Вотка ёросысь Осиновка гуртын гид пуктӥзы, сюрес лэсьтӥзы

Удмурт Дунне
By Удмурт Дунне 11 июня, 2020 15:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Вотка ёросысь Осиновкаысь выль пуктэм фермаын югыт, вӧлмыт.
Туспуктӥз Елена Сараматова

Берло дыре Вотка ёросысь Осиновка гурт син куспын чеберске. Чорыг вордонъя «Пихтовка» хозяйство ваньзэ лэсьтэ, калык гуртэ мед кылёз шуыса. Али ферма ӝутӥзы, сюрес лэсьтӥзы. Ужаменызы тодматскыны вуылӥзы Гурт удысъя но сиён-юонъя министерствоысь кивалтӥсьёс.

— Милям но табере фермамы вань. Азьвыл кыӵе-кыӵе вожъяськыса учкылӥмы мукет гуртъёс шоры. Ум быре ай! Воштӥськон вакыт вуиз, — шумпотыса верало Осиновка гуртын улӥсьёс.

1954-тӥ арозь Осиновка шор усадьба вал. Татын ужазы медпункт, школа, гидъёсын пудо вордӥзы. Нырысь огез ворсаськиз, собере — мукетыз. Гурт бушаны ӧдъяз. Ужась калык пазьгиськемен, татысь фермаосты ворсазы. Соос 1980-тӥ арын куашкан калэ вуизы. 1991-тӥ арын татын 290 адями улӥз на ке, 2010-тӥ арын 84 сяна ӧз кыле. Гуртлы бырыны сётыны уг яра, шуизы «Пихтовка» хозяйствоын. Озьы 2018-тӥ арын Осиновкаысь вуж гидлэн интыяз усьтӥзы кунян куайытон ферма. Таин валче адямиослы ужан инты кылдӥз. Али татын ог 150 йыр ош вордо, быгатэмзыя соосты вузало. Фермаен кивалтӥсь Елена Попова пусъемъя, хозяйство чакла ошъёслэсь гинэ толэзьлы быдэ 2-3 миллион манет поттыны. Кылем арын 10 миллион манет люкаськиз.

Кунян гидэн артэ 460 йырлы скал ферма миым ӝутыны кутскемзы бере гуртоослэн мылкыдзы воксё бурдъяськиз. Туннэ ферма дась ни, шуыны луоз. Хозяйстволы со ог 30 миллион манет тыр усиз. Ӝоген отчы кунян ваёно ветылъёсты пыртозы.
Шаерысьтымы племпредприятиосысь ог 30 миллион манет тыр ветылъёс вуттэмын ни. Хозяйстволэн аслаз но пудоез вань. Ваньзы соос выль фермае пырозы. Таӵе югыт, паськыт комплексэз та гуртын ӧз адӟылэ на вал.

Хозяйствоен кивалтӥсь Георгий Крылов верамъя, фермаез быдэсак тырмытыны луиз ке, 460 скаллэсь нуналлы быдэ шорлыдын ог 10 тонна йӧл кыскыны луоз, озьыен, со толэзьлы быдэ ог 6-7 миллион манет ваёз. Таин валче хозяйствоын ужасьёслэсь шоро-куспо уждунзэс 39 сюрс манетысен 80 сюрс манетозь вуттыны луоз.

Али предприятиын 170-лэсь трос мурт тырше. Соос артысь Кельчино, Бадӟым Кивар, Осиновка но Пихтовка гуртъёсын уло. Куриськись-
ёссэ ваньзэ куто. Котькуд адями семьязэ сюдыны мед быгатоз шуыса сюлмасько. Георгий Степанович пусъемъя, Пихтовка но Бадӟым Кивар гуртъёсысь фермаосты выльдыны малпало на. Соку эшшо тросгес пудо вордэмзы, тросгес адямилы уж сётэмзы луоз. Нош Осиновкае али ик берытскисез йылӥз ни. Уж юасьёс нуналлы быдэ вань. Туннэ татын 97 улӥсез ни, 12-ез — нылпиос. Пуктӥськыны буш участокъёс ӧвӧл. Нош Пихтовка черкогуртын 53 участок люкылэмын. Отын выль посёлок кылдэ. Туэ хозяйство отчы ачиз газ кыскыны малпа.

Котырысь гуртъёсын но улон майбыр луиз. Тани алигес щебенен но гравиен кисьтӥзы Осиновка гуртысь ульчаез. Татӥ зор-кот дыръя машинаен ортчыны воксё уг луы ни вал. Шумпотэменызы гуртоос асьсэос но лопатаосын потӥзы, гравиез вӧлдыны юрттӥзы. Таӵе умой сюрес вылтӥ кемалась ӧз ворттылэ ни вал.

Хозяйство ачиз понна гинэ ужаны кулэ ӧвӧл — калык солэсь ваньзэ ас вылаз мед шӧдоз, лыдъя Георгий Крылов. Правительстволэн Тӧро-
езлэн воштӥсез, гурт удысъя но сиён-юонъя министр Ольга Абрамова пусъемъя, шаерысьтымы тросэз хозяйствоос гуртъёссэс тазьы ӝутыны сюлмаськысалзы ке, калык ачиз пуктӥськыны кутскысал. Нялтас вераса, али шаерамы 36 ферма пуктыны кутскемын. Со сяна, 15 кунян гид лэсьтӥське. Но ферма пуктонэн гинэ ужпум медаз йылпумъяськы, шуэ Ольга Абрамова. Гуртэ сюресъёс но, газ но, ву но кулэ.

Елена Сараматова

Удмурт Дунне
By Удмурт Дунне 11 июня, 2020 15:30 Updated