Дэбес ёрос: Генерал дорын куноын

Удмурт Дунне
By Удмурт Дунне 25 июня, 2020 15:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Дэбес ёросысь Тольён муниципал кылдытэтын «Генеральская гос­тиная» проектэз улонэ пыӵато. Со сӥземын Быдӟым Вормонлы 75 ар тырмонлы, озьы ик герӟаськемын генерал-майорлэн Фёдор Городиловлэн нимыныз.

Дэбес ёросысь Тольёнысь «Генеральская гостиная» проектлэн одӥгез кылдытӥсез но улонэ пыӵатӥсез Г. Бойкова.
Туспуктӥз Руфима Ложкина

Фёдор Иванович вордӥсь­ке­мын 1912-тӥ арын Дэбес ёросысь Наговицыно гуртын. Финской оже ветлэмын. Быдӟым Отечественной война дыръя Берлинозь вуэмын. Горд Кизили, Отечественной война, Горд Кизили, Горд Знамя, Ленин нимо, «Знак Почёта» но мукет орденъёсын но медальёсын пусъемын. Вань улонзэ военной техникаез азинтон бордын тыршиз, Москваын улӥз, 1989-тӥ арын улонысь кошкиз.

Солы сӥзьыса, муниципал кылдытэтысь Тольён, Лесагурт но Турнес библиотекаосын но Варниысь школаын нимысьтыз сэрегъёс усьтэмын. Тужгес но узыр экспозиция люкамын Тольёнын. Татын «Генеральская гостиная» проект быдэсъяське. Солэн одӥгез кылдытӥсез — Тольён школаысь музеен кивалтӥсь Галина Бойкова.

— Музеямы Фёдор Городилов сярысь узыр материал люкамын, — шуэ Галина Петровна, — нош мынам сое трос адямилы возьматэме потӥз. Та вакытэ со сярысь гуртоосмы гинэ тодо шуыны луоз. Сюлмаськонэ сярысь верай муниципал кылдытэтэн кивалтӥсьлы Любовь Белослудцевалы. Со ик ӵектӥз биб­лиотекаямы Ф. Городиловлы сӥзем висъет лэсьтыны но «Генеральская гостиная» проект дасяны.

Проект кылдытон борды ӵошен басьтӥськизы. Ёрос конкурсын ужзэс вылӥ дунъязы но улонэ пыӵатон вылысь 30 сюрс манет висъязы. Со коньдонэн Тольёнысь библиотекае стеллажъёс, шкафъёс, чебер штораос басьтӥзы. Озьы ик коньдон висъямын вал Варниысь, Лесагуртысь, Турнесысь библиотекаослы но, Ф. Городиловлы но мукет дано адямиоссылы сӥзем экспозициос дасян вылысь. Юрттӥськизы культура удысын ужасьёс но вань мылкыд карисьёс.

Ф. Городиловлы сӥзем материалъёс трос гинэ. Галина Петровна верамъя, генерал-майор 2-тӥ классозь гинэ Тольёнысь школаын дышетскем. Озьы ке но та школаысь дышетскисьёсын но дышетӥсьёсын юн кусып возем. Пумиськонъёсы ӵем ветлэм, дораз куное ӧтьылэм. Озьы 1970-тӥ аръёсы Тольён школаысь пиналъёс Москвае Ф. Городилов доры ветлӥллям. Со пумиськонысь трос туспуктэмъёс, тодэ ваёнъёс кылемын. Ваньмыз соос альбомъ­ёсын ӝикыт возисько. Отчы ик
люкамын генераллэн гожтэтъёсыз но.

Туж тунсыко учкыны Фёдор Ивановичлэсь война вакытэ лэсьтэм туспуктэмъёссэ, ӝажы вылын ик возиське генераллэн кузьмам фотоаппаратэз, проигрывателез, календарьлы подставкаез. Озьы ик адӟыны луэ солэсь генерал фуражказэ, орденской планкаоссэ, погонъёссэ но мукет арбериоссэ. Ож сярысь тодэ ваёнъёсыз гожтэмын «В годы мирные и военные» книгаяз, нош дор палъёсыз сярысь — «История деревни Наговицыно» книгаяз.

Тольён, Турнес, Лесагурт но Варни гуртъёсын Ф. Городиловлы сӥзем сэрегъёс аспӧртэмлыкоесь но тунсыкоесь пӧрмемын. Коронавирусэн сэрен калык соосты тыро-пыдо адӟыны ӧз быгаты на, экспозициосын тодматскон радъямын Интернет пыр гинэ, азьланяз одно экскурсиос ортчытозы.

Со сяна, «Генеральская гостиная» проектэнызы тольёнъёс «Лучшие муниципальные практики в Удмуртской Республике» но 1-тӥ июле куара сётон дыръя ортчоно «Определяем будущее вместе» вожвылъяськонъёсы пырисько. Ваньмыз умой радъяськиз ке, библиотекаосын лэсьтӥськон ужъёсты азьланьтыны но компьютеръёс басьтыны малпало.

________

Руфима ЛОЖКИНА

Удмурт Дунне
By Удмурт Дунне 25 июня, 2020 15:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<