Куке мынам выны вордскиз. Анастасия Орловалэсь вероссэ берыктӥз Софья Князева

Удмурт Дунне
By Удмурт Дунне 30 июня, 2020 16:24
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Куке выны вордскиз

Куке мынам выны вордскиз, со вал шӧтэм но абдрамон. Весь кисыръяськыса кесяськылӥз. Но мон дӥсьтӥсь вал — чупай сое. Шыпыт куараен со мыным тау шуиз.

Куке выны пичи вал

Пичи выны номыр карыны ӧз быгатылы. Берыкъяськыны гинэ но. Соин мон солы котькуд нунал вералляй: «Бур пала берытскид ке — сезьыен мешок басьтод». Кык толэзь ортчыса, берытскиз ук — сыӵе сезьы веръямез потэм!

Куке выны кӧня ке будӥз

Кӧня ке будыса, выны коть­кытӥ ньыльпыдъяськыса ветлыны дышиз. Но то­дӥсь­­коды-а, мар уродэз? Шудонъёсме шедьтыса нюлыны кутскиз. Мынам туж воже потылӥз! Мынам сы­ӵе воже потылӥз! Машинаосме берен басьялляй! Черекъялляй: «Эн поны ымад!», нош со аслэсьтыз ка­рылӥз. Соку мон ку­­тӥ шальтыртонъёссэ (погремушкаоссэ) но син азяз ик ваньзэ нюлӥ. Быдэс гурезь шудонъёссэ ню­лӥ! Нош вынылы нокытчыяз но ӧз йӧты…

Чебер кыл

Огпол песянае, йырзэ ӵыш­кы­са, мон доры куное вуиз, нош йырсиосыз — я горд нюжа, я сьӧд. Мон паймыса верай:

— Тон, баба, тигра кадь чебер!

Песянае шуиз:

— Тау!


Ву шапыкъёс

Огпол паркын прудэ кӧльы куясько. Ярдур меӵ, анае, киме кутыса, монэ зол возе, медам усьы шуэ. Нош атае возе анайме. Тани мон туж умой кӧльы шедьтӥ. Туж бад­ӟым! Ву шапыкъёс кыдёке лоб­ӟозы! Мон кӧльыез мырдэм вы­лӥе ӝу­тӥ, шоналски но — из лобиз. Во­зись­кеме ӧз лу: кӧльы сьӧры ачим но лоби, нош мон сьӧ­ры — анае, анае сьӧры — атае. Озьы ми ваньмы ог-огмы сьӧ­ры вуэ усим. Бен, ву шапыкъёс кыдёке пазьгиськизы.

Тёмалэн шортикез

Толон анаеным вуж тус­пуктэмъёсты учкыса пуким.

— Учкы, учкы! — шуисько. — Мон Тёмалэн шортикеныз!

Кызьы озьы пӧр­миз: мон лӥял вылын сы­­лӥсь­ко вынылэн шортикеныз, кызьы со мыным тупаз?

Яратӥсько селекъяны

Пичи дыръям мон шуылӥ: «сек нян», «кӧс нянь» интые, но «кысал», «сакыр» интые, но нокин ӧз серекъялля. Нош малы, куке выны шуэ «пеникъёс», «преникъёс» интые, но «но-но», «нонон» интые, мон кӧт бордам ку­тӥськыса ик горисько?!

Яра­тӥсь­ко селекъяны!

Цунами

Толон азбарын мон адӟи, кызьы Волга Каспий зарезе усе! Оп, тэтчи соос вамен. Озьы Евразиез быдэсак ортчи. Нош али мон азьын океан!.. Кенер вадескысен кутскыса, быдэс тротуар кузя Америкаозь кыстӥське. Туж бадӟым, пыдэстэм — сыӵе шыпыт, ворекъясь но вольыт!

Но тани океан шортӥ джип ортчиз.

Соку мон валай, кытысь цунами потэ.

Бур но паллян

Куке но мон выри вал, пуньыез паллян киям кутыса, ӝук сиыны. Паллян киы сы­ӵе куалекъяз–дырекъяз — ӝуке ӝӧк вылэ ик усьылӥз, нош пуньые ым вадьсытӥм кош­кы­лӥз. Соку мон малпай паллян киыным котырет суреданы, но киы дышымтэ вылысь сыӵе дырекъяз — котырет интые, кы­ӵе ке бышкаськись ӵушъял пӧр­миз.

«Кыӵе со пӧрмостэм. Пичи на ай, — малпай мон паллян киы сярысь. — Иське, бур киы бадӟымгес, дыр!»

Вуз каронниын

Огпол песянаеным магазинэ мынӥм. Мон, бадӟым но дӥсь­тӥсь, азяз мынӥсько. Лавкаын оломаин но вуз каро: емышъёсын но, кияръёсын но, печенняосын, кампетъёсын, курегпузъёсын, колбасаосын, чайёсын. Котырамы оломар мында адями. Берме учкисько но — песянае ӧвӧл!

— Песяй, мон татын! — урмы­са кесяськисько, ачим ик пельтэм кылисько вал. Интыям сылоно, дыр, но мон азьлань но азьлань мынӥсько.

— Песяй, мон татын! — эшшо но золгес кеськыса, визьтэммыса бызисько.

— Песяй, мон… мон… та…тыыын! — бӧрдыны кутскеме бере гинэ дугдӥ. Соку тӥни песянае монэ шедьтӥз. Со мон сьӧ­ры кемалась бызьыса мынэ ни вылэм, сутыны гинэ уг быгаты. Мон бадӟым ук, пыдъёсы мынам ӝог бызьыло.

Чорыгпиос

Ми чорыгпиос басьтӥм!

Вуз карись соосты пластик стаканэ понӥз, пытсэтэн ворсаз.

Нырысь чорыгпиос малпазы, соос Ӵуж зарезе сюризы шуыса, угось ми стаканэз ӵуж пакетын нуим.
Собере малпазы, вузуркан кутскиз шуыса, угось ми тубат кузя тубим.

Берло ми соосты аквариуме кисьтӥм, озьы чорыгпиос вуберганэ шедизы! Соос ӝог дышизы выль улон интызылы. Куалялюльызы но соослэн вань — котырзэс миськись пылесос!

Микроб сярысь

Кырсь ки вылад пельтӥд ке, лобӟыса кошкозы гижытэм микробъёс гинэ. Нош кидэ майталэн зырад ке, гижыен микробъёс но канализацие гыл­ӟыса кошкозы. Микробъёс пурысесь но ӝожмытэсь.

Утялскись

Алигес пельыным мар ке луиз. Мон шуисько: «Анай, мынам пелям ӵашетэ, утялскись ӵу­же кадь». Анае малы ке серекъяны кутскиз. Мон куатаськыса шуисько: «Уд ос­киськы ке — ачид кылзы!» Со нош ик серекъя. Соку мон выны доры мы­нӥ. Со понӥз пельзэ мынам пельы борды но шуэ: «Бен, зэм, кин ке утялске! Сӥзьыл куаръёсты ӵу­же!»

Айы коӵыш яке мумы коӵыш?

Азбарын выны шуак кеськиз:

— Мумы коӵыш, горд му­мы ко­ӵыш! Учкы!

Нош мон шуисько:

— Кыӵе со тыныд мумы коӵыш, айы коӵыш со!

— Малы?

— Айы коӵышъёс — кӧесь, нош мумы коӵышъёс — восьтэтэсь, веськресэсь. Учкы ай, солэн ымнырыз но тяп-тяп воргоронлэн кадь!

— Шонер вераськод, пияш! — куажырес куараен вазиз айы горд коӵыш.

Удмурт Дунне
By Удмурт Дунне 30 июня, 2020 16:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<