Пӧртэмесь но мусоесь Альфа, Керри, Зидан но Жеся

Удмурт Дунне
By Удмурт Дунне 22 июня, 2020 09:07

Шаерысьтымы тылпулэсь утиськонъя нимысьтыз частьын старшой инструктор-спасатель (кинолог) луыса ужа Ольга ГОНЧАРОВА. Пуныосыныз ӵош пӧртэм ӵошатсконъёсы, секыт югдуре шедем муртъёс­ты утчанэ пыриськылэ. 2019-тӥ арын Приволжск федерал округ­ысь устоез кинолог луиз.

Ижысь кинолог О. Гончарова.

Куассэ воштӥз пунылы

Можга городын будэм нылашлэн анаез «Элеконд» заводын ужаз, атаез берло аръёссэ тылпулэсь утиськонъя частьын тыршиз, нош ваньмон дыръяз пуныосын пӧйшураны ветлылӥз. Атаез сьӧры Оля но куриськылӥз, но сике сое ӧз нуллэ. Школаын дышетскыкуз нылаш туж шаплы вал: вань ужрадъёсы, КВН-ёсы мыло-кыдо пыриськылӥз, куасэн бызьылонъя спортъя мастере кандидат луиз. Предметъёсъя олимпиадаосы ветлылӥз, школаез азвесь медален йылпумъяз. Егит нылаш малпа вал спортэн эшъяськонзэ азинтыны яке югдурез утись луыны. Одӥг нуналэ малпанъёсыз чутрак воштӥськизы.

11-тӥ классын дышетскыкуз, ОБЖ предметъя элькун олимпиадае ветлэм, 71 балл пӧлысь 71-зэ люкам. Вормись ӧз луы ке но, нылашез соку синйылтӥллям Удмурт кун университетысь Гражданской защитая институтысь специалистъёс, асьсэ доры дышетскыны ӧтиллям. Экзаменъёс, пе, сётоно уд луы.

— Студент аръёсы туж шулдыр ортчизы. Удмурт кун университетын 1-тӥ но 2-тӥ курсъёсын дышетскись пиосмы спасательёслэн командаязы пырисько вал, — шуэ Ольга Гончарова. — Соос Россиысь ӵошатсконъёсы но ветлылӥзы. Одӥг полаз бер­тӥзы но кинологъёс сярысь трос-трос веразы. Шонерзэ ке, соку мон нырысьсэ кылӥ кинолог сярысь.

3-тӥ курсысен Ольга тодматскем утчанъя-утёнъя службаын ужась кинологен, вӧзаз но ужаса оскалтэм. Со дырысен кинолог луон сярысь малпанзэ вошъямтэ ни.

Бадӟым курсъёсын дышетскыкуз, синмаськиз немецкой овчаркаослы. Дышетсконзэ йылпумъяса, кучапи басьтӥз. Квартираын ныл эшъёсыныз улӥзы ке но, кучапи нокинлы мултэс ӧз поты.

— Эшъёсы кучапиме нуныяса возизы, одӥг валес вылын кӧламы, — серекъяса вера Ольга Петровна. — Али пуныме валес вылэ тубаны ӧй лэзьысал ни. Нуналаз 4-5 час ульчаетӥ поръяськомы вал, со пуные али но улэп, анай-атае дорын Можгаын улэ.

Ольга Гончарова верамъя, пуныосыз вордскем беразы ик дышетыны кулэ. Бадӟымъёсыз дышетонлы, пе, секытэн сётско.

— Немецкой выжыысь пуныослы синмаськемын ке но, дышетоно пуныосмы пӧлын одӥг лабрадормы вань, — шуэ старшой инструктор-спасатель. — Сое но гажасько, но таиныз огкыл шедьтэ спасатель Иван Гурьянов.

Эшъёсыз.

Куашкам юртэ но, сике но

Ольга Гончарова кинолог луыса ужаны кутскиз 2009-тӥ арын. Со дырысен пуныослэсь одӥг нуналлы но ӧз люкиськылы ни. Ижысь Удмуртской ульчаысь корка пуштон дыръя но солэн пуныосыз адямиосты утчаны юрттӥзы.

— Коронавирусэн сэрен дорын пукыны кулэ вал кадь, нош нюлэскы йыромем адямиос, кылем арын сярысь, тросгес луэмын, — шуэ кинолог. — Туэ гинэ адямиосты утчаны 7 пол потамы. Ваньзы улэпкын шедизы. Ӵемгес ышо арлыдоос.

Ольга Гончаровалэн пуныосыз дышетэмын куашкам, пуштэм юртъёсысь пачкам муртъёсты утчаны. Араз ичизэ 20 пол адямиосты утчаны потало. Удмуртиын кылдэм кышкыт учыръёсы сяна, бускель улосъёсы но юрттӥськыны потаны дасесь. Кинолог верамъя, бадӟым сикысь адямиосты утчаны секытгес, куашкам бервылысь сярысь. Ӵем дыръя ышем муртлэсь кудпала кошкемзэ нокин вераны уг быгаты яке ӵыжы-выжыосыз юрттэтлы, 3 но солэсь трос нунал ортчыса гинэ, вазисько.

— Ӵем дыръя адямиос милемлы ваё ышем муртлэсь дӥсь­кутсэ, — шуэ кинолог. — Но сыӵе амалъя ужаны луэ пӧсь пытьыя гинэ, тодоно на адямилэсь ку но кытчы мынэмзэ. Нунал ортчемын ни ке, пытьы тӧл­ӟе. Спасательёс сяна, ышем муртэ утчало югдурез утисьёс, волонтёръёс. Туала технологиосты но ужамы кутыны тыршиськомы: геотрекер навигаторъёсты но электроошейникъёсты.

Спасательёс

Приволжск федерал округын ортчем огаз ӵошатсконын Ольга тодматскем Казаньысь спасатель-кинологен. Со вакытэ кинологъёс ӧжыт вал бере, ужан но пуныосты дышетон амалъёсынызы ог-огзэс тодматъязы. Одӥг полаз егит пияш Олялы шуэм: «30 арес тырмиз ке, кышно басьто». Со шоры удмурт нылаш соку паймыса учкем, нош 5 ар ортчыса, пияш кураны лыктэм. Озьы Ольга 30 аресаз спасательлы Илья Гончаровлы бызиз. Нош солэн Казаньын улӥсь анай-атаез Россиысь нырысетӥосыз кинологъёс, пе, луо. Табере Гончаров кузпалъёслэн 2 пиналъёс­сы будо, пизы асьсэ выжые мынэм, лэся, пуныостэк улэмез уг луы, нош нылзы бадӟым пуныослэсь кышка, со вакытэ ик муртъёслэсь пичи пуныоссэс адӟе ке, соосты нуныяны, вешаны дась.

Лӧптэмъёс

Та вакытэ Ольга Гончаровалэн 4 пуныосыз, ваньзы соос Ижысь тылпулэсь утиськонъя нимысьтыз частьын уло. Альфа но Керри штатын ужасьёс лыдъ­ясько, нош Зидан но Жеся — аслаз пуныосыз, ваньзы соос аттестовать каремын. Со сяна, Ольга Петровна борды юнматэмын на 15 волонтёръ­ёс. Пуны­осынызы ӵош соос но ышем адямиосты утчанэ пыриськыло.

Тылпулэсь утиськонъя нимысьтыз часте ветлон нуналам кинологъёс парке мыныны дасяськемын вал. Кинолог пуныоссэ бадӟым вольерысь эркын бызьылыны лэзиз. Эн, пе, кышкалэ, соос тӥледыз уз йӧтылэ. Альфа, Зидан но Жеся немецкой овчаркаос лапыр гинэ бызьыло, нош Керри лабрадор асфальт вылысь вуын жомбылляське — ваньзы пичи пиналъёс кадь шумпотэмын. Кинологлэсь куаразэ гинэ кыло, монэ уг но адӟо, кожалод. Пуныос ог 10 минут эрикын бызьылӥзы. Собере одӥгзэ пуныез берен вольераз пытсазы, нош мукетъёсыныз парке кошкизы. Малы ваньзэ ӧз басьтэ? Машинаын интыез ӧй вал ни. Машинае соос мынӥзы строен, кузёзылэсь верамзэ сак кылзыса.

Ольга Гончарова пуныосын ужаны дышемын ни, соос­ты, пе, нылпиосты сярысь, дышетыны капчигес. Кинолог нуналаз ичизэ 4 час пуны­осын ветлэ, котькудӥз шоры, пе, валаса вазёно. Учкемед я куараед ӧз кельшы ке, азяд ланьыртӥськозы но нокытчы уз мынэ ни. Кылсярысь, Жеся нуныямез яратэ, нош Альфаен, пе, чурыт вераськоно.

________

Валентина ЕМЕЛЬЯНОВА

Удмурт Дунне
By Удмурт Дунне 22 июня, 2020 09:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<