Куно карем понна — коньдон

Удмурт Дунне
By Удмурт Дунне 29 июня, 2020 14:21
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Куно карем понна — коньдон

Нылпи юртъёсысь семьяосы огдырлы басьтэм пиналъёс хозяйство нуыны дышетскизы.
Туспуктӥз Юлия АЛЕКСЕЕВА

Нылпиослэн но пересьёслэн юртъёсысьтызы пиналъёсты, инвалидъёсты, огназы кылем арлыдоосты коронавирус вакытлы бордазы басьтӥзы шаерысьтымы сюлмо адямиос. Соослы кунмы тау карыса уксёен юрттӥськыны кутскиз.

Калыкез улон-вылонын утён политикая но ужъя министерство ивортэмъя, таӵе выплатаос чакламын министерстволэн бурд улаз ужась учреждениосын улӥсь сирота нылпиосты, инвалидъёсты, арлыдоосты бордазы басьтэм адямиослы, соос 1-тӥ апрельысен 30-тӥ июнёзь ичизэ 7 нунал та учреждениосысь муртъёсты доразы возизы ке. Та сярысь постановление кутӥз Россиысь Правительство 30-тӥ мае. Выплатаос сётъяны кутскемын вал 9-тӥ июньысен. Уксё вуэ Пенсионной фондысь. Отысь социальной выплатаосъя специалист Татьяна Кравцова верамъя, ватсаса коньдон басьтыны быгато нимысьтыз реестре сюрем адямиос гинэ. Сое кылдытэ Калыкез улон-вылонын утён политикая но ужъя министерство.

— Кунмы сюлмо адямиослы тау карыны туж ӟеч амал шедьтӥз, — вера калыкез улон-вылонын утён политикая но ужъя министр Татьяна Чуракова. — Нокин но азьлапал уг тоды вал, та понна уксё вуоз шуыса. Озьы апрель, май ӵоже шаерысьтымы 91 мурт 113 адямиез утьыны дораз басьтӥз, соос пӧлысь 86-ез — нылпиосты.

Министрлэн пусъемезъя, та ласянь уката висъяськизы Красногорск нылпи юртысь ужасьёс, озьы ик адӟем карымон луизы Сюмси ёросысь Орловскойысь нылпи юртысь ужасьёс. Нылпиос но
арлыдоос оскымон, министерствоен эскерем адямиос доры сётъямын вал.

Красногорскысь нылпи юртын 33 пинал улэ — ваньзы соос паласькись висён уката лекъяськон вакытэ, апрель толэзе, быдэс арнязэ семья-
осын ортчытӥзы.

— Кышкытлык кылдӥз, оло, ми, ужасьёс, асьмеос но валатэк, нуналлы быдэ сопала-тапала ветлыса, нылпи юртэ чер ваём шуыса, — вера нылпи юртлэн кивалтӥсезлэн воштӥсез Ольга Филиппова. — Соин малпамы: пиналъёсты семьяосамы басьтыса, висёнэн ӧжытгес пумиськон учыръёс луозы. Собере, ёросамы элькун Гурт шудонъёсты
ортчытонлы бадӟым лэсь-тӥськон мытэмын вал, соин валче кӧня ке нунал тылтэк улысалмы. Соин вань ужасьёсмылы вазиським, оло, кин ке нылпиосты дораз кутыны быгатоз шуыса. Ум но малпаське вал, но ваньмыз 15 ужасьёсмы — дышетӥсьёсмы гинэ ӧвӧл, вуриськисьёсмы, утялскисьёсмы но — соглаш луизы. Озьы соос 20 нылпиез бордазы басьтӥзы, мукетъёссэ пиналъёсты кутӥзы ӵыжы-выжыоссы.

Ольга Филиппова ачиз но 1 пиналэз бордаз басьтӥз.

— Басьтэм нылпи но аслам пиналы одӥг школаын 5-тӥ, 6-тӥ классъёсын дышетско, ог-огзэс азьвыл но тодо вал, — азинтэ О. Филиппова. — Соин пинал выль адямиос пӧлы сюриз шуыны уг луы. Соос ваньзэ ӵошен лэсьтӥзы: урокъёссэс дасязы, ужаны потазы. Мукет семьяосын но озьы ик, котькуд пинал маин ке пичи ке но выриз. Соку ӵапак сад-бакчаын ужан вакыт тупаз: кин ке рассада кизиз, мукетъёсыз утялскизы. Озьы нылпиос адӟизы, мар со сыӵе семья, кызьы отын уло. Азьланяз, малпасько, та соослы юрттоз, угось кинэ ке семьяе басьтозы, мукетъёсыз асьсэос куке-соку семья кылдытозы. Нокудмы, конечно, ӧм но малпаллялэ, та понна кун ласянь нимысьтыз юрттэт вуоз шуыса. Но ваньмы туж шумпотэмын, ужмес дунъязы шуыса.

Красногорск нылпи юртысь дышетӥсь Юлия Алексеева бордаз 4-тӥ но 8-тӥ классъёсын дышетскись 2 агай-вынъёсты кутылӥз, пичиез инвалид.

— Семьяе мынам туж умой, атаймы лякыт, вераськись, нылы ачиз дышетӥсь луыса тырше. Соин 2 пиосты кутыны пумит ӧй вал. Кузпалы нырысетӥ нуналаз ик пиосын огкыл шедьтӥз, нылы бадӟыменыз пияшен ӵош урок лэсьтылӥз. Мон пичиезлы гуртысь ужзэ быдэсъяны юрттылӥ. Пиос асьсэ мылкыдзыя теплицаез копазы, отын мерттӥськизы, туж яраз соослы кеч, курег сюдыны.

Можгаысь нылпи юртын 50 нылпиос уло, та нуналлы 10-эз семьяосын кунояло на. Отысь дышетӥсь Марина Воробьёва верамъя, коронавируслэсь азьвыл но нылпиосты «куноятӥсь семьяосы» сётъяллязы. Нош паласькись висён вӧлмон вакытлы 9 нылпиез ӵыжы-выжыоссы басьтӥзы, 3-зэ — мукет семьяос.

Якшур-Бӧдьяысь школа-интернатэ дышетскыны ветло артысь ёросъёсысь нылпиос. Огзэ нылашез быдэс гужемлы бордаз басьтӥз Эгралась татчы нылзэ дышетскыны нуллӥсь анай.

— Та нылашъёс куспазы эшъясько, соин школа-интернат бордын улӥсез Эграе ӵемысь куное вуылэ, — вераз дышетӥсь Василий Фефилов.

Балезиноысь нылпи юртысь 12 нылпиез 10 семья кутӥз. Директорлэн воштӥсез Елена Антабаева верамъя, юртын улӥсь нылпиослэн ӵыжы-выжыоссылы вазиськемын вал. Озьы 10 нылпиос огдырлы басьтэмын вал.

________

Ангелина СНИГИРЁВА

Удмурт Дунне
By Удмурт Дунне 29 июня, 2020 14:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<