьлы одӥг пол, арлыдоослы пенсия сётон нуналэ, татчы автомагазин ветлэ. Соку ини гуртоос басьясько: сиён-юон но, дӥськут но, пудозылы мешокен фураж но.

Ваньмон дыръязы телевизор учко, жаляса верано, удмурт передачаосты учкемзы уг луы — Кировысь иворъёсты адӟо. Сотовой телефонзы но интыен-интыен гинэ кутэ.

Пичи гуртын вордскемъёс дор палъёссэс уг вунэто. Арлы быдэ Тройча нуналэ шулдыр пумиськон радъяло. Вань соослэн дано адямиоссы но: профессор, гурт удыс наукаосъя доктор Александр Михайлович Ленточкин но Россиысь дано дышетӥсь Валентина Васильевна Селезнёва.

________

Валентина Емельянова

Удмурт Дунне
By Удмурт Дунне 17 июня, 2020 12:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<