Литератураез усьтэ… берыктон

Удмурт Дунне
By Удмурт Дунне 19 июня, 2020 14:35
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Та нуналъёсы йылпумъяськиз ӟуч нылпи литератураез удмурт кылэ берыктонъя «Лулчеберет выж: ӟуч — удмурт» конкурс. Со ортчиз «Культурные мосты России» проектлэн бурд улаз. Конкурсэ 47 уж вуиз.

«Ӧм тодылэ вал…»

Вожвылъяськонэз радъяз Европаысь тодмо «Папмамбук» Интернет журнал. Со пиналъёслы но анай-атайёслы сӥземын. Сайтысь туала ӟуч литератураез шедьтыны, выль книгаосын, тодмо писательёсын, соослэн творчествоенызы тодматскыны луэ.

Интернет журнал тунсыко конкурсъёс ортчытъя. Одӥгез сыӵе проект — «Культурные мосты». Та проектъя туала ӟуч литература пӧртэм кылъёсы берыктӥське: итальян, француз, немец, фин, англи… Берыктон уж аспӧртэм вожвылъяськон кадь радъяське. Отчы пиналъёс, егитъёс пыриськыны быгато.
— Та конкурс Европаын кемалась мынэ ни, — пусъе проектэз Удмуртия ласянь радъясь, ӟуч, удмурт, венгер, англи кылъёсъя дышетӥсь Лариса Широбокова. Кылсярысь, Италиын туэ со 3-тӥ сезонзэ ортче ни, ӟуч текстъёсты нылпиос итальян кылэ берыкто. Мон та проект сярысь гожъяй «Мама в Италии Mamma in Italia» журналын, «Папмамбук» журналлэн редактореныз Марина Аромштамен но конкурслэн координатореныз Ольга Увароваен интервью дасяй. Соку ик валай: конкурслэн туж мур философиез. Умой вылэм, та выллем вожвылъяськон удмурт нылпиос понна но луысал ке. Угось ӵемысь озьы луэ: нылпиос огдыре ик ӟуч но удмурт но кылъёсын вераськыса будо ке но, туала ӟуч писательёсты но, удмурт писательёсты но уг лыд­ӟо. Шумпотӥсько, «Папмамбуклэн» ки­вал­тӥсь­ёсыз мыным дурбасьтӥзы, удмурт нылпиос понна но проект лэсьтыны луонлык сётӥзы.

Лариса Широбоковалэн ве­ра­мезъя, ӟуч веросъёсты удмуртэ берыктыны кутскемзы бере, нылпиос но, ды­ше­тӥсь­ёс но бурдъяськизы. Куд-огез, пе, тау карыса гожъяло: кыӵе тунсыко литература, пе, вань вылэм, ӧм но тодылэ… Ӟучомем пиналы выльысь удмурт кыл пала берытскиз…

— Конкурсэ пыриськись адями туала ӟуч литератураен но тодматскиз, анай кылзэ но волятӥз. Мон туж оскисько: егитъёс, туала тунсыко текстъёсты тросгес лыдӟизы ке, удмурт кылын но тросгес гожъяськозы, — пусъе Лариса Широбокова. — «Папмамбук» котырын трос пӧртэм кунъёс. Удмурт билингваос сярысь но быдэс дуннеын мед тодозы, соос сярысь мед гожъялозы кадь потэ. Угось дуннеын трос саклык висъяське пичиысен ик огдыре 2 но солэсь трос кылъёсты тодӥсьёслы. Асьмелы кышкано ӧвӧл усь­тӥсь­кыны, калыккуспо конкурсъёсы пыриськыны. Быдэс дуннелы возьматоно: Россиын но егитъёс трос кылъёсын чебер вераськыны, лыд­ӟись­кыны быгато. «Лулчеберет выж…» — со мукет калыклэсь литературазэ берыктон пыр аслэсьтыд кылдэ ӟечгес шӧдон, адями пушкын улӥсь пӧртэм культураосты герӟан.

Конкурсэ вуэм ужъёсты эскериз нимысьтыз жюри: филология наукаосъя кандидат, Москваысь Горький нимо литинститутысь доцент Вера Пантелеева, «Удмурт дунне» газетлэн валтӥсь редакторезлэн воштӥсез, писатель Елена Миннигараева, шаерысьтымы Дышетонэз азинтонъя институтлэн поликультурной центрезлэн кивалтӥсез, филология наукаосъя кандидат Андрей Клементьев, кылысь кылэ берыктӥсь, блогер Лукерья Шихова.

Со сяна, ужъёсты онлайн амалэн дунъязы на вань мылкыд карисьёс, нылпи литератураен тунсыкъяськисьёс.

Пиналъёслэсь ужъёссэс но жюрилэсь дунъетсэ учкыны луэ «Папмамбук» Интернет журналлэн сайтысьтыз, конкурсъёс люкетысьтыз.

«Лулчеберет выж: ӟуч — удмурт» конкурсэз вуоно арын но ортчытыны чакламын. Оскон вань, со эшшо паськыталоз, асьсэ кужымзэс эскерозы Удмуртилэн палэнысьтыз удмурт егитъёс но. Туэ проектлы дурбасьтӥзы Нациосын ужан политикая министерство, «Удмурт Кенеш» огазеяськон, Ижысь Эшъяськон юрт но удмурт кылын потӥсь газет-журналъёс.

Конкурсын вормисьёсты пусъён сӥзьыллы кельтэмын.

Малпанъёс

Конкурслэн жюриезлэн ёзчиез, писатель Елена Миннигараева:

— Проект паймытӥз. Ялан ӧпкелим, егитъёс удмурт кылын гожъяськыны уг ни быгато шуыса, нош учке ай: тыршо ке, пӧрме ук!
Туж секыт вал дунъяны. Угось ваньзы оградынгес вамышъязы. Валаськод, тани таиз — егит филолог, солэн кылшӧдонэз бадӟымгес. Нош соиз школаын гинэ дышетске ай, но озьы но кыӵе тыршем ук!
Тунсыко вал текстъёсысь пӧртэм диалект кылъёсты, синонимъёсты (пуштроссыя матын луись кылъёсты) адӟыны, конкурсэ пыриськисьёслэсь ужъёссэс ог-огенызы ӵошатыны. Тани кинлэн ке «йӧлопиньёссы выро», угось соос «кизересь», мукетызлэн «кыляло», угось «супыль-сапылесь», нош куинетӥезлэн «йӧлопиньёсыз» воксё «нонэм пиньёс». Тросэз текстъёс нылпиослы валамон, мусо кылын берыктэмын.
Но мон понна валтӥсь интыын — текстлэн валамон луэмез. Тужгес ӵем пумиськись шекъёс: ӟуч кылысь калькаос, соин сэрен куддыръя удмурт текстэз валан понна ӟучсэ учконо.
Текстъёс покчиослы гожтэмын бере, троссэ 7 аресъем нылыным шара лыдӟим. Со ваньзэс вылӥ дунъяны дась вал.

Москваысь Горький нимо литинститутын ды­шет­скись Софья Князева

________

— Чеберлыко литератураез кылысь кылэ берыктӥсьлы дышетскисько ке но, текстъёсты ӟучысь удмуртэ берыктонъя опытэ ӧжыт. Соин та конкурслы туж шумпотӥ, асме эскерыны малпай. Нырысь ик вань ӟуч текстъёсты учкыса потӥ, собере нылпи литератураез берыктон сярысь статьяосты лыдӟи. Собере гинэ уж борды кутски. Бырйи пӧртэм тубатъёсысь текстъёсты. Озьы нылпи литератураез берыктонлэсь шӧмзэ золгес шӧдӥ кадь. Малпасько, умой берыктон понна аслыд пинал кадь малпаськыны быгатоно. Бадӟым тау вераме потэ вожвылъяськонэз радъясьёслы. Туж оскисько, та выллем конкурсъёс азьланяз но луозы.

УдГУ-ысь магистратураын дышетскись Евгения Гусоргина

________

Та вожвылъяськон сярысь тодӥ
«ВКонтакте» вотэс бамысь. Соку ик учки, аресэя тупасько-а, уг-а. Сайтлэн системаез малы ке кутсконысеныз пумозяз курдатъяз, тӥляд арлыдды уг ни тупа шуыса. (Евгениялы 21 арес.) Озьы ке но мон текстъёсты удмурт кылэ берыкъяны кутски. 7 веросэз берыктӥ. Эшшо троссэгес лэсьтысал, дыры öз тырмы. Та уж мыным сыӵе кельшиз!
Текстэз лыдӟисьлы валамон но чебер карон сы-ыӵе бадӟым мылкыд сётэ вылэм! Малпасько, текстэз берыктыку, астэ автор интые пуктоно. Нылпиослы гожтэм текстъёсты берыктыку, пиналлэн синмыныз учкыны багатоно, ӧжытак ке но психолог луоно. Туж оскисько: берыктэм текстъёсы нылпиослы кельшозы! Удмуртсэ, ӟучсэ сяна, мон фин но немец кылъёсты тодӥсько. Табере мынам со калыкъёслэсь но литературазэс удмуртэ берыктэме потэ.

Удмурт Дунне
By Удмурт Дунне 19 июня, 2020 14:35