Петуньки школалэн азьвыл директорезлы Юрий Ларионовлы — 70 арес

Удмурт Дунне
By Удмурт Дунне 1 июня, 2020 15:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Шаркан ёросысь Петунькиысь Ю. Ларионов
А. Бречаловлэн кузьымъёсыныз.

Шаркан ёросысь Петуньки школалэн азьвыл директорез, Россиысь дышетон удысысь дано ужась Юрий Евгеньевич Ларионов кемалась ик ӧвӧл пусйиз 70 арес тырмонзэ. Сое юбилееныз ӟечкылаз элькун Тӧро А. Бречалов, келяз синпель кузьым — «Удмурт Республикалэн Тӧроезлэсь» гожтэмен час но сяська керттэт.

— Ӵапак 12-тӥ мае, юбилей нуналам, ӝыт пал телефонам жингырто но шуо: та, пе, Александр Владимирович, Удмуртилэн Тӧроез, ӟечкыламе, пе, потэ тӥледды. Ӧй оскы, кин ке, пӧй, монэн шудыса вераське. Нош ачим юртъер котырам бергасько вал. Ӧвӧл, мон, пе, та — элькун Тӧро. Кытын сылӥсько, отчыям ик пуксисько вал ни! Кинлы бен ӟеч кыл уз яра, туж шумпотӥ! Аслыз но тазалык, азинлык сӥзи. Мукет нуналаз тӥни кузьымзэ но вуттӥзы, — паймемзэ вера Юрий Евгеньевич.

Юрий Ларионов вордскемын Шаркан ёросысь Пороз гуртын. Отын ик йылпумъяз 8 классъем школаез, 10-тӥ классэз — Шаркан черкогуртысь школаын. Школаез йылпумъямез бере со Иже шонтӥз, медициная институтэ экзаменъёсты капчиен сётӥз.
Медицина угось биологиен-химиен герӟаськемын, школаын та предметъёс солы тунсыко потылӥзы.

— Документъёсме сётыкум, маке ӧй малпаськы, кӧня отын дышетсконо луоз, — шуэ Юрий Евгеньевич. — 7 ар шуизы но, та дыр куспын улонэд но, пӧй, ортчоз. Кутӥ но документъёсме берлань басьтӥ. Армие, малпасько, нырысь ветло. Агае шуэ: призыв сӥзьылысен гинэ кутске, ма карод отчыозь? Мын ай, Ивановое ветлы, отын пожарно-технической училищезы вань. 2 толэзь отын дышетски но мӧзмыса вордскем палъёсам берытски.

Дышетон удысэ Ю. Ларионовез баянэн шудыны быгатэмез вуттӥз, шуыны луоз. Гуртысьтызы школаын крезьгуръя дышетӥсьлы ёрмо вылэм, Юрий Евгеньевичез ӧтизы. Нылпиосты со дышетӥз быдэс ар. Собере дышетскыны пыриз Удмурт кун университетысь биологияя-химияя факультетэ.

Сое ёросысьтызы ик Балтачысь школае ужаны ӧтизы. Татысен пумитаз вуоно кузпалзэ. Надежда Афанасьевна нылпиосты математикалы дышетӥз.

— Монэ Петуньки школалы директоре пуктӥзы, — вера
Ю. Ларионов. — Та ужез быдэсъяй 1982-тӥ арысен 1998-тӥ арозь. Школаен бен кивалтыны секыт ӧй вал, номыр сыӵе-таӵе валамтэос, шуг-секытъёс ӧз кылдылэ. Дисциплинаез юн возьыны тырши. Но акылес потэ вал отчётъёсын, документъёсын вырон. Вылаз ик, со вакытэ школаосты нимаз котельнойёс шунтылӥзы, я эгыр ворттоно, я гумыос тӥясько, я эшшо мае ке тупатоно луэ. Отчы-татчы вазиськиськод, бызьылӥськод — луӵӵе 100 урок сётод, шуэм сямен.

Директорысь кошкыса, Юрий Евгеньевич «жадемзэ веськатӥз» мувӧй кыскон удысын. Но отын чиданэз кемалы ӧз тырмы, школа выльысь ас бордаз кыскиз. Но таяз радэ кузпалыныз интыосынызы воштӥськизы, шуыны луоз: Надежда Афанасьевна школаен кивалтӥз, Юрий Евгеньевич тыршиз огшоры дышетӥсьын. Озьы Ларионов кузпалъёс 45 арлэсь кема одӥг школаын ог-огзы вӧзын тыршизы.

— Куд-огез пайме: школаын но, дорын но ӵош — кызьы чидады? Нош мыным туж лякыт вал: вераськонмы одӥг, ог-огмылы визь-кенешен юрттылӥмы, — шуэ Надежда Ларионова. — Одӥгез понна гинэ кӧты куректэ: школаын бергаса, асьме нылпиосмылы саклык ӧз тырмылы кадь потэ. Но паймоно кадь: пиналъёсмы но дышетонлэсь кыдёке ӧз кошке. Бадӟымез пимы УдГУ-ысь географияя факультетэз йылпумъяз, шоретӥез нылмы — Глазовысь пединститутэз. Пичиез нош, папаез сямен ик, бырйиз биологиен-химиен герӟаськем удысэз — фармацевтлы дышетскиз. Кузпалылэсь но, аслэсьтым но ӵыжы-выжыосмес учконо ке, дышетӥсьын огъя ужан стажмы 200 арлэсь ятыр люкаське. Со пӧлысь ог 100 арез — ӵошеннамылэн.

Ю. Ларионов дышетӥз 66 аресозяз, берло аръёссэ гинэ тани кузпалыныз ӵош пенсиын шутэтско. Ма, гуртын бен шутэтскыны маза ӧвӧл: бакча возё, чипы-курег вордо.

— Выль дышетскон ар кутскыку яке берпуметӥ гырлы жингыртон вакытэ кыкнамылэн ик сюлэммы нёркак луэ. Пыдъёс асьсэос школае нуо. Сётаки дышетӥсь луон — со Инмарен сётэмын, — шуэ
Ю. Ларионов.

________

Елена НИКИТИНА

Удмурт Дунне
By Удмурт Дунне 1 июня, 2020 15:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<