Кызьы кыда вуоно врач. Студентъёс коронавирусэз вормыны юртто

Related Articles

• Ӟечезлы оско 0 29.Дек
• Ӵуказе Алнашын Ашальчи Оки нимо премиез сётозы 0 03.Апр
• Солдатлэн анаезлы юрттозы 0 24.Авг

Кияса ёросысь Уддяди гуртысь Ирина Тукаева Ижысь медициная академиын 5-тӥ арзэ дышетске ни. Ар пала медсестра луыса Ижысь 8-тӥ больницаын ужа. 28-тӥ апреле та больница кутскиз нюръяськыны шаерамы вӧлмись коронавирусэн.

— Кызьы вуид медицинае?

— Медициная академие дышетскыны мыныны анай-атае ӵектӥз, мон ӧй но пумитъяськы кадь, тунсыко вал, мар со сыӵе адямиез эмъян. 1-тӥ-3-тӥ курсъёсын дышетскон секыт сётӥське, малы ке шуоно тон пумиськиськод соин, маин азьло тодмо ӧй вал, кутске выль улон. Нырысетӥ курсъ­ёс вуоноезлы инъет. Соку ваньзэ гижысь-пиньысь ды­шетӥськод уен-нуналэн, нош 4-тӥ курсысен вань со тодэмдэ валаны кутскиськод, эскерыны, ачид сэрттыны-пертчыны.

Ужаны кутскеме бере валай, льӧль очкиосты куштоно шуыса. Тужгес но секытэз мон понна — адямиосын огкыл шедьтон. Висисьёсын вераськыны быгатоно, куддыр психолог но кариськоно. Но со дыре ик соослэсь улонзэс, висёнъёссэс ачид пыр поттоно ӧвӧл, соку мылкыд ӝог быре, уж бурдъямысь дугдэ. Адямиос пӧртэмесь ук, куддыръя соослы ӟечгес карыны выриськод но урод кылъёс пумитад кылӥськод.

— Коронавирусэн ны­ры­­се­тӥ висисьёс кылдэм бере кыӵе мылкыдъёс каръяськизы академиысь студентъёс пӧлын?

— Эпидемия Россие ву­эм бере ик валамы, студентъёслы, медсестраослы, эмъясьёслы капчи уз луы шуыса. Мукет вузъёс каллен-каллен кутскизы дистанционной амалэ выжыны, нош ми, самоизоляциез ялытозь, азьвыл сямен ик дышетскимы. Милемлы шуи­зы: Удмуртиын туж трос висисьёс кылдӥзы ке, бадӟым курсъёсысь сту­дентъёсты ыстозы боль­ницаосы врачъёслы юрт­тӥськыны. Ӵош дышетскись эшъёсы кышкатскизы
ик кадь, тросэз вераны кутскизы: милемыз нокин кужмысь ужаны уз потты! Пумитъяськизы. Нош мон больницаын ужасько ни вал бере, со сярысь ӧй малпаськы. Ужано луиз ке, ужало, малпай.

Али озьы ик дистанционно дышетскиськомы, сес­­симы но озьы ик ортчоз. Кин али ужа, практикалэсь моз­мытозы.

Озьы ик вань мылкыд карись студентъёс, заявление гожтыса, ужаны быгато. Тодэмея, тросэзлэн сыӵе мылкыдыз вань. Но али эпидобстановка туж шуг ӧвӧл, соин ик врачъёслэн кужымзы тырме.

— Тӥлесьтыд больницадэс ковид-центрлы пӧр­­мы­тозы шуыса тодӥд но кышканы ӧд кутскы-а?

— Висёнлэсь ӧй кышка, тросгес сюлмаськи, кызьы ужмы радъяськоз. Таӵе югдурен нырысьсэ пумиськимы, соин ик валанмы ӧй вал, мар но кызьы луоз. Азьло вань медсестраос асьсэ отделениосазы ужазы: терапия, гинекология, неврология… Нош али 2 профиль гинэ кылиз: хирургия но терапия. Вань мукет отделениосмес огазеязы.

Котькуд отделение ас сяменыз ужа вал ук, мон, терапиысь медсестра, кыш­касько вал хирургие келялозы шуыса, перевязка лэсьтыны косозы. Бен, мон быгатӥсько сое лэсьтыны, но отын практика кулэ, ваньзэ валано, йырын возёно. Нош милям сьӧрамы телефонмы гинэ но ӧвӧл, нокытысь ӝогак учкыны. Асьмелэсь вань котырмес ми мукет кабинетэ кельтӥськомы.

Зэм, нырысь секыт вал. Выль сямен ужаны кутскеммы бере ми доры вайизы карантинэ пытсам больницаысь висисьёсты, соослэн коронавирус шараямын ӧй вал.

Мыным неврологиысь пациентъёс сюризы: тросэз соос пӧлысь уг ветло, кыллё. Процедура лэсьтон понна аслым соосты берыкъяно, ӝутъяно… Кужыме уг тырмы. Эшшо защитной костюм ужез секытгес каре. Зэм, бӧрдон калэ но вуылӥ.

Али ми доры ваё коронавирусэн черламъёсын кусып воземъёсты. Соос пӧлысь кин ке гуртаз пуке, карантинын, нош кинлэн хронической висёнъёсыз вань, ми дорын эмъясько.

Ужан сменамы сутка кыстӥське. Бригадаын 4 медсестра, вошъяськыса 2 кузя 4 час ужаськомы, 4 час ял кариськомы.

Быдэс больница кык­лы люкемын — «чылкыт» но «горд» зона соосты шуиськомы. Вань котырмес кельтӥськомы «чылкыт» люкетэ, отын ик ял кариськомы. «Гордаз» ужаськомы, отчы нимысьтыз костюмтэк пырыны уг яра.

Нимысьтыз комнатаын ми дӥськутмес вош­тӥськомы. Защитной кос­тюм улэ огпол кутӥськись костюм дӥсяськомы. Ни­мысьтыз медсес­тра эс­­кере, шонер-а ми дӥсясь­киськомы.

Костюмен ужаны шуг: маска ымнырез пачкатэ, нырысетӥ нуналаз ик ныр вылы гордэктӥз, кемагес соин ветлӥськод ке, яра ик кылдэ. Костюм пушкын мынам куддыр клаустрофобия (сюбег, пичи, ворсаськем интыослэсь кышкан) но кутскылэ.

Со сяна, дышем ужмы ӧз но воштӥськы кадь.

— Нош кызьы па­циентъ­ёстэс эскерыса во­зиськоды? Коронавируслэсь утиськоды?

— Котькуд выль пациентлэсь ми коронавируслы мазок басьтӥськомы: ымысьтыз но нырысьтыз. Анализ 3-4 нунал лэсьтӥське. Больницаысь выписать карон азьын но тест лэсьтӥськомы на.

Пациентъёс кыллё огъя палатаосын, котькуд нунал соослы маска сётъяськомы, температуразэс мертаськомы. Температуразы ӝутске ке, яке кызыны кутско ке, нош ик коронавируслы эскериськомы.

Ваньзы коронавирусэн висисьёсын кусып возе­мын бере, кышкан вань, висён вӧлмоз, милемлы но паласькоз шуыса. Но та дырозь милемлы одӥг положительной тест но ӧз вуы на. Нош висись кылдӥз ке, сое нуозы Ижкарысь инфекционной больницае яке Дэри больницае, малы ке шуоно соос дась коронавирусэз эмъяны, нош милям сыӵе луонлыкъёсмы ӧвӧл.

— Эмъясьёслы луонлык сётӥзы гостиницаосын улыны…

— Бен, милем соку ик со сярысь веразы, мылкыдды вань ке, гостиницаын улыны быгатӥськоды, шуизы. Кин мае бырйиз, кин ке озьы ик смена бере дораз бертылэ. Нош ми, общежитиын улӥсь студентъёс, соку ик выжимы гостиницае, общежитие, сомында калык пӧлы, вирус вайимы ке…

Гостиницаын, конечно, общежитиен ӵошатыса, ваньмыз умойгес. Огнам улӥсько, бадӟым валес вылын кӧласько, вань телевизор, душ, мисьтӥськон понна черодын уг сылӥськы.

Нуналаз 3 пол сюдо: ӵукна, нуназе, ӝытазе. Вань порциос контейнеръёсы ты­ремын, ми соос дуре огъя залэ васькаськомы.

Ужаны милемыз нулло пичи автобусъёсын, сменаысь но озьы ик ваё.

— Мар тыныд сётӥз та вакыт?

— Зэмзэ ке, мон али ужаммылэсь ӟеч палъёссэ адӟисько. Выль югдур, выль амалъёс, чакласькод, кызьы ваньмыз радъяськыны быгатэ карантин дыръя. Кин тодэ, мар милемыз азьланяз вите. 5-тӥ курсын дышетскись студент понна та бадӟым опыт. Сомында ар дышетскисько ни, но али гинэ йырам валан пыриз: врачлэн ужез калыклы котьку кулэ луоз!

________

Мария ЕМЕЛЬЯНОВА