Карта вылын — 100 инты

Удмурт Дунне
By Удмурт Дунне 19 июня, 2020 15:58

«ДаУР!» вожвылъяськонлы йылпумъянъёс лэсьтэмын. Отчы вуизы шаерысьтымы 350-лэсь уно тунсыко интыос сярысь гожъямъёс но туспуктэмъёс. Ваньзы соос пусъемын Удмуртилэн карта вылаз.

Аспӧртэмлыко интыос пӧлысь тужгес адӟем карымонэз луиз Дэри ёросысь Удмурт ботанической сад, сое дэмлаз Николай Орлов.

Конкурсэ вуэм ужъёс возьмато инкуазьмылэсь узырлыксэ, шаерысьтымы адӟем карымон музейёсты, паркъёсты но трос мукет данъяськымон интыосты. Ваньмыз соос поттэмын даур.рф вотэс баме, пыртэмын нимысьтыз онлайн-картае. Озьы Сюмси ёрос вылэ зӥбыса, адӟыны луэ Муки-Какси гуртысь Чёртово тыэз, Дэри ёросысь трос адӟем карымон интыос пӧлысь шедьтӥськомы Удмурт ботанической садэз, Балезино ёросысь — Гуръякар дорысь удмуртъёслэсь вашкала шайвылзэс. Нош кӧня эшшо тунсыко интыос вератэк кылемын на!

Вормисьёс 5 номинациын быръемын: интыен герӟаськем учыр, инкуазьлэн тусыз, туспуктэмъёсын сузьет, аспӧртэмлыко инты но адӟем карымон юрт/объект сярысь гожтэм. Интыен герӟаськем учырзэс тунсыко вераллям Данил Соловьев, Екатерина Кондратьева но Дарья Рябова. Данил Пичи Пурга ёросысь Тройча нимо ошмес дуре вуылэм, Екатерина «Тень Алангасара» кино лэсьтэм интытӥ поръям, Дарья мадем сибирь лайкаосты вордӥсь питомник сярысь.

Ершовской дубрава. Туспуктӥз Денис Вахрушев.

Шаерысьтымы аспӧртэм-лыко интыос пӧлысь тужгес адӟем карымонэз луиз Дэри ёросысь Удмурт ботанической сад, сое дэмлаз Николай Орлов. Озьы ик Сарапул ёросысь «Морок» кебит-музей, со сярысь гожтӥз Александра Муратдымова но Уваысь географической центр, таин тодматӥз Ольга Верняева.

— «ДаУР!» проект Удмуртиез выль сямен усьтӥз, вормисьёсты бырйыны тыршим, нырысь ик турист сярысь малпаськыса. Аспӧртэмлыко интыос пӧлысь пусйимы Удмурт ботанической садэз. Отын шумпотыса шутэтскозы инкуазез яратӥсьёс, нош дышетӥсьёс нылпиослы урокъёс ортчытыны быгатозы, — вера Экономикая министерство бордысь Туризмъя но туристъёсын ужанъя управленилэн кивалтӥсез Юлия Железняк.

Тунсыко интыосты дэмлам сяна, адямиос со сярысь гожъязы но. Таос пӧлын но вормисьёс быръемын вал. Наталья Платонова паймытӥз Эгра ёросысь Бачкейысь «Этапный пункт» сярысь гожтэменыз, Владимир Трефилов мадиз Яр ёросысь Дикой ты сярысь, Полина Куликова гожтӥз Алнаш ёросысь Байтэрекысь Екатерина II дыръя мерттэм тыпыос сярысь.

Алнаш ёросысь Байтэрекысь Екатерина II дыръя мерттэм тыпыос.
Туспуктӥз Полина Куликова

— Конкурсэ мон ёросысьтымы 2 инты сярысь гожтыса лэзи: со Екатерина II вакытэ мерттэм тыпыос но Улӥысь вуко, — вера Полина Куликова. — Байтэрек гуртысьтымы Центральный урамлэн пумаз тыпыос будо, отын коркаос ӧвӧл ни, сюресэз горд сюй. Отӥ Сибире нуись сюрес ортче вылэм. Ми палан солэн дуртӥз тыпыос мерттэмын вылэм, кытын ке — кызьпуос. Малпасько на вал мадьыны Асан тымет дорысь Токаревка бырем гурт сярысь — отысь тыметын али юсьёс уло — но ву улэ кылем Голюшурма сярысь, но ӧй вутты ни. Нокин но соос сярысь гожтымтэ, жаль.

Инкуазьлэсь чеберзэ фотое быгатыса пуктэм Денис Вахрушев, солэн туспуктэмъёсысьтыз адӟыны луэ Сарапулысь Кам дурысь инкуазез. Юлия Булатова возьматӥз Кияса ёросысь Карамас-Пельга гуртлэсь аспӧртэмлыксэ, Николай Сойнов — Дэри ёросысь Болтачево гуртысь лэйкась выжез.

— Устооссэ бырйыны шуг вал. Туспуктэм лэсьтон понна адямиос, оло, юромо Удмуртиез котыръяны потӥллям. Озьы мон, даур.рф вотэсбаме пырыса, «вуылӥ» кадь Ижкар палась водопад но Кизнер ёросысь Аббат гыркъёс доры, — вера «ДаУР!» проектлэн кивалтӥсез Гульназ Гырдымова.

Жюри сяна, конкурсэ вуэм ужъёсты дунъяз на калык но. Котькуд адями висъяны быгатӥз 10 кельшымон интыосты. Куара сётонэ огъя 4 сюрс адями пыриськиз. Озьы быръемын вал шаерысьтымы 100 тунсыко инты!

________

Мария ВЕКШИНА

Удмурт Дунне
By Удмурт Дунне 19 июня, 2020 15:58
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<