Кык кечез куто. Декретын пуконлэн пайдаез сярысь

Удмурт Дунне
By Удмурт Дунне 1 июня, 2020 13:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Нылпи утись анайёслы дышетскыны юрттэ Интернет.
Туспуктӥз Виктория КРАМОВА

Нылпиосынызы пукись анайёс выль профессилы дышетскыны быгато дунтэк. Таӵе луонлык сётэ «Демография» нацпроект. Туэ та программа улсын тодон-валанзэс будэтозы яке выль удысэн тодматскозы 480-лэсь ятыр анайёс.

Гижы буясь но пӧраськись

Туэ 5 толэзь ӵоже шаерысьтымы декретын пукись 370 анайёс уже интыянъя центръёс пыр дышетскыны яке тодон-валанзэс будэтыны кутскизы. Нош ар пумозь таӵе луонлыкез уже кутозы оглом 485-лэсь ятыр анайёс. Дышетскон ортче дунтэк. Та понна 28 миллион манет чакламын, унозэ — 97 процентсэ — коньдонэз висъя федерация, кылемез вуэ элькун бюджетысь.

Пичи нылпиосын анайёс понна таӵе программа 2019-тӥ арысен пыӵаны кутскиз. Кылем арын кун чотын дышетскыны быгатӥзы 200 анайёс, ваньзы соос выльдэм тодон-валанъёсын ужазы берытскизы. Туэ программа паськытаз. Азьвыл со чакламын вал 3 аресозь нылпиен доразы пукись нылкышноос понна, соослэн ужан интызы вань ке. Нош туэысен сыӵе луонлыкез кутыны быгато 7 аресозь нылпиосын ужтэк пукись анайёс но (соос уже интыянъя центръёсын одно ик пусйиськемын луыны кулэ ӧвӧл). Нялтас вераса, таосызлы дышетскон дыръязы пичиез тупатэм уждун мында стипендия висъяське на. Дышетскыны мылкыд карись нылкышноослы уже интыянъя центръёсы вазиськоно. Тодон-валан люкан ар ӵоже радъяське.

— Анай, нылпиеныз дораз 3 ар пукыса, ужлэн ӧраз пырыны шугъяськегес, — вера Удмурт Элькунысь мерлыко политикая но ужъя министерствоысь уже интыянъя, нимысьтыз программаосъя, профориентацияя но выль удысъёслы дышетонъя ёзэтысь специалист Елена Ткаченко. — Угось улон шаплы воштӥське, куронъёс но, ужан технологиос но выльдӥсько. Анай, нылпиеныз люкиськытэк, кыӵе ке удысъя тодон-валанзэ муромытыны яке воксё выль профессия басьтыны быгатэ. Собере, школа бере ик нылпи ваем нылмуртъёс вань. Нош нуныен дышетскыны пырыны секыт. Соин та программа уж шедьтыны но юрттэт выллем луэ.

Е. Ткаченко верамъя, анайёс тодон-валанзэс ӵемгес будэто бухгалтер, кадръёсъя инспектор, воспитатель, архивариус удысъёсъя. Курисько вуриськись, санитарка, парикмахер, пӧраськись, эмсузэр луыны. Анайёслы дышетскемзы бере удостоверение яке свидетельство сётӥське. Тодон-валан сёто дышетыны лицензия басьтэм учреждениос гинэ. Кылсярысь, дӥськут вуронъя «Ирида» предприятие, Ижысь вуз каронъя но экономикая техникум, егитъёсын ужанъя «Перспектива» центр но мукетъёсыз.

2 ар ӵоже анайёсты дышетэ ни Ижысь вуз каронъя но экономикая техникум. Кивалтӥсезлэн воштӥсез Татьяна Жигалко верамъя, кылем арын тодон-валанзэс будэтӥзы яке выль удысъя дышетскизы 40 пала кышномуртъёс. Туэ но соос ӧжытгес уз луэ. Кышномуртъёс мыло-кыдо басьто поварлэсь, бухгалтерлэсь профессизэс, дышетско гижы буясе. Нялтас вераса, маникюр лэсьтӥсьлэсь удостоверенизэ басьтэмез бере нылкышно уже интыяськыны уз быгаты шуыса сюлмаськонъёс уг ик кылдо, аслэсьтыд уждэ но усьтыны луонлык вань. Техникум дышетскон радлыксэ доразы пукись анайёслы тупамон карыны сюлмаське. Озьы нылкышноосын коронавирус вӧлмемлэсь азьлогес ик дистанционно амалэн ужаны кутскизы. Анай дышетскыны но, нылпиеныз утиськыны но, корка котырысь ужзэ но лэсьтыны вуттэ.

Эшшо дышетскысал на

Алнашысь Вероника Муканова та вакытэ 3-тӥ нылпиеныз пуке. Солэсь азьвыл Алнашысь нылпи творчествоя юртын методист вал. Туэ март толэзьысен нылкышно выль удысэн — графической дизайнэн — тодматскыны кутскиз.

— Али нылпиелы 1,8 арес, бадӟым ини, соин тросгес дыры кылдӥз, — вера нылкышно. — Малпай: дорын пукон вискын дышетсконо. 2-тӥ нылпиеным пукыкум, кылӥ вал, уже интыянъя центр пыр анайёслэн сыӵе луонлыксы вань шуыса. Алнашысь центрын ӵектӥзы юридической удысъя яке компьютерной технологиосъя тодон-валан басьтыны. Юридическояз нимысьтыз дышетскыны палэнэ ветлыны кулэ шуыса, графической дизайнэз быр-йи. Таиныз дистанционно но тодматскыны луэ, собере, ужея но яралоз. Туала технологиос улонамы зол пыӵало уго, нылпиослы но та удыс тунсыко потэ.

Урокъёсмы арняяз 2 пол ортчо. Дышетӥсь чаклам нуналэ, чаклам дыре урок ортчытэ, дырыз дыръя сое учкыны уд вуттӥськы ке, видео гожтыса лэзё, котькыӵе дыре тодматскы.

Шарканысь Елена Кузьмищевалы толэзь мында кылиз на, парикмахерлэсь профессизэ басьтытозь.

— Дышетскемея мон покчи классъёсты визьнодась, но удысэя интыяськыны ӧй быгаты, — вера нылмурт. — Шарканын уж шедьтыны шуггес. Соин ик пӧртэм интыосын тырши. 2-тӥ нылпиеным декретэ потэме бере тодӥ, анайёс выль удысъя тодон-валан басьтыны быгато шуыса. Озьы уже интыянъя центрын ӵектӥзы парикмахерлы дышетскыны. Февральысен арняяз кӧня ке пол асьме черкогуртамы ик урокъёс ортчо. Тани ӝоген дышетсконмы йылпумъяськоз ни, киямы свидетельство сётозы. Дышетскеме сярысь тодыса, тодмоосы но ӵышкиськыны я буяськыны черодэ султӥзы ни. Мон эшшо но кытчы ке дышетскысал на, мае ке выльзэ тодэм потэ, дышетскем мултэс уз луы, малпасько.

________

Ангелина СНИГИРЁВА

Удмурт Дунне
By Удмурт Дунне 1 июня, 2020 13:20 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<