Зинаида Рябининалэн яратоно книгаосыз

Удмурт Дунне
By Удмурт Дунне 30 июня, 2020 15:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Ингожлэн» выль рубрикаяз Удмуртиысь тодмо адямиос верало яратоно книгаоссы сярысь. Рубрикаез мытэ «Удмурт дунне» газетлэн валтӥсь редакторез Зинаида Рябинина.

______________________________________

Михаил Булгаков «Мастер и Маргарита» (18+).

Лыдӟи, дыр, 3 пол, но котьку мон понна усьтӥськылӥз пӧртэм сямен, котьку ас поннам маке выльзэ шедьтылӥ. Туж аспӧртэм роман, отын сурамын ваньмыз: шумпотон но ӝожомон, яркыт яратон но веднаськон, касъяськон но кыл кутон…Трос геройёс, котькудӥз малпаськытэ: мар сётӥд тон Дуннелы, маин со тыныд берыктыны кулэ?

Цитата: «Ноку номыр эн курелэ, тужгес но — тӥлесьтыд кужмоосызлэсь. Асьсэос ӵектозы но сётозы»

Александр Дюма «Граф Монте Кристо» (12+).

Приключениосты туж ик уг яратӥськы. Но таиз туж яраз. Сюжетэз лэсьтэмын зэмос учыр вылын. Иф замокысь узник Эдмон Дантес пытсэт улысь мырдэм мозмытскыны быгатэ но, аслаз городаз берытскыса, зэмлык понна нюръяське, пунэмзэ берыктэ…
Цитата: «Нуналын 24 час, котькуд часын — 60 минут, минутын — 60 секунд, нош 86 сюрс 400 секунд ӵоже луэ сомында лэсьтыны… »

Марина Цветаева. Кылбуръёс (12+).

Со утьылӥз монэ секыт вакытъёсы, улэм потымтэ дыръёсы но, шумпотонлэсь мылкыд уртчыку но. Одӥг мукет поэтлэсь но сыӵе зол сюлэмы уг вырӟы. Куддыр потэ, ми соин одӥг вакытэ улэмын, эшъяськемын. Яратӥсько котькинлэсь зол! Вань удмурт сямлы туж тупась мылкыдъёсыз-малпанъёсыз. Кылсярысь, удмурт калык кырӟанын: «Сьӧд дэреме жаль уг поты, жаль солэн верам кылыз». М. Цветаевалэн: «…Жаль не слова, поверь, и не взора, Только тайны утраченной жаль…» («Мы с тобою лишь два отголоска» кылбурысь).

Семён Самсонов «Выжыкыл ӧвӧл та» (6+).

Сӥземын Сарапулын вордӥськем нылмурт кавалеристлы Антонина Пальшиналы — со, Надежда Дурова сямен ик, Сарапулысь пегӟиз, пиосмурт дӥсяськыса, казакъёслэн полказы ожмаськиз но георгиевской кавалер луиз. Та нырысетӥез удмурт книга, кудӥз монэ паймытӥз но историен герӟаськем литератураен, шаертодонэн тунсыкъяськытӥз.

Удмурт Дунне
By Удмурт Дунне 30 июня, 2020 15:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<