Ижын тупатъямын луозы удмурт югдытӥсьёслэн синпелетъёссы

Удмурт Дунне
By Удмурт Дунне 26 июня, 2020 13:35

18-тӥ инвожое «Удмурт Кенеш» огазеяськонлэн исполкомез ортчиз. «Кенешчиос» сяна, ужрадэ пыриськизы Кун Думаысь депутат Алексей Загребин, Удмуртиысь йӧскалык политикая министр Лариса Буранова, Ижкар администрацилэн йырызлэн воштӥсез Дмитрий Чистяков, Лулчеберетъя министерствоысь ёросъёсын кусып возись ёзэтлэн кивалтӥсез Зинаида Никитина.

Туспуктӥз Наталья Михайлова

Азьвылэз кенешон ортчиз вал онлайн амалэн, та рад исполком, пандемилэсь куронъёссэ чакласа, ортчиз Ижкарысь удмуртъёслэн яратоно интыязы — Кызьпу арамаын. «Удмурт Кенеш» огазеяськонлэн тӧроез Татьяна Ишматова тодэ вайытӥз:

— Та интыез умоятон-утялтон сярысь вераськонъёс кемалась мыно ини. Кылем арын со пыриз городысь 10 тупатъяно интыос пӧлы — со понна куара сётыса дурбасьтӥз калык. Но малы ке ужъёс уг кутско…

— Город администрацие Кызьпу арамая трос пӧртэм ӵектонъёс вуо, кин ке татын шулдыръяськон парк, нылпи площадка, кин ке стадион пуктыны ӵектэ, но ми валаськом, та инты туж дуно удмуртъёслы, соин ик дурбасьтӥськом «Удмурт Кенешлэн» проектэзлы. Кызьпу арамаез одно выльдомы, тупатъян ужъёс мынозы, тӥлесьтыд мылкыддэс лыдэ басьтыса, — оскытӥз Дмитрий Чистяков.

Дмитрий Чистяковлэсь «кенешчиос» озьы ик юазы: малы удмурт кыл нош ик ышиз городысь афишаосысь, социальной рекламаысь? Берло аръёссэ бадӟым праздникъёс азьын ӟечкыланъёс, бадӟым ужрадъёс сярысь ивортонъёс 2 кылын луо вал, нош туэ удмуртсэ нош ик вунэтӥзы… Дмитрий Александрович вераз, юромо озьы лэсьтэмын ӧй вал, праздникъёс азьын огыр-бугыр луэмен сыӵе янгыш кошкемын. Азьланяз таӵе учыръёс уз луэ ни, кылзэ сётӥз Д.Чистяков.

Вунэтытэк кельтыны уг луы мукет валтӥсь ужпумъёсты но. Туэ армы быдэсак сӥземын удмурт кунлыклэн 100 ар тырмонэзлы. Лариса Буранова соин валче ортчоно ужрадъёсын тодматӥз. Жаляса верано, пандемиен сэрен туж трос малпам ужрадъёс уз ортче. Кылсярысь, туэ нырысьсэ ортчытытэк кылиз Гербер, но оскем потэ, гужем шулдыръяськонтэк калыкмы уз кыльы шуыса, — вераз министр. Али Выль праздниклы дасяськон мынэ. Со азьвыл чаклам интыын — Вавож ёросын — 22-тӥ гудырикошконэ ортчыны кулэ. Но со потоз коронавирусэн югдур бордысь.

Туспуктӥз Наталья Михайлова

Шумпотымон, чаклам ужрадъёс улсын Кузебай Гердлэн, Трокай Борисовлэн но Иосиф Наговицынлэн синпелетъёссы тупатэмын луозы шуыса. Соосты выльдон шуркынмонозь йылпумъяны чакламын.

Уксё висъяськоз Кузебай Герд нимо йӧскалык музейлы но, пусйиз Зинаида Никитина. Туэ музейлы но 100 ар тырмоз. Озьы ик лэсьтон-тупатъян ужъёс азьланьтӥсько Йӧскалык библиотекаын. Али солы ним утчало. Кин ке ӵектэ Владимир Ленинлэсь нимзэ берыктыны, кин ке — Александр Пушкинлэсь нимзэ сётыны, нош «кенешчиос» дэмлало валтӥсь библиотекаез Владимир Короленкоя ниманы. Уго со гожьяськись но вал, калыкмы понна но трос лэсьтӥз. Солы памятник но библиотека азьын туж тупасал, интыяз луысал.

Ёросъёсын но выльдӥськон ужъёс нуисько. «Огъя Россия» партилэн проектъёсыз улсын кытын ке быдэсак тупатӥсько, кытын ке ӝутӥсько культура юртъёс.

Калык туж оске, висён палэнскоз но улонмы нош ик огсыр азинтӥськоз. Соку юмшан дыръёс но берытскозы.

Наталья Михайлова

Удмурт Дунне
By Удмурт Дунне 26 июня, 2020 13:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<