Перепеч сиёзы онлайн. Кызьы ортчоз «БиГерд» форум?

Удмурт Дунне
By Удмурт Дунне 25 июня, 2020 14:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Татарстанысь удмурт егитъёс 4-тӥ арзэ ини радъяло «БиГерд» форумзэс. Арысь аре пыриськисьёслэн лыдзы будэ, Татарстанысь сяна, отчы мукет улосвылъёсысь удмуртъёс кыстӥсько.

Татарстанын ортчылӥсь «БиГерд» форум пӧртэм улосъёсысь удмурт егитъёсты люкалля.
Туспуктэм: «Молодёжное крыло НКА удмуртов Татарстана» огинлэн «Вконтакте» бамысьтыз

Ужало ӟечлык понна

Туэ «БиГерд» аслэсьтыз дышем туссэ воштӥз. Татарстанын ӧвӧл лэземын бадӟым ужрадъёс ортчытъяны, соин ик форум радъяськоз Интернетын 26-тӥ-27-тӥ июне, Егитъёслэн нуналзылы, Татарстанын радъяськись Гыронбыдтонлы сӥзьыса.

Форуме возьмало 14-35 аресъем удмурт егитъёсты, удмурт культураен тунсыкъяськисьёсты.

— Форум онлайн ортче, малпасько, таин сэрен пыриськисьёслэн лыдзы уз кулэсмы, — вера Татарстанысь удмуртъёслэн огазеяськонзылэн тӧроезлэн воштӥсез Марина Иванова. — Тужгес но трос адями люкамы вал 2018-тӥ арын — 73, но валамы, ми понна со туж трос шуыса. Ваньзэс интыяны кулэ, чакланы, милям лыдпус сьӧры уйиськеммы уг поты, ӟечлык понна тыршоно.

«БиГердын» 2 нунал ӵоже пӧртэм удысъёслы сӥзем лекциос ортчозы: дизайнер, азьветлӥсь Дарали Лели, Ижысь Арт-резиденцилэн ужез вылэ пыкъяськыса, вералоз, кызьы проектъёсты грантъёстэк улонэ пыӵатыны луэ, кырӟась Павел Александров (Shoner Paul) валэктоз, кызьы творчество коньдон поттыны юрттэ, ачиз Марина Иванова дышетоз ужрадъёсты кутсконысеныз пумозяз радъяны.

Лекциос ZOOM конференция пыр онлайн ортчозы ке но, соосты учкыны луоз, форумлэн кыказ ик нуналаз пыриськыса гинэ. «БиГерд» йылпумъяськем бере сертификат сётозы.

Форум улсын ик «Печь перепеч» акция улонэ пыӵалоз.

— Вань мылкыд карисьёсын ZOOM-е пыромы но, котькудӥз дораз перепеч пыжоз. Таӵеез ноку ӧй вал на! — вера Марина. — Эшъёсын аспӧртэм пумиськон кадь.

Форумез йылпумъялозы но онлайн: ваньзы быгатозы мылкыдзэс шараяны, вуоно арлы дэмланъёссэс вераны, гитараен шудыса, кырӟанъёс быдэстыны.

— Зэмзэ ке, Интернет пыр ужаны туж пайдаё, — вера Марина Иванова, — азьло пӧртэм сервисъёсын тодматскыны дырмы уг шедьы яке аналскиськомы вал, ма сотэк но ужмы мынэ ук! Пандемия дыръя потэ-а, уг-а, вылезлы дышетсконо луимы. Адями котьмалы дыше, табере малпаськомы, вуоно аръёсы форумлэсь ужзэ паськытатомы, онлайн но, офлайн но люкетъёссэ ортчытомы. Туж потэ ни адӟиськем, эшъёсын ӟыгырскем.

Форумын пӧртэм малпанъёс вордско.
Туспуктэм: «Молодёжное крыло НКА удмуртов Татарстана» огинлэн «Вконтакте» бамысьтыз

Форумын кыдаз Можга ёросысь Кватчи гуртысь Ольга Чайникова. Нылаш али Елабугаын, Казань университетлэн филиалаз дышетске. Татарстанын уг тырмо вал удмурт эшъёсыз, соин ик форум сярысь тодыса, отчы пыриськыны мылкыд кариз.

— Зэмзэ ке, уг но тодӥськы вал, татын удмуртъёслэн быдэс огазеяськонзы вань шуыса, — тодаз вае Оля. — Удмуртъёслэн нырысетӥ ӧтчамзылы сӥзем конференция университетамы ортчиз вал, отын нырысьсэ кылӥ «БиГерд» сярысь. Туж тодматскеме потӥз Татарстанысь удмурт егитъёсын. 2018-тӥ арысен форуме ветлыны кутски. Туэ дуннеын таӵе югдур кылдэмен, паймиськомы вал, кызьы форум ортчоз. Марина Иванова милесьтым юаз: «Ӧвӧл-а малпанъёсты?» Мон аслэсьтым идеяосме шараяй, Марина соку ик шуиз: басьтӥськы соос борды, озьы ик каром.

Сюлмаськытӥз одӥгез гинэ: кызьы егитъёс выль формат шоры учкозы? Тунсыко-а соослы потоз?

Ваньмы одӥг выжыысь

«БиГерд» форум юрттэ Татарстанын котькуд ар ортчись Гыронбыдтон шулдыръяськонэз егитъёслы но матынгес карыны, угось гужем вакытлы тросэз берто гуртъёсазы.

— Милям ӧжыт гуртъёсмы, кытын удмурт кылын верасько, специалистъёс но уг тырмо. Соин ик егитъёс малпало, удмурт культура туала луэмысь дугдэ. Гужем — ӟеч вакыт егитъёсты кырмыны, соосын выль малпанъёсты улонэ пыӵатыны, — шуэ Марина Иванова.

Форумын огинэ вуо пӧртэм улосвылъёсысь, пӧртэм огазеяськонъёсысь удмурт азьветлӥсьёс, ог-огзылэсь дышетскыса, соос выль ужан кужым басьто.

— Туж яратӥсько монэным огъя малпанъёсын улӥсь егитъёсын вераськыны, — вера Марина, — ми ваньмы пӧзиськомы удмурт культураын, милемлы со тунсыко, ми соин улӥськомы. Синмаськисько «Куара» огинлэн ужамезлы, «Шунды» огазеяськонлэн адӟем карымон проектъёсызлы. Ог-огмылы матын ум ке но улӥське, ми одӥг ужез лэсьтӥськомы, одӥг выжыысь луиськомы, оскисько, азьланяз ужан емышмы быг-быг кисьмалоз, калыклы адӟиськоз.

Мария Емельянова

Удмурт Дунне
By Удмурт Дунне 25 июня, 2020 14:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<