Мушъёсыз кужым сёто

Удмурт Дунне
By Удмурт Дунне 29 июня, 2020 16:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Якшур-Бӧдья ёросысь Выжойылысь
Г. Рябчиков — быдэс ёрос понна огназ ветеран.
Туспуктӥз Валентина Емельянова

Оже пыриськем ветеранъёс арысь аре ичигес кылё. Якшур-Бӧдья ёросын Геннадий Давыдович Рябчиков гинэ вань на. Выжойыл гуртын вордскемын но вань улонзэ отын ортчытэмын. Пичи дырысеныз мушъёсты гажа. Соос туннэ но улыны кужым пыӵато.

Выжойыл гуртысь Рябчиковъёслэн семьязы бадӟым вылэм, Геннадий — 6-тӥез пинал. Гуртысьтызы начальной школаез йылпумъяса, колхозын ужаны кутскем. Пичи муртэ муш возьманы куриллям, отӥяз сик кораны ыстӥллям. Война кутскем бере ик колхоз председатель сое но бадӟым апайзэ Ижысь аэродром лэсьтонэ келям. Собере Якшур-Бӧдья ёросысь Чурысь леспромхозэ вуиллям. Отӥяз Г. Рябчиков чугун сюрес вылын, леспромхозын ужамын.

— 1944-тӥ арын февраль толэзе ёросысьтымы адямиосты 30-40 валэн Кильмезе келязы: продовольствие нуллӥмы, сик корамы, — тодаз вае Геннадий Давыдович. — Кезьыт, сиён кӧттыр ноку ӧз йӧтылы. Куд-ог эшъёсмы пегӟылӥзы но, соосты кужмысь вайылӥзы. Толэзь ужаммы бере гуртамы лэзизы, нош вамышъяны ӟигармы ӧвӧл. Берло арнязэ чылкак сютэм улӥмы, шуыны луоз. Дӧдьыме Ува ёросысь Тыловае кельтӥ, отысь потӥмы гинэ — валэ пограны кутскиз. Валэз
уд кельты ук, со понна кыл кутӥсько. Валэ вылэ выдӥ, ачим но бӧрдӥсько, валэлэн но синкылиосыз вияло. Ӝомал луиз, кытӥ ке ӧвӧл кионъёс вузыны кутскизы. Валэ куалектэменыз султӥз но берен Тыловае вуттӥз.

Геннадий дӧдьызэ но, валзэ но тодмотэм муртъёс доры кельтӥз но ачиз пыдын дораз бертӥз. Арня ортчыса, валэз доры вуиз, сое возем муртъёслы 2 мешок картошка кельтӥз. Нош 16 арес тырмыса, егит муртэ армие басьтӥзы.

Армиын дыръяз

— Гуртысьтымы одӥгнам кошки, гадям быгы (басма юдэс) бырттӥзы, кырӟаса гурт пумозь келязы, — шуэ Геннадий Давыдович. — Бӧдьяын 20 кузя люкаськимы, ваньмес келязы Пичи Пургае, отысен монэ ыстӥзы Пермь улосысь Березняки городысь дышетскон пунктэ. 3 толэзь ӵоже дышетэмзы бере ыстӥзы Кировысь, бӧрысьгес Казаньысь авиационной базаосты утьыны.

Г. Рябчиков ожъёсы ӧз пыриськы ке но, службазэ нуонэз капчиен ӧз сётӥськы. Йӧнала сиськытэк, 1947-тӥ арын воргорон висьыны усиз. Нырысь тӧрназ, собере ньӧр кадь начармиз. Воксё жуммемез бере солдатэз госпитале келязы. 1 метр 71 сантиметр ӝужда солдат 39 килограмм кылем.

5 толэзь йӧнатэмзы бере сое гуртаз келяллям. Воргорон шоры тросэз кырыж учкылӥзы. Угось солэн эшъёсыз 1951-тӥ арын гинэ армиысь бертыны кулэ вал. Тазалыкез лябӟемын шуыса веранлы оскись вылымтэ, соин ик мукет воргоронъёсын
ӵош со но тэль коранэ ветлӥз. Со аръёссэ тодаз вае ке, синкылиосыз пото: 12 ар, пе, дорме ӧй адӟылы.

— 1948-тӥ арын шорам учконзы воштӥськиз, ляб тазалыкме лыдэ басьтыса, мушкасе дышетскыны ыстӥзы, — шуэ Геннадий Давыдович. — «Выль улон» колхозлэн муш бакчаяз ужай, озьы 33 ар пасекаын тырши. Ас вакытаз 100-лэсь трос муш семьяос люкаськылӥзы, араз 3 тонна чечы колхозлы сётылӥ. Умой ужаме понна 1950-тӥ арын ВДНХ-е ветлӥ, отын бронза медален пусйизы.

Геннадий Давыдович 1950-тӥ арын кузпалъяськиз, Анна Ивановна кузпалэныз ӵош 6 пинал будэтӥзы, соос Выжойылын, Якшур-Бӧдья черкогуртын но Ижевскын уло. Жаляса верано, ветеран табере 7-тӥ арзэ огназ улэ. Ас вакытаз Геннадий Давыдович котьма карыны усточи вылэм. Пулэсь котьма лэсьтыны быгатылэм: аръян шуккон вышкыос, салазкиос, карнанъёс, тусьёс, укно рамаос. Соосты базарын вузаса, нылпиоссэ ческыт сиёнэн шумпоттылэм. Ӵапак 1950-тӥ арын ик колхоззы Геннадий Рябчиковлы 1 чурка муш сётэм, бордаз эшшо 1 палэп басьтэм но со дырысен ялан муш вордэ. Туннэ но ветеранлэн бакчаяз мушъёсыз гужето, соос сюлэмзэ буйгато, ӵуказе нуналлы улыны кужым сёто.

________

Валентина ЕМЕЛЬЯНОВА

Удмурт Дунне
By Удмурт Дунне 29 июня, 2020 16:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<