Дэбес ёросысь Котегур­тысь библиотекарь: асьмеос ик режиссёр, сценарист, артист луиськомы

Удмурт Дунне
By Удмурт Дунне 29 июня, 2020 16:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Дэбес ёросысь Котегуртысь библиотекарь
О. Лекомцева.
Туспуктӥз Надежда ВОРОНЧИХИНА

Дэбес ёросысь Котегур­тысь библиотекаын 36 ар ужа ни Ольга Лекомцева. Вань сюлэм шунытсэ ужезлы сётэ, книгаос пыр гуртоосты паськыт дуннеен тодматэ.

Ольга Валентиновналэн трудовой книжкаяз одӥг гинэ гожтэмез: Ижысь культ­просвет­училищеез йылпумъяса, та дырозь Котегуртысь библиотекаын ужа.

— Милям ужмы туж трос, — валэктэ Ольга Валентиновна. — Калык пӧлын валэктон уж нуиськомы, выль потэм книгаослы обзор лэсьтӥськомы, пӧртэм адӟытонъёс, ужрадъёс радъялляськомы. Уже туж яра, быгатонлыкъёсмес калыклы возьматыны луонлыкъёсмы трос: асьмеос ик режиссёр, сценарист, артист луиськомы. Туж шумпотӥсько, библиотекае лыдӟиськыны гинэ уг ветло, тросэз асьсэ шумпотонзэс верало, сюлмаськытӥсь ужпумъёссэс сэртто. Мукет интыын ужаны но ӧй быгатысал, дыр.

36 ар талэсь азьло Котегуртысь библиотекае вуыса, Ольга Валентиновналэн мылкыдыз ӧжытак куашказ вал: интыез пичи, пеймыт, кезьыт. 2 этажъем юртлэн нырысетӥ этажаз библиотека вал ке, 2-тӥ этажаз — колхоз контора. Со вакытэ библиотекалэн фондаз 7 сюрслэсь ятыр книга лыдъяськиз, нош али 5 сюрслэсь ятыргес. Ог дас ар ортчыса, библиотекаез выжтӥллям медпунктлэн юртаз. Лыдӟиськыны яратӥсьёс понна эркын интыын нимысьтыз зал усьтӥзы вал, но юртсы куашкан калэ вуыса, 2019-тӥ арын, библиотекаез выжтӥзы школае. Интыез татын но ушъямон ик ӧвӧл, куд-ог висъетъёсысь вӧлдэтэз пыкъямын ни.

— Ма бордысен ужаны кутски, отчы ик вуи кадь, — шуэ библиотекарь. — Озьы ке но библиотекаын ноку но буш уг луы, газет-журналъёсты бугыръяло нылпиос, бадӟымгес пиналъёс дорам шергес пырало, соос Сюрногуртысь школае ветло.

Азьвыл аръёсы библиотекае пырасьёслэн лыдзы 300-лэсь ортче вылэм ке, табере 230 мында гинэ. Ольга Валентиновна пӧртэм арлыдъем нылпиос понна арняяз 2 пол ортчытъя «Почемучка» но «Весёлые посиделки» кружокъёс. Экологиен, пудо-животъёсын, пӧйшуръёсын тодматско, фольклор праздникъёс ортчытъяло. Озьы ик со пиналъёслы юрттӥське шаертодонъя исследовательской ужъёс лэсьтыны. Кылсярысь, 8-тӥ классэз йылпумъям Рената Усковалэн ужез герӟаськемын вал гуртысьтызы дано адямиосын. Вторник нуналъёсы библиотекае «Надежда» клубазы люкаськыло кырӟаны яратӥсь арлыдоос.

Дӥняз калыкез люканы арысь аре шуггес луэ бере, библиотекарь ачиз доразы вамыштэ, книга кутыса, сьӧрлось Косолюк гуртэ но вуылэ. Муниципал кылдытэтсы ёросысь тужгес пичиез луэ бере, выль книгаос ичи вуо — араз 2-3 книга, арлы одӥг пол шаертодонъя литература вуэ на.

— Куд-ог дыръя мукет ёросъёсысь эшъёсмылы но, юрттэт курыса, вазиськиськомы, — шуэ Ольга Лекомцева. — Книгаосты почта пыр но келясьёс вань.

Юрттӥсьёс шедё, арлы быдэ ог 30-40 книга адямиос дорысьтызы ваё. Туала амалъёслэсь но бере кылёно ӧвӧл. Компьютерен ужано луэ, видеороликъёс лэсьтыса пӧр­тэм конкурсъёсы келяно. Валамон, ваньзэ со лэсьтэ аслаз юрт­тӥсь­ёсы­ныз — лыдӟиськыны яра­тӥсь­ёсын — ӵош.

Котегуртын лыдӟиськыны яратӥсьёс вань. Кылсярысь, тужгес арлыдоез — 84 аресъем Людмила Корепанова. Валентина Шкляева но Валерий Максимов вожмаськыса лыдӟисько, соос ас вакытаз «Труженик» колхозын ужамын. Озьы ик библиотекае ӵемысь пырало Котегуртысь школаын ужась дышетӥсьёс.

________

Надежда ВОРОНЧИХИНА

Удмурт Дунне
By Удмурт Дунне 29 июня, 2020 16:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<