Глазкарысь кун пед­институтлэн кивалтӥсез Янина ЧИГОВСКАЯ-НАЗАРОВА: Кужым сёто егитъёс

Удмурт Дунне
By Удмурт Дунне 1 июня, 2020 12:17
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Янина ЧИГОВСКАЯ-НАЗАРОВА — Глазкарысь кун пед­институтлэн кивалтӥсез.


Янина ЧИГОВСКАЯ-НАЗАРОВА — Глазкарысь кун пед­институтлэн кивалтӥсез. Янина Александровна дипломезъя ӟуч кыллы но литературалы дышетӥсь. Студент дыръяз ик эшъёсыз пӧлын висъяськиз шаплы но котькытчы вутскись луэменыз. Нылашез синйылтӥзы, кафедрае кыльыны ӵектӥзы. Озьы улонэз пыраклы герӟаськиз дышетӥсьёсты дасясь вузэн. 2014-тӥ арын Я. Чиговская-Назаровалы оскизы ректорлэсь пуконзэ.

Бадӟым сюлмаськон

Выль уж борды Янина Чиговская-Назарова мыло-кыдо басьтӥськиз. Ма, мар кышканэз? Институт тодмо, удыс валамон но тунсыко — татын дышетскиз, татын кыдаз, татын комсомол но профсоюз ужен выриз, наукае сюрес лёгиз, кема дыр ӵоже проректор вал… Но бадӟым коллектив — бадӟым сюлмаськон. Кивалтӥсь кыл кутэ котькуд студент, котькуд ужась понна. Котьмае нуналмысь син азьын возёно.

Ректор туж тырше дасо аръёсын люкам сям-йылолъёсты утён но азинтон сярысь. Миым ГГПИ пусйиз 80 аръем юбилейзэ. Но институтлэн ортчем сюресэз солэсь данаклы кузьгес. Уго ай революцилэсь азьло Глазовын, Карл Маркс ульчаысь одӥгаз юртын, ужазы ини дышетӥсьёсты дасян курсъёс. Нялтас вераса, со корка али ке но сылэ, дышетон корпус чотын возиське.

Элькунмылэн уйпал шоркарысьтыз институт дасяз ни
50 сюрслэсь уно дышетӥсьёсты. Шаерамы ӧвӧл, вылды, одӥг но школа, кытын уг ужа Глазовын басьтэм дипломен специалист. Но туннэ татын визь-нод люкало мукет ужез яратӥсьёс но. Шуом, робототехникъёс, программистъёс, информационной технологиосты (IT) азинтӥсьёс. Вузын дасяло удмурт но англи кылъёсъя специалистъёсты. Егит адями, школае уже потыса, огдыре быгатэ 2 кылъя урокъёс нуыны. Таӵеез быдэс дуннеын ӧвӧл!

Совето аръёсы вузэз йылпумъям нылъёсты но пиосты ужаны распределениея келяллязы. Вал, дыр, отын умоез но, уродэз но. Огласянь, тонэ ужаны сюрс иськеме гондыр куше келяны быгато, мукет палзэ учконо ке, государство сыӵе дыръя котьмаин юрттыны тырше.

— Мон сямен, уг яра ваньмызлэсь малпаськытэк куш­тӥсь­кыны, — вера Янина Александровна. — Бен, тун­­нэ луонлык вань сюлмыдъя уж шедьтыны, синмаськымон инты бырйыны. Нош маин урод меда пичи курсысен азьпал улондэ тодыны, азьло ик дасяськыны-малпаськыны?

Син азяды пуктэ ай: институтэ лыкто быдэс элькунысьтымы школаослэн кивалтӥсьёссы, кадръёсын ужасьёс, тодматско егитъёсын, чаклало быгатонлыксэс, ӵекто кыӵе ке уж, верало асьсэ луонлыкъёссы сярысь. Куд-огез ватсаса уждун но сётыны, квартираен яке улон коркаен юрттыны дась. Валамон ни: егит специалистъёс быръё ӟечсэгес но тупамонзэгес интыез.

Глазов город Думалэсь премиоссэ студентъёслы сётон.

Вуз бере уже интыяськон ласянь туж оскымон но пайдаё амал луэ практикаез валаса радъян. Янина Чиговская-Назарова лыдъя, та ужпумлы институт уката но бадӟымгес саклык висъяны кулэ шуыса:

— Практикаез ортчон егит муртлы туж юрттэ ассэ валаны, пайдаё ужаны дась луэмзэ эскерыны, мӧйыослэсь аръ­ёсын люкам быгатонзэс асэстыны. Кемалась шӧдӥ ни: уноез нылъёсмы но пиосмы, диплом басьтыса, мыно со школаосы, кытын тодон-валанзэс практиказы дыръя юнматӥзы.

Ваньмыз кутске пичиысен

Янина вордскемын Крымын военнойлэн семьяяз. Дышетӥсь луон мылкыдыз школа вакытэ ик кылдӥз. Эшъёсыныз нуналлы быдэ сямен «урокъёс» ортчытъязы, ӟечезлы дышетскизы. Дораз но сое весь индылӥзы: «Маке лэсьтӥськод ке, «витьлы» лэсьтыны кулэ». Сыӵе сям пичи муртлы пыраклы пыӵаз.

Глазове дышетскыны сое вайиз атаез — уго татын апай­ёсыз уло вал. Нылаш бырйиз филологияя факультетэз. Институт кельшиз котыр ласянь: ӟеч мылкыдо дышетӥсьёс, котьку юрттыны дась эшъёс, сюлэмез шунтӥсь пичи гинэ город. Экзаменъёс капчиен сётскизы. 1 интые 3 мурт вал ке но, кыдёкысь вуэм абитуриентка
дышетскыны пыремъёс пӧлы сюриз. Улыны общежитие
интыяськиз. Со шулдыр вакыт весяклы тодаз кылиз. Одӥгез со дырысь эшез — Лиля Патрушева (али Лилия Васильевна Ушакова) — Яр ёросысь Ӟакагурт школаын директор луыса ужа.

Студент дыръяз Янина мыло-кыдо пыриськиз общественной улонэ. Маин гинэ ӧз выры со! Юнме шат нырысетӥ семестр бере ик ӵектӥзы факультетысь комсомол огазеяськонлэн секретарез луыны. Бӧрысьгес быдэс институтысь организациен кивалтыны кылдӥз. Ай ӵапак соку сяме пыӵаны ӧдъяз кивалтӥсез шара быръён. 4 ӵектэм мурт пӧлысь ваньмызлэсь трос куара люказ Янина. Комсомолын со дышиз калык азьын валаса вераськыны, мылкыдзэ усьтыны, адямиосты ас сьӧраз валтыны.

Ӧс усьтэмын ке, отчы пырозы…

Егит дыръяз люкам быгатонлыкъёсыз Я. Чиговская-Назаровалы улытозяз юртто. Со ӟеч вала: институтэз йылпумъям адями котыр ласянь азинскем адями луыны кулэ. Ас удыссэ тодэм сяна, шӧдыны мед быгатоз культураез но искусствоез, мед дунъялоз литератураез но историез, мед эшъяськоз спортэн. Соин ик ректор, азьло кивалтӥсьёслэсь кутскем ужзэс азинтыса, ялан сюлмаське студентъёслы дышетскыны но улыны умой условиос кылдытон сярысь.

Та ласянь Глазовысь студентъёслы удалтӥз. Городын одӥг гинэ институт. Дышетскон корпусъёс но, огъяулонниос но, профилакторий но, спортклуб но артэ интыяськемын. Лекция быриз — луэ творчес­твоен вырыны, библиотекае
вамыштыны, мугорез кыдатыны, кыӵе ке клубе мыныны. Дырез шыръян но пайдаё кутон ласянь со туж умой.

Студентъёс асьсэос но, ды­шетӥсьёс но радъялляло трос пӧртэм ужрадъёс: ӵо­шатсконъёс, фестивальёс, кон­цертъёс. Берло аръёсы паськыт вӧлме проектъёс бордын ужан.

Валля арын вуоно ды­шетӥсьёс ӵектӥзы ляб адӟись но ӝегаса будӥсь нылпиослы аспӧртэмлыко книга поттыны. Нимысьтыз технологиосты уже кутыса, егитъёс юрттӥзы пичи эшъёссылы выжыкылъ­ёсын тодматскыны, трос выльзэ тодыны, мукет сямен вераса, дуннеез усьтыны. Глазовъёслэн кичӧлтонзы кельшиз Россиысь мукет улосъёсысь пиналъёслы но. Соослэсь опытсэс табере трос интыосын пыӵато.

Пединститут шаерамы но, быдэс странаын но тодмо луэ «Весна ГГПИ» фестиваленыз но. Таиз вожвылъяськон ас котыраз трос сю адямиосты люка, творчествоын но, наукаын но, спортын но устооссэ студентъёс­ты шараяны юрттэ. Со татын радъяське ни 1970-тӥ аръёсысен. Ректорлэн верамезъя, ужрад дышетэ котькыӵе югдурысь потыны тупамон амал шедьтыны, творческой мылкыдэз юнматыны, ог-огдэ валаны. Пумен кужмоя фольклоръя «Зарни тӧл» фестивальзы но.

Янина Александровна син­мась­кемын ас ужезлы, котырысьтыз адямиослы, юрттӥсь­ёсызлы, городын улӥсь­­ёслы. Паймоно кадь, но солэн кабинетысьтыз ӧс ноку уг вор­саськылы. Ялан усьтэмын. Вань мылкыд карисьёс дораз пы­рыны, кыӵе ке выль малпанзэс кивалтӥсьлы вераны быгато. Бен, сыӵе ужан амал люкетэ но — быдэстытэк кельтэм ужез лэсьтон вылысь ректорлы ужантӥяз куддыр уйшорозь но пуконо луэ. Но мукет сямен со уг быгаты.

Калык оске

2003-тӥ арысен Я. Чиговская-Назарова Глазкар Думалэн депутатэз луэ. Бырйисьёс сое ярато но гажало. Уго одӥг вазиськонэз но Янина Александровна уг палэнты — котькудзэ эскере-чакла, адямиослы юрттыны тырше. Нимысьтыз тупатэм графикъя со толэзьлы быдэ пумиськонъёс ортчытъя.

— Адямиен кенешон мыным луонлык сётэ округысь югдурез умой тодыны, — вера депутат. — Калыкен созэ яке тазэ ужпумез эскериськод ке, одно ик шеде тупамон амал, адӟиське азьлане сюрес. Озьы пумен быдэс город но воштӥське.

Дышетонъя но наукая министр С. Болотникова тодматске
дышетӥсьёсты дасян амалъёсын.

Ӟеч сямлы пӧрмиз ни округын Азбарлэсь нуналзэ ортчытъян, куке бускельёс шулдыръясько, быгатэмзэс возьмато, ог-огзылы матэгес карисько. Депутатлэн ки­чӧлтэмезъя округын мукет но пусйымон ужрадъёс луыло.

Кар Думаын ректор кивалтэ Дышетонъя, наукая, культурая, спортъя, егитъёслэн ужъёссыя но национальной политикая ялан ужась комиссиен. Я. Чиговская-Назарова бадӟым саклык висъя пиналъёсты будэтонлы. Кылсярысь, арлы быдэ радъялля пӧртэм удысъёсын асьсэдыз умоен возьматэм нылъёсты но пиосты данъян. Син азяз возе дышетон удысын югдурез, ӵем вуылэ школаосы, мукет интыосы. Юн кусып возе элькунысь но быдэс Россиысь вузъёсын, тужгес но — дышетӥсьёсты дасясьёсыныз.

Туэ феврале Янина Александровна Удмуртилэн делегациеныз ӵош вуылӥз Белоруссие. Отын кӧня ке валтӥсь университетъёсын но институтъ­ёсын валче ужан сярысь огкыл юнматӥз. Ужез ӵош радъян пумысен озьы ик вераськиз Минскысь педколледжен но отысь ик 83 номеро школаен. Белорусъёслы тунсыко потӥзы ГГПИ-ын наукая школаосты азинтон, студентъёслэсь аскивалтонзэс радъян, егитъёслэсь ваньмон дырзэс ортчытон. Ректор оске, валче ужан ваньмызлы пайдаё луоз шуыса.

Я. Чиговская-Назарова мыло-кыдо ужа «Огъя Россия» партиын но. Со быръемын та огазеяськонлэн улосвыл ёзэтэзлэн кивалтон кенешаз.

Улон косэ

Быдэс дуннее кӧня ке арня ӵоже вӧлмем чер, валамон ни, чутрак воштӥз Глазкарын дышетскисьёслэсь но улонзэс. Преподавательёс но, егитъёс но выжизы дистанционной амалъя ды­шетсконэ. Выльдӥськон капчиен ӧз сётӥськы. Мар веранэз, институтын тросгес дышетско гуртысь потэм нылъёс но пиос. Уноез — огшоры семьяосысь, соосты компьютер яке мукет сыӵе туала техника басьтон коньдон ласянь шуге-леке вуттэ.

Но студентъёс уг аналско, ог-огенызы уртче кариськыса ужало, сётэм заданиосты куспазы кенешыса быдэсъяло. Толэзь-кык ӵоже озьы дышетскыны дышизы ни.

Институтлэн кивалтӥсьёсыз али ик ини дасясько выль
дышетскисьёсты пумитаны — вуоно абитуриентъёсын кусып тупато. Вузын та ласянь бадӟым опыт люкамын.

Тодӥсь-валась егитъёсты шедь­тон вылысь татын 50-лэсь ятыр конкурсъёс, олимпиадаос но мукет ужрадъёс ортчыло. Отчы пыриськемзы понна нылпиослы ватсаса балл сёто. Кылем арын ог куиньмосэз абитуриентъёс приёмной комиссие дипломъёсын но сертификатъёсын вуизы.

Пусйымон соиз но: ӵо­шатсконэ Удмуртиысь нылпи­осын ӵош мыло-кыдо пырисько музон улосъёсысь егитъёс.

Институт быдэс Россиысь школьникъёслы математикая, педагогикая, биологияя но мукет предметъёсъя олимпиадаос радъялля. Тани Глазовлэн палэназ но али умой тодо ни «Достижение» дышетонъя проект сярысь. Отчы шумпотыса пырисько асьме дорысь, Пермь но Киров улосъёсысь, Татарстан Республикаысь школаосын но колледжъёсын дышетскисьёс. Уго та проект юрттэ быгатонлыкъёссэс волятыны но муромытыны. Отӥяз нылпиос федеральной ӵошатсконъёсы но пыриськыны быгато. Озьы, ректорлэн верамезъя, пиналъёс ог-огенызы рос-прос тодматскыны но эшъяськыны вутто, ГГПИ-е пырыны дасясько.

Пандемия вӧлскон аре но татын дышем амалъёслэсь уг куштӥсько, туала луонлыкъёсты уже кутыса, пӧртэм ужрадъёс ортчытъяло.

Янина Александровна кӧня ке шугъяське ик туэ вузэ выль дышетскисьёсты кутон ласянь. Россиысь кивалтэт уго, странаын югдурлэсь воштӥськемзэ лыдэ басьтыса, радлыкез воштӥз. Таяз аре ЕГЭ но дышымтэ дыре но мукет сямен ортчоз.

Абитуриентъёслы вань документъёсты (копиоссэс) «Гос­­услуги» портал пыр гинэ келяны ӵектэмын. Глазкаре ветлонэз ӧвӧл. Чакламын вань выль иворъёсты Интернет пыр меӵак эфиръёс дыръя вӧлмытыны, соос печатласькозы социальной вотэсъёсын но мукет интыосын.

Йылолъёсты утён

1946-тӥ арын Глазовысь институтлы сётэмын тодмо ӟуч писательлэн, 19-тӥ дауре Мултан уже шедем удмурт воргоронъёсты утёнэ котыр ласянь пыриськем муртлэн Владимир Короленколэн нимыз. Тодмо гожъяськисьлэн улонэз но та карен меӵак герӟаськемын: 1879-тӥ арын со Глазове ссылкае келямын вал, татын ӝыны ар пала улӥз.

Городын писателез сӥлы каро. Солэсь нимзэ нуллэ одӥгез валтӥсез ульча, пуктэмын памятник. В. Короленколы шӧдскымон инты висъямын институтлэн историяя центраз, 2000-тӥ аръёслэн кутсконазы сое усьтонэ трос кужымзэ сётӥз вузлэн со вакытысь кивалтӥсез Геннадий Поздеев.

Туннэ та центр луэ дышетон наукаез вӧлмытӥсь но азинтӥсь инты. Отын студентъёс тодматско институтлэн историеныз, удмуртъёслэн но мукет калыкъёслэн Удмуртилэн уйпалаз дауръёс ӵоже улэм-вылэменызы.

Глазовын кемалась верась­ко ни национальной гимназия кылдытон сярысь. Туэ городэ вуылӥзы элькунысьтымы национальной политикая министр Лариса Буранова, «Удмурт Кенеш» огазеяськонлэн тӧроез Татьяна Ишматова. Кар кузёосын но ГГПИ-лэн кивалтӥсьёсыныз соос кенешизы чаклам ужпумез быдэстон пумысен. Соку Янина Чиговская-Назарова оскытӥз, институтысь тодосчиос гимназия усьтонэ одно ик пыриськозы шуыса.

— Ми туж тыршиськом студентъёсмылы шаермес яратон мылкыд пыӵатыны, уго выжыостэ тодытэк, азьлозэ дунъятэк азьпала сюрес ӧвӧл, — пусъе ректор.

Ӵуказе нунал сайкыт

Шуг-секытъёс шоры учкытэк, Глазовысь студентъёс но дышетӥсьёс асьсэлэсь азьпал сюрессэс сайкытэн адӟо. Со понна ваньмыз вань: юн коллектив, котьмаин тунсыкъяськись егитъёс, государстволэн котыр ласянь юрттэмез но усьтэм дунне. Егитъёс туннэ олокытчы но вуыло, ужаны дышетско. Соос быгато Германиысь но США-ысь нылпи лагерьёсын выленыз тодматскыны, «Волга-Янцзы» но мукет проектъёсын асьсэдыз возьматыны.

Институт кӧня ке ар ӵоже ни улэ но ужа «Вуз одӥг — луонлыкъёс сюрс!» ӧтён улсын. Коллективлэн нуналмысь азинсконъёсыз возьмато та кылъёслэсь шонер луэмзэс.

Вуоноезлы юн оскон сётэ ректорлэн кыдёке учкыны быгатэмез но. Янина Александровна дышетон корабльлэсь штурвалзэ кияз зол возе. Уг дырекъя. Кытысь сомында кужым шеде шуыса юанлы со шуэ:

— Кужым мыным егитъёс сёто!

Соос пӧлын — яратоно Анюта нылыз но, со, Москваысь Экономикая вылӥ школаез йылпумъяса, али шоркарын телевидениын тырше.

________

Василий ЛЕПТЯГИН

Удмурт Дунне
By Удмурт Дунне 1 июня, 2020 12:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<