Дышетӥсьёсты дасясь дышетӥсь

Удмурт Дунне
By Удмурт Дунне 18 июня, 2020 11:46
Можга педколледжысь дышетӥсь Т. Иванова.

Туннэ, 18-тӥ июне, 60 арес тырме Можга педколледжысь удмурт кылъя но литературая, та предметъёсты дышетон методикая преподавательлы Татьяна Сергеевна Ивановалы.

Татьяна Сергеевна вордӥськемын Можга ёросысь Вуж Ягул (Юбера) гуртын, 5 пинал пӧлысь со куинетӥез вал. Кӧня ассэ тодэ, весь дышетӥсь луэмез потылӥз. Йылпумъяз Можга педучилищеез, Удмурт кун университетэз.

Педучилищее ужаны со 1986-тӥ арын вуиз. Со дырысен нокытчы ӧз кошкылы ни. Огдышем урокъёс нуэм сяна, студентъёс понна со трос яркыт ужрадъёс ортчытъя, тодмо писательёсты, тодосчиосты, композиторъёсты, суредасьёсты ӧтчалля, соосын пумиськонъёс, юбилей ӝытъёс радъялля, литературно-творческой кружок нуэ.

Татьяна Сергеевна трос тырше пособиос, учебникъёс кылдытон бордын. Со 1-тӥ-4-тӥ классъёслы лыдӟиськонъя учебникъёслэн соавторзы луэ, покчи классъёсын лыдӟиськонъя методпособиослэн авторзы. Висказ вуттэ газет-журналъёсы статьяос гожъяны. 15 ар ӵоже Можга городысь калык театрын шудӥз, «Такъян» клуб усьтӥз, пыриське «Удмурт Кенеш» огазеяськонлэн ёросысь ёзэзлэн ужаз, удмурт кылэз дышетонъя курсъёсты нуэ .

Уно данъетъёсын пусъемын ке но, улон шоры паймыса, нылпи синмын учкыны быгатэ. Сыӵе ик луыны кулэ, дыр, покчи классъёслы дышетӥсьёсты дасясь дышетӥсь…

Ӟечкыласьком!

Выль вормонъёс тӥледлы!

Т. Борисов нимо педколледжын дышетӥсь луыса 34 ар ӵоже ужа ини Татьяна Сергеевна Иванова.

Татьяна Сергеевна — визьмо специалист. Солэн удмурт кылэз но литератураез дышетон методикая тодон-валанъёсыз туж бадӟымесь. Со Удмурт Элькунысь калык дышетӥсь нимын пусъемын, Удмуртиысь дано дышетӥсь, Россиысь калыкез дышетонъя отличник. «Лыдӟон книга» учебниклэн, методикая пӧртэм пособиослэн соавторзы, А. Оки но Т. Борисов нимо премиослэн лауреатсы.

Гажано Татьяна Сергеевна, вань сюлмысьтымы ӟечкыласьком тӥледыз та юбилеен! Сӥзиськом котьку таӵе ик мыло-кыдо, ужез гажась, анай кылэз вань сюлмысь яратӥсь, удмурт калык-
лэсь сям-йылолъёссэ утись луыны! Тӥляд мылкыддылы луыса быдэсъясько трос проектъёс, студентъёс гажало асьсэ выжызэс, калыксэс, кылзэс.

Азьланяз но тазьы ик ужаны мед быгатоды, педколледж-
лэн нимыз ӟеч ласянь гинэ мед кылӥськоз. Ас азяды пуктэм ужпумъёсты котьку мед быдэсмозы! Ужды пайдаен гинэ мед берытскоз!

Выль вормонъёс тӥледлы, юн тазалык. Мылкыдды мед тырмоз на трос тунсыко ужъёсты вырӟытыны, котьку азьлань мыныны.

Можгалась Т. Борисов нимо педколледжлэн коллективез

Тау, тӥ вань шуыса!

Али кадь ик син азьын: 17-тӥ аудитория, 32 студентъёс пуко партаос сьӧрын, доска азьын ӝужыт каблукен пичи мугоро Татьяна Сергеевна. Со, пе, милям классэн кивалтӥсьмы луоз.

15-18 арес, пинал мылкыд — юмал йӧлпыд. Анай-атай бордысь кошкыса, ми асьмемыз туж бадӟымесь, улонэз тодӥсь-валасесь кожамы ни. Ас поннамы лэсьтэм нырысетӥ вамышъёс, дышетӥсьлэсь ужзэ эскерон. Со вакытэ ик гуртлэсь мӧзмыса бӧрдон, нокинлы ивортытэк быдэс группаен нюлэс мерттыны мынон, уез-уйбыт кизилиосты лыдъяса поръян но ӵуказеяз урокын вушйылыса пукон, нырысетӥ яратон но люкиськон… Дышетсконмес быдтэммы бере 25 ар ортчиз ини, кыӵе юмалэсь ми вал соку! Кыӵе тӥледлы, Татьяна Сергеевна, милемын секыт, но со вакытэ ик тунсыко вал, дыр!

4 ар ӵоже кин гинэ тӥ милемлы ӧй вал. Анай интые небыт кылъёс верады, чурыт атай кылын интыямы пуктылӥды, сузэр-апай кадь лӥятӥды, сюлэмшугъяськонъёсмес эш кадь кылзӥды, визь-кенеш сётӥды.

Но котьку ик тӥ вал Дышетӥсь! Анай кылэз гажан мылкыд пыӵатӥды, валэктӥды, кызьы урокез тунсыко но пайдаё ортчытоно, пиналлэсь лулпуш дуннезэ узырмытоно. Вань удмурт классъёсысь студентъёслы тӥ тужгес но матысез дышетӥсь луиськоды. Нылпиосмы будо, табере ми капчи сюлэмын соосты тӥляд бурд улады дышетскыны келяськом.

Туж бадӟым тау, Татьяна Сергеевна, тӥ милям улонамы вань шуыса!

Можга педучилищеез 1995-тӥ арын йылпумъям
4-тӥ «А» группа

Паймытъямысь медад дугды

Татьяна Сергеевнаез нырысьсэ «пумитай» «Дась лу!» газетлэн бамысьтыз. Таня Николаева газетлэн одӥгез усто гожъяськисез вал. Собере Можга педучилищеысен пумиським. Ми, 4-тӥ курсын дышетскисьёс, 1-тӥ курсэ лыктэмъёслэн шефъёссы луимы. «Покчиос» пӧлын лапег гинэ мугоро Таня Николаева вал.

Матысьгес тодматским ни, литературая кружоке ветлыкумы. Озьы кылдӥз: Удмурт кун университетын но одӥг группаын Таняен ӵош дышетским. Али но ӟеч кусыпъёс возиськом, эшъёс луиськом.

Татьяна Сергеевна писатель но, тодосчи но луыны быгатысал. Но вань улонзэ вуоно дышетӥсьёсты дасянлы сӥзиз. Усто дышетӥсь, методист, удмурт кылэз утьыны но азинтыны сюлмаськись адями, 3 нылъёслэн анайзы. Можга педколледжын кема аръёс ӵоже ужатозяз, со артист но, писатель-сценарист но, тодосчи но вал ни.

Малпасько, Татьяна Сергеевна тодмотэм шыкысъёссэ азьланяз но усьтоз ай. Сӥзисько солы юн тазалык, ӟеч мылкыд, сайкыт малпанъёс! Студентъёсты, асьмеды тунсыко ужъёсын паймытъяны мед быгатоз. Ассэ ачиз но мед паймытъялоз.

Ульфат Бадретдинов, журналист но писатель

Мусо мамамы но ӵужмамамы!

Ми котьку синмаськыса учкиськом танад ужаны быгатэмед, тыршемед шоры, тынэсьтыд адӟем кариськом. Пичи дыръямы но тон кызьы ке ваньзэ лэсьтыса вуттӥськод вал, уждэ но валаса нуид, милемыз но визьмалляд, утид. Педколледжын студентъёслэсь конспектъёссэс лыдӟыса пукыкуд, мероприятиослы дасяськыкуд, ми ӵемысь вӧзад вал. Нош будэммы бере тонэ дорын возьмамы ни, бадӟым улонлы дасяськимы, корка котырез утялтыны, выж миськыны, сиён пӧраны дышетским но тынэсьтыд мӧзмылӥм. Уждэ туж гажад ке но, милемлы но котьку дыр шедьтылӥд, трос ужъёсты ми тонэн ӵош лэсьтӥськом вал.

Ми понна тон котьку егит, чебер! Туж яратӥськом тонэ, данъяськиськом! Озьы луиз: вань нылпиосыд но внукъёсыд мукет городъёсын уло. Но нуналлы быдэ телефон, скайп
пыр вераськиськом. Оскы-
тӥськом: котьку тонэ шумпоттом вормонъёсынымы, ӵем-
гес вуылыны тыршом. Яратоно ужед кемагес мед возёз,
капчи мылкыд сётоз на, студентъёс асьсэ быгатэменызы мед шумпоттозы.

Тау тыныд, пӧртэм вакытъёсы милемыз бурдъяны, валаны быгатӥськод шуыса, милемын ӵош шумпотӥськод. Тау тыныд юн ӟыгыръямед, лякыт пальпотэмед но дунне вылысь тужгес ческыт табанед понна!

Сӥзиськом тыныд юн тазалык, шуд, капчи мылкыд, выль ужъёс но проектъёс кылдытон, выль гурезьёсы тубон!

Нылъёсыд, эмеспиосыд но внучкаосыд

Яратон бурдъёс

Гажано Татьяна Сергеевна! Вань сюлмысь тау шуиськом уждэс ӟеч быдэстэмды, удмурт кыл но культура понна ӝуась сюлэмды, котькуд студент сярысь сюлмаськемды понна! Тӥ милемыз дышетӥсьлэн улонысьтыз мур кожъёсын тодматӥды, улон сюресэтӥ йыгмыт вамышъяны дышетӥды, сюлэм шуныттэс жалятэк сётӥды!

Шудо адямиез, пе, кык яратон — кык бурд улонэтӥ валто. Нырысетӥез — яратоно уж, кудӥз кужым сётэ яратыны ужлэсь емышсэ, котырысь улосэз, эшъёсыз, шаерез. Кыкетӥез — яратоно мурт но семья, кудӥз бурдъя шоканы, улыны, серекъяны, кырӟаны, пыд улысь музъемез шӧдытэк лобаны. Татьяна Сергеевна, та кык яратонъёс-бурдъёс котьку мед нуозы тӥледыз выль вормонъёс доры, ӝужыт гурезьёс сьӧрысь льӧль инвисъёс доры!

Можга педучилищеез 1996-тӥ арын йылпумъям
4-тӥ «А» группа

Удмурт Дунне
By Удмурт Дунне 18 июня, 2020 11:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<