Кикыкатаез адӟе уйвӧтъёсаз. Кез ёросысь Пётр Бутолин паймымон будосъёсты будэтэ

Удмурт Дунне
By Удмурт Дунне 18 июня, 2020 16:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кез ёросысь Гулейшур гуртысь Пётр Бутолинлэн бакчаяз 200-лэсь ятыр яблокпуос, трос грушапуос, виноград будо. Аспӧртэм сяськаосыз но вань, уноез Россиысь но Удмуртиысь Горд книгаосы пыртэмын. Паймымон будосъёсты фотое пуктылэ. «Мон гуртын улӥсько» конкурсамы ыстэм туспуктэмъёсыз лыдӟисьёсмылэн сюлэмазы пыризы.

Кез ёросысь Гулейшурысь П. Бутолин.

Удмурт Мичурин

— Биологлы но, агрономлы но дышетскеме ӧвӧл, — вера Пётр Витальевич. — Но гуртын будэмын бере, инкуазез яратон вирам пыӵамын. Дедуше но бадӟым яблокпу сад возьылӥз. Пичи дырысеным будосъёсты эскерыны яратӥсько. Бускельмы трос аръёс ӵоже бакчаяз кукуруза будэтӥз. Колхозын но сое кизьылӥзы, сюрес дуре усьыса кылем кидысъёсты дорам мерттӥ, кыедай, будэмзэс чаклай. Собере ас поннам виктория будэтӥ, со ческыт но трос емышеныз шумпоттылӥз, сикын будӥсь яблокпуосты но вайыса бакчаямы мерттылӥ. Будосъёс сярысь трос книга лыдӟылӥ. Тодэме улонам трос пол юрттылӥз.

Атыкай музъемез утёнлы 12 арме сётӥ. Нырысь Северодвинскын служить кари, подводной лодкаысь приборъёсты, ядерной боеголовкаосты эскерылӥ. Бӧрысь Дальний Востоке куриськи. Отысь докторенымы ялан споръяськылӥм: со уг оскы вал, сикысь будосъёс адямиез эмъяны быгато шуыса. Одӥг пол лодкаысь ӝыныез матросъёс черлазы — кӧтсы вияны кутскиз. Доктормылэн эмъюмъёсыз быриллям, басьтыны нокытысь. Соку командирмы мыным вазиськиз. Сике ветлыса, кӧт виямлэсь турын-куар бичай но чай пари. Юрттӥз.

Армия бере берытски вордӥськем палъёсам. Нырысь колхозын ужай. Гулейшур хозяйствомы зол вал со вакытэ. Берло бускельёсынымы нимаз кариськыса, фермер хозяйство кылдытӥм, собере ас поннам пудо вордӥ. Али пенсиын ини, трос дырме бакчаелы висъясько.

Гектарлэсь ятыр бакчаям 200-лэсь уно улмопу будэ. Нырысетӥ удэз 25 ар талэсь азьло мерттӥ. Бакчаысьтымы арлы быдэ тонналэсь трос яблок октӥськом.
Вузаны но окме. Кылемзэ толбыт, куддыръя сӥзьылозь ик, асьмеос сииськомы, пудомес сюдӥськомы. Порозпиосмы, скалъёсмы, парсьёсмы толбыт яблок вылын будо, сӥльзэс басьтӥсьёс ческыт, небыт шуыса ушъяло. Ялан экспериментировать карисько пӧртэм пумо сортъёсын, ми палъёсын будыны тупасьёссэ кылдытон понна. Тани огез яблокпуэ 40 градуслэсь кезьытэз чиданы быгатэ, Россиын сыӵеез ӧвӧл на. Кӧня ке толэз та яблокпуэ ортчиз ни, емышсэ но сииськом ни. Но али сюлмаськисько яблокез выль урожаёзь йорк-йорк мед кыллёз, ческыт шӧмо мед луоз шуыса, магазинысь басьтэмезлэсь медаз висъяськы. Эшшо али вырисько колоновидной яблокпуэз выжыятон бордын — со лапег, но емышъёсыз модос бордаз туж трос пото. Солы трос реклама каро, вузало, но ми палъёсын та писпу уггес буды — кезьытъёсты чидатэк, кулэ. Сюлмаськисько чылкыт, нокыӵе ядъёстэк будэтэм, юн золэсь удъёс поттон понна, соос асьсэ коже но нымы-кибыослы сётскыны медаз быгатэ.

Туспуктӥсь но инкуазез утись

— Нырысетӥ фотоаппаратме — «Сменаез» — бадӟым классъёсын дышетскыкум, ӵужапае кузьмаз. Куасэн бызьылыса, сое утэм. Армиын но мон фотограф интыын вал, эшъёсы, командиръёс пӧртэм ужрадъёс дыръя монэ туспуктылыны курылӥзы. Али но сике эшетэк уг мынӥськы. Яратӥсько шыпыт инкуазез туспуктылыны. Кин ке ӝуен шобырскем пограм писпу вӧзтӥ, сое адӟытэк ик, ортчысал, дыр, нош мон алангасарез я кыӵе ке пӧйшурез отысь синйылтӥсько. Ужъёсыным Кез ёросын трос пол адӟытонъёс радъяллямын ини, Кез инкуазь сярысь альбомъёсы но уноез фотографиосы пыртэмын.

Паймымон будосъёсын тунсыкъяськыны кутски армиын дыръям. Дальний Востокын службаме нуыкум, тайгае трос пол ветлылӥ. Со палъёсын будэ туж пайдаё будос — женьшень. Солэсь кидыссэ тэлетӥ пазялляй, ӝужамзэ чаклалляй. Выжызэ Кез палъёсы но вайи вал, но ӧз улӟы. Паймымон сяськаосты табере тыршисько аслам бакчаям но будэтыны, выжыооссэс, кидысъёссэс
почта пыр басьтӥсько. Озьы Дальний Востокын будӥсь кечсинэз выжыятӥ, убоям пумитаны луэ кикыкатаез (венерин башмачок), 5 пумо прострелъёсты (сон-трава), орхидеяосты. Асьме сикъёсын будӥсьёссэ уг вайиськы, соос шоры палэнысен гинэ синмаськыса учкисько.

Гужем вуэ гинэ, мылкыд куриське сике. Палаткаме кутӥсько но быдэс нуналлы ышисько. Но туж кысык вакытэ, турын калтон дыръя, конечно, тазьы ветлыны дыры уг окмы. Мон нимысьтыз нокыӵе будосъёсты утчаса уг ветлӥськы, соос асьсэос монэ шедьто. Куддыръя соос мынам уйвӧтам лыкто. Яке сикетӥ вамышъякум маке дугдытӥсь шеде: я вай дэмӟиське, я мар ке канжаськытэ. Тодӥсько ини: та интыын маиз ке но вань.

Гулейшур котырын Чупчи кузя 3 инкуазь памятник вань. Отын пумиськыло Россиысь Горд книгае пыртэм 10 пала но Удмуртиысь Горд книгае пыртэм 30-лэсь ятыр будосъёс. Полом котырысь сикез нимысьтыз утёно интыос пӧлы пыртоно вал. Со сярысь кӧня ке ар ӵоже сюлмаськисько ни. Татысь ог 1 сюрс гектар сикез утёно, шер пумиськылӥсь будосъёс, пӧйшуръёс сяна, дорамы вань на вашкала удмуртъёслэн улэм интыоссы.

Удмурт шаерын Полом котырысь гинэ шедьтэмын Россиысь Горд книгае пыртэм камнеломка болотная, любка зеленоцветковая, рододендрон. Эшшо ми палан туж чебер но аспӧртэм кикыкатаос вань. Саркосома шаровидная нимаськись губи 7-8 ар ӵоже одӥг пол гинэ губизэ сётэ. Мыным удалтӥз сое туспуктыны. Россиысь Горд книгае пыртэмын лобария лёгочная но — та аспӧртэм ӝуйы (лишайник), зӧк (бадӟым) будэ. Нош тусыз вожектӥсь турын-куарлы кельше. Сплахун красный ӝуй Удмуртиын юн шер пумиськылэ. Нырысь шедьтыкум, сое губи кожай, угось векчи модосъёс вылын губилэн кадь ненег гинэ изьыосыз вань. Кӧня ке шедьтосъёсме тодосчиос тодманы ӧз быгатэ на. Кыӵе ке выль будосэз синйылтӥсько ке, вазиськисько Удмурт кун университетысь тодосчиослы. Соос картаосы пусйыло выль шедьтэмъёссэ.

Озьы ик сикъёсамы уло шер пумиськылӥсь пӧйшуръёс, тылобурдоос, нымы-кибыос. Кылсярысь, неясыть бородатая шуиськись кучыран толалтэзэ гинэ Удмуртие вуэ, гужемзэ лесотундрае кар лэсьтыны, пи поттыны кошке. Чупчи шур дуре каръяськыны ярато Россиысь Горд книгае пыртэм кулик-сорокаос, кроншнепъёс.

Шер пумиськылӥсь будосъёс пыдлось сикъёсын вань на, отчы адямилы шуг вуыны. Мон уг шуиськы, таӵе интыосты тросгес кароно. Мынам вераме потэ, ваньзэ ке но утьыны мед быгатомы. Паймымон интыосты эсэпсэ валатэк кораны но, лёганы но уг яра.

________

Ангелина СНИГИРЁВА

Удмурт Дунне
By Удмурт Дунне 18 июня, 2020 16:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<