Пикаль кышно Насьта но Чебер Гирыш

Удмурт Дунне
By Удмурт Дунне 19 июня, 2020 17:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Насьта бабуэ (А. Шингаркина) Лёнька но Гирыш пиосыныз, 1945-тӥ ар котырын.

Пересь атае Михаил Кузьмич Шингаркин вордскемын Кизнер ёросысь Синяр-Бӧдья гуртын 1913-тӥ арын. Пикальлэн — озьы нимазы воргоронэз гуртын — выжыосыз али но татын уло.

Ленинградысь из

Прадедэлэн нимыз Кузьма вылэм, нош прабабушлэсь нимзэ тодӥсь ӧвӧл ни. Солэн ныл йырыз Выль Пизнер гуртысь вылэм, соин гуртын сое Вильпизнэр гинэ шуо вылэм. Соослэн яратоно Миша пизы вордӥськем. Сое Микаль, собере воксё Пикаль гинэ шуиллям. Пикальлэн вылӥллям на Авдотья но Нина сузэръёсыз. Авдотья ноку бызьымтэ, весь ляльчи кадь ужаса улэм. Шурысь ву бадӟымесь вышкыосын, пе, валэн нуллэм парсь фермае. Толалтэ дӥськутэз вылаз кынме вал, пе. Нош Нина бызем Выль Трык гуртэ, но нылпиосыз вылымтэ. Озьыен, ми гинэ на, Пикальлэн пиезлэн Григорий Михайловичлэн нылъёсыз: Надежда, Вера но Люба — пересь атаймылэсь выжызэ азьланьтӥськом.

Дыр ортчемъя Пикаль йыг-йыг воргорон луэм. Выль Трык гуртысь яратонзэ пумитам — Анастасияез (Анастасия Ефимовна вордскемын 1918-тӥ арын, улонысь кошкиз 1993-тӥ арын апрель толэзе). Ӟеч улыны кутскиллям Пикаль но Насьта. Нырысь Лёня пизы вордӥськем. 1941-тӥ арын 2-тӥ августэ вордскем мынам атае Григорий. Нош октябрь толэзе Пикальлы повестка вуэм. Туж кысык кошконо луэм фронтэ. Келяськыкуз деду бабулы шуэм: «Та македэ утялтыны туртты ини». Сӥзьыл усись куаръёс гинэ тодӥзы, дыр, егит анай-атайлэсь сюлэмзэс. Тӥни озьы Насьта бабуэ кылем 2 толэзьем нуныеныз но Лёнька пиеныз.

Берпуметӥ гожтэтаз дедуэ гожтэм: «Ладожской озеро копак горд адями вирлэсь». «Книга Памяти» потэм бере гинэ тодӥмы, ку-кытын быремын Пикаль дедумы. Михаил Шингаркин улонысь кошкем 1942-тӥ арын 4-тӥ октябре. Ленинград областьысь Невская Дубровка гурт мышкын, Нева шурлэн паллян ярдураз, кылиз со кӧлыны. Бадӟым сузэре Люба, школаын дышетскыкуз, Ленинградэ ветлӥз вал, отысь бабулы из вайиз. Со изэз бабу оброс азяз понӥз.

Секыт висьыса, 14 аресъем Лёнька улонысь кошкем. Солэн туберкулёз вылэм. Тулыс сяська бичам али бакчаысьтызы, собере югыт дуннеен люкиськем.

Пичи дыръям ӝытъёсы, школаысь бертэме бере, бабуэ доры ветлӥсько вал. «Мар ке история мадь али» шуэмелы бабуэ черсон сяменыз ик очки вылтӥз учке вал мон шоры лыз инбам кадь синъёсыныз, собере вера вал улонысьтыз учыръёсыз. Ноку но ӝожтӥськыны ӧз тоды.

Г. Шингаркин Москваысь бертэмез бере.

Школаез йылпумъяз армиын

Пикальлэн фотоез но ӧвӧл, атае атайзэ ноку ӧз адӟылы. Но Пикальлэн нимыз даурлы кылиз Синяр-Бӧдья гуртын. Бабуме весяк Пикаль кышно Насьта шуизы, нош атайме — Пикаль Гирыш. Война дыръя вордскем нылпи атаезлэсь данзэ утьыны быгатӥз, ӟеч адями луиз.

Атае пичи дыръяз 7-тӥ классозь дышетскиз Вуж Бӧдья гуртын. Отын сое Чебер Гирыш шуо вылэм. Быдэ вуыса атае Москваын служить кариз, отчы ик сверхсрочное кылиз. Москваын ик 8 классэз быдтӥз, татысь 230 номеро школаын дышетскиз.

Вордскем музъем, уката ик инкуазь кыске, шуо, дораз. Атае гуртаз бертӥз. Туж тузӥ муртлы синмаськем мынам анае Мария. Пумен Григорий атай луиз, корка пуктӥз, писпу мерттӥз, нылпи вордӥз. Атае весяк колхозын ужаз тракторист луыса. Трос гинэ солэн грамотаосыз, 3 медалез вань.

Туннэ Григорий Михайлович ӧвӧл ни ми пӧлын. 75 аресказ улонысь кошкиз. Ӟеч мед кӧлоз ини атае. Ӟеч улонмы понна ожмаськыса ас улонзэ сётэм солдатлэсь Михаил Шингаркинлэсь данзэ ӧз ышты Григорий. Ми, Пикальлэн нунокъёсыз, весяк сюлмамы возёмы, утёмы пересьёсмылэсь нимъёссэс.

________

Вера Кузнецова. Кизнер ёросысь Синяр-Бӧдья гурт

Удмурт Дунне
By Удмурт Дунне 19 июня, 2020 17:20 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<