Малы синпияла бусаське?

Ангелина Снигирева
By Ангелина Снигирева 30 июня, 2020 12:27
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Тужгес вӧлмем син висёнъёс сярысь пыр-поч вера вылӥ категориен врач-офтальмолог, медицина наукаосъя кандидат Ирина Богатырёва.

Миопиез быдэсак вормыны быгатӥсь эмъюмъёс, витаминъёс туннэ ӧвӧл — вань муре пыӵамлэсь алӥсьёсыз гинэ. Соин ик адямиос нулло очки, линза, егитъёс лазерен коррекция лэсьто.
Туспуктэм: udmurt.ru

Писпулэн куаръёсыз ӧвӧл?

Миопиен туннэ котькуд 3-тӥез адями курадӟе. Таӵеосты тодманы секыт ӧвӧл: кыдёкысь адӟыны турттыса, соос синъёссэс кыньырто. Телевизор азе матэгес но матэгес пуксё. Ваче вераськись муртсылэсь туссэ умой-умой уг адӟо, палэнысь писпулэсь вайёссэ-куаръёссэ уг люко — оглом вож вишты гинэ адӟо. Нош книга-газет очкитэк лыдӟо.

— Одӥгъёсызлэн вордскыкузы ик та висёнзы луэ ни, но таӵе учыръёс туж шер пумисько, — валэктӥз Ирина Валентиновна. — Тросэзлэн синзы пумен лябгес адӟыны кутске. Уката но нылпиослэн синкӧльы будон вакытазы. Соин ик анай-атайёс та вакытэ туж сак луыны кулэ. Ляб адӟыны кутскем пиналъёс ӵемысь уродгес дышетскыны ӧдъяло — саклыксы быре. Юнме верамын ӧвӧл ук: син уг адӟы ке, пель но уг кылы кадь. Ляб адӟись нылпиос очки поно ке, дышетсконзы выльысь радъяське.

Ог 18-20 аресын миопия муре пыӵамысь дугдыны кулэ. Но компьютеръёсын сэрен лябгес адӟыны кутско 30 но, 40 но аресын. Ар куспын зрение 1 но солэсь тросгес диоптрийлы усе ке, озьыен, муре пыӵа. Миопиез 3 степеньлы люко: ляб — 3 диоптриёзь, шоро-куспо — 3,25-ысен 6 диоптриёзь но зол — 6 диоптрийлэсь тросгес.

Та висёнлэн кылдон мугъёсыз сярысь пӧртэм малпанъёс вань. Одӥгез — трос лыдӟиськыку, компьютер, те­ле­визор сьӧрын матын пукыку, синкӧльы ас понназ будэ, лябӟе. Миопия кыльыны быгатэ выжыысь выжые — анай-атай кыдёкысь умой уг адӟо ке, пиналлэн но таӵе ик шугъяськонъёсыз луыны быгатозы. Миопилэн трос пӧртэм мугъёсыз пӧлы данакез тодосчиос пырто инкуазез но. Эскеронъёс возьмато: чылкыт омырын будӥсь-шудӥсь гурт пиналъёслэн, городысьёсыныз ӵошатыса, синъёссы лэчытэсьгес. Миопиез быдэсак вормыны быгатӥсь эмъюмъёс, витаминъёс туннэ ӧвӧл — вань муре пыӵамлэсь алӥсьёсыз гинэ. Соин ик адямиос нулло очки, линза, егитъёс лазерен коррекция лэсьто.

Очки уг юртты

Катарактаен дуннеын 40 ареслэсь ортчем котькуд 6-тӥ адями курадӟе. Но Ирина Богатырёва верамъя, адямиос ог 200 аресозь улысалзы ке, катаракта ваньзылэн луысал. Угось кызьы арлыд люкаськемъя ымнырын кисыриос кылдо, озьы ик синпияла (хрусталик) но пумен бездыны кутске. Озьы адямилы шунды сиос бездытгес но бездытгес потыны кутско. Дунне бусэн шобыртӥське кадь.

Зэм, катаракта куддыр луэ ни вордскыку ик. Талэн мугъёсыз пӧртэмесь. Висён куд-ог учыръёсы кыле выжыысь выжые, кылдэ генъёсын, хромосомаосын воштӥськонъёс-сураськонъёс вань дыръя, шуом, Даунлэн синдроменыз вордскисьёслэн со ӵемысь пумиське, нуны ваёно нылкышно краснухаен, герпесэн, ветрянкаен но мукет та выллем паласькись черъёсын висьыны шедьтэ, антибиотикъёс юэ ке, но трос мукет учыръёсы. Катарактаен вордскись нуныослы специалистъёс ӝегатскытэк операция лэсьтыны дэмлало, угось пинал пыраклы синтэм кыльыны быгатоз.

Катаракта кыл­дыны быгатэ пумен. Талэн но мугъёсыз пӧртэмесь. Арлыд люкаськыса, веществоослэн воштӥськонзы сураськыку, сакыр диабет дыръя кыказ ик синъёсын со огдыре кутске. Нош, кылсярысь, син шуккиськыку, химия суретъёсын сутскыны шедьыку, бусоме одӥгысьтыз гинэ синмысь хрусталик.

Но соосаз но, таосаз но учыръёсы катаракталэн тодметъёсыз огвыллемесь: бус пыр адӟем сяна, синъёс дырын-дырын кык адӟыны кутско, синшор пурысь, ӵуж яке тӧдьы луыны ӧдъя. Уг юртто очки но, линзаос но — адями урод адӟе кыдёкысь но, матысь но.

Ог 12 процентэзлэн адямиослэн катарактазы ӝог аля — ог 6 ар куспын синтэм кылё, ог 15 процентэзлэн со кыстӥське 15 ар пала, нош ог 70 процентэзлэн — 7-10 ар.

Висёнлэсь муре пыӵан дырзэ кӧня ке кыскыны юртто пӧртэм эмъюмъёс, витаминъёс, зарядка лэсьтон. Но офтальмологъёс шуо: куке-соку операция лэсьтытэк уз луы — синпиялаез воштоно искусственной хрусталикен.

Ныр улысьтыз гинэ синйылтэ

Глаукома — одӥгез тужгес лекез син висён. Дуннеын ог 100 миллион адями, Россиын ог 1 миллион адями соин 
сэрен сукыр кылемын.

— Та висён ӵемысь лушкем кырмиське, — пусйиз Ирина Богатырёва. — Бен, куддыр синъёс сутыса висьыны кутско, гордэкто, адями адӟе на син улысьтыз арбериосты гинэ. Но трос учыръёсы висёнлэсь муре пыӵамзэ чик валаны уг луы. Собере ог нуналэ палзэ синэзпытсаськод но валаськод: мукетыз чик уг адӟы ни.

Глаукомалэн кылдон мугъёсыз уно — ваньмыз соос герӟаськемын синъёсысь вир­зӥбетлэн тэтчаменыз. Нош давлениез ӝутыны быгатэ, кылсярысь, кофеин. Нылкышноос пӧлын глаукомаен курадӟисьёс тросгес. Висён кыльыны быгатэ выжыя. Аляны быгатэ синэз шуккыны шедьтыку но, катарактаез дыраз йӧнатымтэ дыръя но.

Ӵемысь специалистъёс дэмлало давлениез кулэстӥсь эмъюмъёсты — синъёс дасо аръёс лябӟытэк возиськозы на. Но куд-ог учыръёсы соос уг тупало. Соку специалистъёс операция лэсьтыны ӵекто. Но озьы-а, тазьы-а, глаукома дыръя синэз выльысь таза карыны уг луы ни. Но муре пыӵамзэ алыны луэ. Кызьы — потэ ачиз адями бордысь но.

Со понна:

  • • кынмано ӧвӧл;
  • • синъёсты шундылэсь сьӧд очкиосын ватоно;
  • • телевизор учкыку, лыд­ӟиськыку, киужен вырыку, корка пушкын югыт мед луоз;
  • • 5 килограммлэсь секытгес ӝуткано ӧвӧл;
  • • возиськоно йыруллань ужъёслэсь: уриськонлэсь, выж миськонлэсь;
  • • тырмыт кӧлоно;
  • • тамак кысконлэсь куштӥськоно;
  • • тросгес сиёно емышъёс, ӧжытгес — сылалтэм, пырсатэм, кӧё пӧрамъёсты.

Вань син висёнъёс герӟаськемын йырвиымен, огъя тазалыкен. Соин ик адями макем эшъяське таза улонэн, сокем солэн синъёсыз но лэчытэсьгес луозы.

Дасяз Элина Васильева

Ангелина Снигирева
By Ангелина Снигирева 30 июня, 2020 12:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<