Кызьы Надежда Иванова коронавируслэсь йӧнатӥськиз

Удмурт Дунне
By Удмурт Дунне 3 июня, 2020 14:15
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Надежда Иванова (нимыз-тулыз воштэмын) та нуналъёсы выльысь ужаны потӥз. 2 арнязэ со коронавируслэсь йӧнатӥськиз.

Кышномурт сменаосын Ижысь больницаын ужа санитарка луыса, улэ шоркарлы матысь гуртын.
Туспуктэм: udmdunne.ru

Кышномурт сменаосын Ижысь больницаын ужа санитарка луыса, улэ шоркарлы матысь гуртын. Ужзы огсыр мынэ вал, больницаязы обсерватор усьтытозь.

— 23-тӥ апрельысен Удмуртие палэнысь вуэмъ­ёсты больницаямы интыязы, пӧлысьтызы одӥгез висе вылэм, солэн кыкетӥ анализэз положительной луиз, — тодаз вае кышномурт. — Соку ик вань ужасьёсты но эскеризы, 25-тӥ апреле буйгатӥ­зы, пӧ­ламы висисьёс ӧвӧл шуыса. Шумпотонмы кемалы вылымтэ: 28-тӥ апреле одӥ­гез ужасьмы черлаз. 29-тӥ апреле сменае вал, та нуналэ вань ужасьёслэсь нош ик анализ басьтӥзы. Ӵуказе ӵукнаяз сменае быриз, но бертыны ӧз лэзе. Быдэс нуналэ дыго-мого ортчиз, ӝытазеяз лэзизы ик. Ярам, город транспортэн уг ветлӥськы, пие нуэ-вае. Гуртэ кошки но, аслам сюлэмы дыр-р куалекъя. Ӵукнаяз жингыртӥзы: тӥляд, пе, анализды урод. Температурае сокем бадӟым ӧй вал, нош ӵуказеяз ньылоны кутӥз, шоканэ пытсаськыны кутскиз.

Луэм учыр сярысь кышномурт али ганяк вера, нош соку, пе, улон пурысь буёлэн шобырскиз. «Скорое» жингыртэм. Кышномурт Дэриысь больницаын эмъяськиз. Бӧрысь тодӥз ини, ӵош ужась 6 эшъёсыз пӧлысь 3-ез коронавирусэн черламын шуыса, пӧлазы вань секыт висись­ёсыз но.

— Мыным туж удалтӥз: пневмония ӧй вал, соин ик, лэся, висёнэ капчиенгес ортчиз, — веранзэ азьланьтэ Надежда. — Оло, сокем ӧй куалектысал ке, шоканэ ӧй пытсаськысал. Больницаын кыллён — со чиданлыкез эскерон выллем. Ӟигар ӧвӧл, нош тынэсьтыд быдэс арня ӵоже нуналлы быдэ кыӵе ке анализъёс басьто. Эмъ­ясьёслэн чиданзылы тау кароно, вань висисьёсыз умой эскеро, сюлмасько. Пӧламы котькыӵеез вал, секыт висисьёсыз но. Палатаямы ми
4 кузя кыллимы: 50, 60, 62 но 70 аресъем нылкышноос.

Надежда Ивановалэн ваньмыз умой ортчиз. 2 арня йӧнатӥськемез бере сое дораз лэзизы. Вань анализъ­ёсыз умой шуыса, ӵуказеяз уже потыны куризы ни. Нош кин ассэ умой шӧдэ, но анализъёсыз уродэсьгес, сыӵеослы, пе, эшшо 2 арнялы больничной сётӥзы. Капчи виси шуэ ке но, Надеждалэн висёнэз ачиз сярысь тодаз вайытылэ: изжогаен курадӟе, шоканы секыт луылэ. Больницаысь потыкуз, озьы ик вераллям вылэм, 2-3 арнязэ чидано луоз шуыса.

Надежда Ивановаез больницаысь выписать каризы ке но, дораз бертыны со ӧз дырты.
Угось та вакытэ кузпалыз черламын. Нырысетӥ анализъёсыз солэн но умоесь вылӥллям, берло ини коронавирус шуиллям. Температураез ӧвӧлэн дораз эмъяське.

Секыт висёнэз адӟем кышномурт та вие эшшо но чакласькисьгес луэмын. Транспортын, магазинын ялан маскаен. Кызӥсь-кизьнылӥсьёсты кылэ ке, сюлмыз шымырске, талэн коронавирус, дыр, шуыса. Ваньзэс алэ: эмъясьёслэсь верамзэс санэ басьтоно, киосты ӵемгес миськоно. Коронавирус палэнтӥ ортчоз шуыса кышкатэк пуконо ӧвӧл, со артэ ветлэ, чакласькись луоно.

________

Валентина ЕМЕЛЬЯНОВА

Удмурт Дунне
By Удмурт Дунне 3 июня, 2020 14:15 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<