Капчи улонлэн урод палъёсыз. Ку лэсьто ЭКО?

Удмурт Дунне
By Удмурт Дунне 16 июня, 2020 10:00
Одӥг ар ӵоже нылпи уг сюры ке, специалистъёслы вазиськоно.

Нылпи вайыны быгатӥсьтэм семьяослэн лыдзы арысь аре йылэ. Маин со герӟаськемын? Мар кароно кузпалъёслы, нылпи кема уг сюры ке? Та пумысен кенешимы Европаысь, Россиысь Репродуктологъёслэн огазеяськонъёссылэн ёзчиенызы, вылӥ категориен гинеколог-репродуктологен, медицина наукаосъя кандидатэн Ольга Шестаковаен.

— Егитъёс кӧня ке ар ӵоже ӵош уло, нылпи сюронлэсь уг утисько, нош пиналзы ӧвӧл но ӧвӧл. Кӧня дыр ортчыса, кузпалъёслы та пумысен сюлмаськыны кутсконо?

— Кузпалъёслы 1 ар ӵо­же пинал уг сюры ке, озьыен, дыр вуэмын специалистъёслы вазиськыны. Таӵе учырын ӟечгес луоз репродуктолог доры мыныны. Ӵапак соос котыр ласянь эскеро нылкышнолэсь но, воргоронлэсь но тазалыксэс, шараяло, ма муген нылпи уг сюры. Но монэ паймытэ таиз: кузпалъёс кыло ке «репродуктолог» кылэз, кыӵе ке пумитъяськон мылкыдзы кылдэ. Шуо: ой, ЭКО (эмбрионэз пробиркаын кылдытон) лэсьтыны милемлы вазь на, милям асьмелэн ваньмыз пӧрмоз. Малпало, лэся, та специалист ЭКО лэсьтонэн гинэ выре шуыса. Но со озьы ӧвӧл. Котькудӥз репродуктолог нырысь ик сюлмаське, кузпалъёслы асьсэ кожазы нуны мед шедёз шуыса.

Элькунысьтымы Тазалыкез утёнъя министерство нуны вайыны быгатӥсьтэм паръёслы визь-кенешен юрттэ. Репродуктологъёс, андрологъёс (пиосмуртлэсь тазалыксэ эскерисьёс) вуыло шаермылэн пӧртэм инты­осаз, калыклы дунтэк консультация сёто. Мон но кӧня ке ёросъёсы потай. Коронавирусэн йырин та ужмес уретоно луиз, но югдур тупатскиз ке, со борды выльысь басьтӥськом.

Мар монэ гуртъёсын паймытӥз? Нылкышноослэн, уг вераськы ни воргоронъёс сярысь, тазалыксы пумысен тодон-валанзы туж ичи. Городъёсын та ласянь югдур ӟечгес. Огпол тани дорам лыктӥз 32 аресъем нылкышно: нуны, пе, уг сюры, куд-ог дыръя толэзьёсын вир кошкыса улэ. Гуртысьтызы фельдшер вирзэ орсмытӥсь эмъюмъёс юыны косэм но тӥни. Озьы тӥни улэ но улэ нылкышно, оскыса, куке но нуны вайыны кылдоз ай шуыса. Но кышномурт понна дырлэсь номыр но дуноез ӧвӧл. 35 арес бере угось яйцеклеткаос пересьмыны кутско, нуны сюрыны луонлыкъёс арысь аре кулэсмо. Со сяна, арлыд люкамъя яйцеклеткаос борды лякисько хромосомной висёнъёс, озьы нылпи, кылсярысь, Даунлэн синдроменыз вордскыны быгатоз.

Нуны уг сюры 4 мугъёсъя:

  • Эндокринной фактор. Нылкышнолэн вир кошкон дырыз ого-пало ортче, яичникъёсаз кистаос кылдо, мугорыз кӧй яке укыр начар.
  • Нуныгумыос. Нылкышнолэн кӧтулыз ялан висе, тужгес но зол со палыз, кудпалаз воспаление кутскемын. Вамышъякуз но вӧсь луэмез шӧдэ, пиосмуртэн матысь кусып возьыкуз но.
  • Нуныкар. Менструация дыръя туж трос вир кошке, орсмыса, комокъёсын. Яке со туж начар — кӧня ке шапык. Воргоронэн матысь кусып возьыкуз, нылкышнолы вӧсь луэ.
  • Пиосмурт. Воргорон уг ик тоды, кидысэз урод шуыса. Угось нылкышноен кусып возьыкуз, ваньмыз ӟеч, кидысэз кисьтӥське.

— Вераны луоз-а, шаерысьтымы кӧня адямилэн бесплодие?

— Кӧня ке ар талэсь азьло гинэ 15 процентэз семьяос нылпи вайыны
ӧз быгатэ. Туннэ та лыдпус
20 процентозь ӝутскемын ни. Огъя Россиен ӵошатоно ке, со
3 процентлы ятыргес.

Мар бордын мугез? Нырысь ик, калык дышиз ни капчи улыны: машинаен ганяк ворттылыны, компьютер
я телевизор азьын пукыны,
полуфабрикатъёсын, фастфудэн кӧтсэ тырыны. Бордазы ватсано на юон-кысконэз. Макем ӧжытгес адями выре-бызьылэ, сокем вирыз уродгес ветлэ. Вирсэръёс уродмо бере, варикоз кылдэ, воргоронъёслэн пиосмурт кужымзы кулэсме, нош нылкышноослэн гормонъёссы сурасько. Со сяна, уноез куаё. Таӵе нылкышноослэн но, воргоронъёслэн но нылпи сюронлы кулэ луись гормонъёссы уг тырмо. Консультацие лыкто но ӝожтӥсько, нылпи ваеммы уг луы шуыса. Ӵектӥськом тазалыксы борды басьтӥськыны, нырысь ик — восьмыны. Нош соос аналско, курадӟеммы, пе, уг поты — лэсьтэ милемлы ЭКО. Но эшшо огпол верасько на: та амал тупа, кузпалъёслэн кыӵе ке секыт патологиоссы шараясько ке.

Кыкетӥез: туала нылъёс туж вазь кутско воргоронъёсын матысь кусып возьыны. Озьы нылаш быземезлэсь азьло кӧня ке пиосмуртъёсын кушласькемын луэ ни. Инфекциос паласько, висёнъёс кутско.

Нуныгумыос (маточные трубы) адямилэн йырсиез зӧкта гинэ. Соослэн пушказы синлысъёс порма рецепторъёс вань. Соос воргорон кидысэн герӟаськем яйцеклеткаез нуныкарозь (матка) вутто, ӵапак отчы ик юнматӥське эм­брион. Нуныгумыослэн иммунитетсы ляб, соин ик отчы инфекция шеде ке, гумы лякиське, яйцеклетка сперматозоидэн пумиськыны
уг быгаты.

— Шаерамы тыр­мыт-а висъясько ЭКО лэсьтыны квотаос? Кинлы нылпи ва­йыны кун ласянь юрттэт сё­тӥське?

— Шумпотымон, нылпи вайыны быгатӥсьтэм паръёслы туала технологиос юртто шуыса. Та амалэн шаерамы вордскемын ни
3 сюрслэсь ятыр нылпиос. Тужгес но пусйымон, малпасько, кунлэн та ласянь юрттэмез — квотаосты висъямез. ЭКО угось дунтэм
уг сылы, кун юрттытэк, тросэз сое лэсьтыны ӧй быгатысалзы.
Но жаляса верано, уноез,
тужгес но гуртын улӥсьёс, та сярысь чик уг тодо. Озьы ик уло пиналтэк, мурт нылпиослы вожъяськыса.

Берло аръёсы юрттэт сётон эшшо паськытаз. Ог 8 ар талэсь азьло квота сётӥське вал нуныгумыостэк кылем нылкышноослы гинэ. Нош 2017-тӥ арысен та юрттэтэз басьтыны быгато ни уно мукетъёсыз но: шуом, воргоронлэн кидысэз урод ке, кузпалъёслэн аутоиммунной висёнъёссы (иммунитет мугорлы пумит антителоос кылдытэ) вань ке, нылкышно нуныкартэк кылемын яке нуныкарлэн пушкысьтыз эндометрий урод но таин сэрен со борды эмбрион кырмиськыны уг быгаты ке, но трос мукет. Пиосмуртлэн кидысэз урод ке, ЭКО борды эшшо ИКСИ ватсаське на: нырысетӥ учырын яйцеклеткаез уно миллион сперматозоидъёс пӧлы интыяло ке, кыкетӥяз сое герӟало тужгес таза, нимаз быръем сперматозоидэн.

Туала технологиос юртто таӵе учыръёсы но: нылкышнолы нылпи шеде, но кӧня ке улыса, ялан усе. Эскеронъёс возьмато: ыштэм пиналъ­ёсызлэн котькудӥзлэн кыӵе ке хромосомной висёнзы вылэм. Инкуазез уд пӧя угось. Та учырын но юрттэ ЭКО: яйцеклеткаоссэ басьто, кузпалызлэн кидысэныз огазеяло, кылдэм эмбрионэз висёнъёслэсь сузяло но нылкышнолэн нуныкараз интыяло.

Но луэ тазьы но: нылкышнолэн уг тырмы АМГ гормонэз. Со возьматэ, кӧня кылемын на яйцеклеткаосыз. Сое нокыӵе эмъюмъёсын ӝутыны уг луы. Гормонэз 1-лэсь ичи ке, иське, запасэз ичи, климаксэз матын. Таӵе дыръя ЭКО уг лэсьто, ӵекто доноръёслэсь яйцеклеткаоссэс, таизлы но квота висъяське.

Вераны кулэ, квотаос тырмыт висъясько. ОМС пыр висъяськись квотаосын шаерамы ужа 3 клиника. Нылкышно улон интыезъя поликлиникаын гинеколог дорын эскериське, нуны ваемез уг луы ке, озьыен, приёме лыктоно та клиникаосы. Соос анализъёс лэсьтозы, бесплодилэсь мугъёссэ тодозы. ЭКО гинэ юрттыны быгатэ ке, квота басьтыны документъёс люкалозы.

________

Елена НИКИТИНА

Удмурт Дунне
By Удмурт Дунне 16 июня, 2020 10:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<