Горд площадьын — 3 пол «Ура!»

Удмурт Дунне
By Удмурт Дунне 30 июня, 2020 15:40
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Камбарка ёросысь М. Мифтахов 1945-тӥ арын Вормон Парадэ пыриськиз.
Туспуктӥз Разиф МИРЗАЯНОВ

1945-тӥ арын 24-тӥ июне Москваысь Горд площаде люкаськизы 24 маршалъёс, 249 генералъёс, 2 сюрс 536 офицеръёс, 31 сюрс 116 сержантъёс но рядовойёс. Вормонлы сӥзем парадэн ортчем муртъёс пӧлын вал Камбарка ёросын улэм ожгарчи Мисбах Мифтахович Мифтахов но.

Парадэ пыриськыны шуд усиз войнаын геройлыко ожмаськем, 3-лэсь ятыр наградаосын пусъем солдатъёслы. М. Мифтахов войнаез кутсконысеныз пумозяз ортчемын, пусъемын «За отвагу» медален, Горд Кизили орденэн, Отечественной войналэн 2-тӥ степенё орденэныз. Со сяна, Парадэ пыриськемъёс пӧлы шедьыны солдатлы юрттӥз… лапег мугорыз.

Мисбах Мифтахович вордӥськиз 1918-тӥ арын 16-тӥ сентябре Татарстанысь Мрясово гуртын (Набережные Челны палан). 1938-тӥ арын егит воргоронэз армие басьтӥзы — война кутскыку, со аслэсьтыз ужзэ, ож техникаез, пыӵал тӥрлыкез ӟеч тодӥсь солдат вал ини. Воргорон мотострелковой батальонлэн миномётной ротаысьтыз отделенилэн командирез вал, ожмаськиз Калининской, Крымской, Южной фронтъёсын, мозмытӥз Псков улосвылысь Великие Луки, Невель городъёсты, фашистэз Прибалтикаысь улляз.

1941-тӥ арлэн пумаз М. Мифтаховлэсь ротазэ десантэн васькытӥзы Крымысь Феодосия каре. Отын ожгарчи нырысьсэ сӧсырмыны шедиз. 1944-тӥ арын Восточной Пруссие вуытозяз, сое 4 пол сӧсыртӥзы. Солдат уго, улонзэ жалятэк, тушмонэн жугиськиз, сӧсырмем эшъёссэ ож лудысь поттылӥз. Озьы 1943-тӥ арын Мурозино гурт палан со 30 пала фашистъёсты быдтӥз, солэн расчётэз тушмонлэсь огневой точказэ миномётъёсын тарказ. Пуштылонъёслэсь кышкатэк, М. Мифтахов вӧсь луэм санинструкторез, красноармеецез тыложысь поттӥз.

1944-тӥ арлэн пумаз М. Мифтаховез выль пыӵал тӥрлыкен тодматскыны келязы Москва улосысь Наро-Фоминск городэ. Дышетсконзэс йылпумъяса, татчы келям ожгарчиос фронтэ выльысен ыстэмзэс витё вал, но 9-тӥ мае ивор вуиз: тушмонэз вормим!

Вормон Парадэ Мисбах Мифтахович пыриськиз Москваысь военной училищеысь курсантъёс радын. Площадь кузя мотоциклъёсын ортчыны лапег мугоро солдатъёсты утчало вылэм —
М. Мифтаховлэн мугорыз тупаз, солдатлэн 3 боевой наградаез но вал.

Парадэ пыриськемез понна М. Мифтаховез Таукаронэн пусйизы.

— Парадлы дасяським Ходынкаысь аэропортын, со сяна, шоркарлэн ульчаостӥз но мотоциклъёсын ортчылӥмы, — тодаз вайылӥз Мисбах Мифтахович. — Мотоциклъёс, огкадь вис возьыса, мыныны кулэ вал. Коляскаын пулемётчик пукиз, капот вылын — Дегтярёвлэн пулемётэз, мон водитель сьӧрын пуки. Парад нуналэ жаль зорыны ӧдъяз, ужрадлэсь кутсконзэ ми, лавкае ватскыса, возьмамы. Парад 10 часын кутскиз. Георгий Жуков но Константин Рокоссовский маршалъёс синмаськымон чебер валъёс вылын ворттӥзы, рядъёс вӧзтӥ ортчыса, солдатъёсты Вормонэн ӟечкылазы.
3 пол «Ура!» кеськылӥзы солдатъёс. Бӧрысь колоннамы 6 радэн площадьтӥ, Мавзолей вӧзтӥ ортчиз. Мон парадэн кивалтӥсьёс, генералъёс шоры пыр учкыса мынӥ. Иосиф Сталин мыным пичи мугоро кадь йӧтӥз, нош пельпумъёсыз паськытэсь вал. Площадь азе туж трос калык люкаськиз. Москвичъёс милемыз сяськаосын, ӟечкыланъёсын пумитазы, ваньзы пальпото. Парад бере ми ваньмы суч-суч котмемын вал. Дӥсьмес воштыса, сӥё-дано обедэ мынӥм. «Боевой» 100 грамм но сётӥзы. Та нунал вунонтэм кылиз. Парадэ пыриськеме понна мыным Таукарон сётӥзы, со вылын нимы зарниен пиштӥсь букваосын гожтэмын.

Война бере Мисбах Мифтахович семьяеныз ӵош Камбарка ёросын улӥз, Камбаркаысь портын ужаз. Улонысь кошкиз 85 аресаз 2003-тӥ арын 1-тӥ июле.

________

Разиф МИРЗАЯНОВ,

Камбарка ёросысь
Историк-архивистъёслэн
огазеяськонзылэн кивалтӥсез

Удмурт Дунне
By Удмурт Дунне 30 июня, 2020 15:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<