Лушкемак вуыса паймытъя

Удмурт Дунне
By Удмурт Дунне 1 июня, 2020 16:17
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Можгалась Вероника Романова

Та артистлэн куараез паймытэ — зыл-зыл бызись шур кадь: кыске аслаз кужыменыз, лэйкатэ, бурдъя, шумпоттэ. Соин, луоз, Можгалась Вероника Романоваез яратӥзы удмурт концертъёсы ветлӥсьёс но, удмурт радиоез кылзӥсьёс но. Калык пӧлы вӧлмизы ни солэн «Вождэ эн вай», «Лушкемак вуыса, шуныт тӧл…», «Гажанэ, кытын тон?» кырӟанъёсыз.

Малпан быдэсмиз

Алнаш ёросысь Сыръезь гуртын вордскем Вероника пичи дырысеныз кырӟаны яратэ. Бубиз улонысь вазь кошкиз — Вероникалы соку 1,5 арес сяна ӧй вал. Но нылызлы кылиз бадӟым кузьымез — шулдыр куараез. Вероникалэн анаез но кырӟа. Озьыен, таӵе быгатон солы азьлапал чакламын вал, дыр. Собере нылпи садын но кырӟась нылашез синйылтӥзы.

— 6 аресысен кырӟанлэсь ӧй ни люкиськылы кадь. Нылпи садысь воспитательёсы Римма Анатольевна Салтыкова но Елизавета Фёдоровна Алексеева, вань сюлэмзэс поныса, монэн ужазы. Соос пыр ик удмурт кырӟанэз яратон пыӵаз, дыр, — шуэ Вероника.

Школае ветлӥсь нылашез нимаз визьнодаз «Азвесь гырлы» ансамбльлэн кивалтӥсез Светлана Павловна Иванова. Соин дышетсконзэ йылпумъякуз, нылашлэн одӥг малпанэз вал — культурая колледже пыроно. Татын дышетскон аръёсыз туж шаплы ортчизы. Диплом басьтыса, Вероника вордскем палъёсаз, Алнаш ёросэ, ужаны бертӥз. Озьы кылдӥз — татын ик яратонзэ пумитаз, бызиз, пи вайиз. Ужаз гуртысь клубын но, школаын но, нылпи садын но. Собере семьязы эшшо бадӟымаз — нылзы вордскиз.

Но, шумпотыса улэм интые, картэныз кусыпъёссы нуналмысь сӧриськизы. Ӧз юртты гуртысь Можгала кошкемзы но. 2 нылпиез будэтон погыльскиз анай пельпумъёс вылэ. Улоназ секыт вакытэ но Вероника кырӟатэк ӧз быгаты, кутскиз ветлыны «Марӟан» ансамбле.

— «Марӟанын» кин ке вераз: «Дубительысь» огез коллектив, пе, пазьгиське ни. Худруксы улонысь кошкем, ансамблез нокин уг басьты. Нош мынам ӵапак уже ӧй вал соку. Калык кырӟанъёсты
быдэстон мыным дышетскемея но, сюлмыя но тупа, соин «Душечка» ӟуч ансамбль матын луиз, — тодаз вае нылкышно.

Озьы 2007-тӥ арысен Вероника Романова та коллективлэн шорсюлмыз луиз. Со дырысен «Душечка» ансамбль трос ӵошатсконъёсы пыриськылӥз ни, вормонъёсын бертылӥз Россиын но Удмуртиын ортчем вожвылъяськонъёсысь. Кылсярысь, 2017-тӥ арын Россиысь «Роза Мира» гранд-фестивальын вормизы. Кылем арын «Зарни пилем» элькун конкурсын 1-тӥ степенё лауреат луиз.

«Душечка» ансамбльын кырӟало бадӟымъёс но, пичиос но. Нылпиос сыӵе ярато коллективез, татысь кошкыны уг ӵыдо, школаез йылпумъяса но.

— Можгалась педколледжын дышетскисьёс но, мукет колледжъёсысь студентъёс но «Душечкаын» кырӟало, татын ми соосты вуоно артистъёсты кадь дасяськом, — шуэ Вероника Вячеславовна.

Крезьгурчиос дунъяло

Нош удмурт эстрадае Вероника Романова вуиз 2 Геняослы луыса.

— Мынам кырӟан удысын 2 творческой атае. Мон соосты туж гажаса озьы шуисько.
Огез — Геннадий Ганьков, кыкетӥез — Геннадий Бекманов. Нырысь ик сцена вылэ потӥ Ганьковлы луыса. Солэн Можгалан концертэз чакламын вал. Нош огез артист висьыны усем. Сое кинэн ке воштоно. Мон сярысь Геннадий Николаевич тодэм Можгалан улӥсь Вячеслав Цветной маскарчилэсь. Мон шумпотыса сцена вылэ потӥ, — тодаз вае кырӟась.

Собере Геннадий Ганьков ик Вероникаез Иже концертэ ӧтиз — таиз Удмурт театрын ортчиз, 8-тӥ Мартлы сӥземын вал. Татысен кырӟасен тодматскиз Геннадий Бекманов.

Нырысь Вероника быдэсъяз удмурт кырӟасьёслэсь — Ольга Зориналэсь, Римма Шкляевалэсь — тодмо луэм кырӟанъёссэс. Отӥяз Вероникаез адӟизы кырӟан гожъясьёс. Нырысь ик — Геннадий Бекманов.

— Тодматскеммы бере, толэзь ортчыса, Геннадий Иванович жингыртӥз: «Вероника, мон тыныд кырӟан гожтӥ». Мон туж шумпотӥ талы. «Вождэ эн вай» нимаське, туж кельшиз со мыным, — тодаз вае Вероника Романова.

Со кырӟанэн артистка потаз радиое но, Ижысь сцена вылэ но. Пумен Вероника Романоваез пӧртэм
концертъёсы ӧтчаны кутскизы. Тани «Аксион» дворецын ортчем «Кырӟась семья» концертын со Юлиана нылыныз ӵош сцена вылэ потаз. Выль арлы сӥзем ужрадын Геннадий Бекмановен ӵош кырӟалляз.

Геннадий Бекманов бӧрсьы Вероникалы кырӟан ӵектыны ӧдъязы мукет авторъёс но. Кылсярысь, Римма Рыловалэн кылъёсызъя «Гажанэ, кытын тон?» крезьгур гожтӥз Евгений Коновалов. Нош «Лушкемак вуыса шуныт тӧл…» кырӟан 2019-тӥ арын устоосыз пӧлы пыриз «Мынам Удмуртие» радиоез кылзӥсьёслэн куремзыя. Николай Васильев кылбурчилэн чуръёсызъя чебер крезьгур гожтӥз Геннадий Матвеев. Озьыен, крезьгурчиос шӧдо, Вероника Романова быдэстэмъя кырӟан аслэсьтыз кылзӥсьсэ шедьтоз, калыклэн сюлэмаз пыроз шуыса. Нош кырӟась лушкемак паймытъя кылзӥсьёсты чебер куараеныз.

Кырӟан огазея Вероника Вячеславовналэсь быдэс семьязэ. Туж шулдыр кырӟа солэн Роман пиез но. Нош Юлиана нылыз анаезлэсь сюрессэ азинтыны пӧрмытэ ни. Пичи дырысеныз со «Душечка» ансамбльын будӥз, Можгалась крезьгуръя школаын дышетскиз. Табере Ижысь крезьгуръя колледжын тодон-валан люка, укулеле инструментэн (пичи концертной гитара) шудыны дышетскиз, ачиз кырӟанъёс гожъяны басьтӥськиз ни.

Котьку пальышась но синмез кыскись Вероника Романова шоры учкыса, амалтэк верам потэ: умой кырӟан адямилэсь улонзэ но чебер каре, азьлане вамыштыны кужым но сётэ.

________

Алёна ИОНИНА

Лушкемак вуыса, шуныт тӧл…

Кылъёсыз Николай ВАСИЛЬЕВЛЭН

Крезьгурез Геннадий МАТВЕЕВЛЭН

Тодматскон

Лушкемак вуыса паймытъя

Лушкемак вуыса, шуныт тӧл

Льӧмпулэсь сяськазэ пурӟытэ.

Та уе ӟардытозь мон уг кӧл,

Возьмало тынэсьтыд бертэмдэ.

Ой, мусо егит пи, тон малы

Вырӟытӥд та егит сюлэмме?

Тон ӧд вазьы мыным, нылмуртлы.

Шат возьмад мынэсьтым ваземме?

Толон ӝыт но татӥ урамтӥ,

Шулдыр гур шудыса, тон ортчид.

Мон шоры лушкемак кырмыштӥд,

Нош пал кыл но ӧд вазьы ачид.

Лушкемак вуыса, шуныт тӧл

Льӧмпулэсь сяськазэ пурӟытэ.

Та уе ӟардытозь мон уг кӧл,

Возьмало тынэсьтыд бертэмдэ.

Та уе ӟардытозь мон уг кӧл,

Тодӥсько, тон лыктод та ӝытэ.

Гажанэ, кытын тон?

Кылъёсыз Римма РЫЛОВАЛЭН

Крезьгурез Евгений КОНОВАЛОВЛЭН

Гажанэ, кытын тон, кинэн тон?

Одӥг пол, одӥг пол ке но мон

Тон шоры, тон шоры учкысал.

Синмыным ке но коть вешасал.

Кӧня ар, кӧня ар ни ортчиз.

Егит дыр, егит дыр палэнскиз.

Нош уг вуны, уг вуны тусыд.

Весь шорам кадь учко синъёсыд.

Шӧдӥськы, мусое, шӧдӥськы,

Пал кылын ке но коть вазиськы.

Лыкты чаль мон доры куное.

Пумиськом, адӟиськом, дуное.

Удмурт Дунне
By Удмурт Дунне 1 июня, 2020 16:17 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<