Волонтёръёс арлыдоослы, карантинын пукисьёслы юртто

Удмурт Дунне
By Удмурт Дунне 15 июня, 2020 13:14

Шаерамы коронавирус вӧлмыны кутскем бере «Калык фронт» огазеяськон бордын кылдытэм «Мы вместе» акция элькунысьтымы 615 волонтёръёсты огазеяз. Мыло-кыдоос, тау каремез возьматэк, дун курытэк, арлыдоослы, карантинын пукисьёслы юртто. 2 толэзь ӵоже соос 1 сюрс 600 ятыр куронъёсты быдэстӥзы ни.

Ува ёрос администрация
Ува ёросысь волонтёръёс 65 ареслэсь бадӟым адямиослы юрттӥськизы.
Ува ёрос администрация

Тысэра но картошка

Коронавирусэн сэрен арлыдоосты, ты но сюлэм висёнъёсын курадӟисьёсты коркасьтызы потатэк улыны куремын вал. Нош адями сиён-юонтэк улыны уг быгаты ук, эмъюм но шӧдтэк шорысь кулэ луэ. Газ, ву но тыл понна тыриськонъёсты но люкано ӧвӧл. Ӵа­пак та­ӵе учыръёсы юрт­тӥсь­кыны кутскизы волонтёръёс.

Удмуртиысь «Калык фронт» «Мы вместе» акция борды март пумын итӥськиз. Нырысь ик юрттэт сётыны мылкыдзэс веразы медицина удысын дышетскись студентъёс.

— 100 волонтёръёс огазеяськизы, уноез Ижысь мед­академиысь но Удмурт кун университетысь студентъёс вал, — вера «Мы вместе» акцилэн элькун координаторез, «Волонтёры-медики» огазеяськонлэн Удмуртиысь ёзэныз кивалтӥсь Елизавета Плеханова. — Отӥяз, предприятиос огдырлы ворсаськем бере, итӥськизы ужась адямиос но. Озьы трос кузя люкаським. Апрель толэзе Ижкарын нуналаз 50-60 заявкаос быдэстылӥм. Берло дыре вазиськонъёс кулэсмизы, 10-20 котыр жингыръясьёс вань на. Но соин валче волонтёръёсмы но ӧжытгес луизы: дистанционно амалэн дышетскыны потэмзы бере уноез студентъёс доразы бертылӥзы, отӥяз экзаменъёслы дасяськон вакыт вуиз, бадӟымъёс ужаны потылӥзы. Соин али волонтёръёслы ёрмиськом.

Нырысь калык, сиён-юон, эмъюм басьтыны курыса, вазиськылӥз. Но малы ке табере куд-огез ми шоры курьеръёс шоры сямен учкыны кутскизы. Кыӵе гинэ куронэн уг вазиськыло: тани мон тысэра (пиявка) басьтыса вайи, кин ке журнал-газетъёслы, изваскалы ветлӥз. Огез пересь жингыртӥз, 7-8 килограмм картош вайыны курыса, одно «Ашанысь» басьтэ, пе. Берло тодӥм, со корка дорысьтыз магазинысь картошка ачиз ик октэ вылэм, но «Ашанын», оло, дунтэмгес шуыса эскерыны малпам.

Ижысь одӥг кышномуртлы одно ик чилясь выло, льӧль пушко колоша кулэ луэм. Сое утчаса, быдэс шоркарез ортчоно луиз. Озьы ке но курон быдэстэмын вал. Кышномурт неномыртэм шумпотэм, синвуаськем. Мукет учыр Грак черкогуртын вал. Москваысь лыктэм семьяез 14 нуналлы карантинэ пытсазы. Таосыз волонтёръёсты кофе басьтыны косӥллям, но кыӵе сюремзэ ӧвӧл, нимысьтыз брендэнэз, пе, кулэ… Таӵе учыръёс трос. Вераны луоз, коронавирус адямилэсь ӟеч но урод палъёссэ возьматӥз. Валаськом, волонтёръёс юрттӥськыны ас мылкыдзыя потӥзы, ваньзылэн сюлэмзы лякыт но бадӟым. Но котькытын эсэпсэ валано ук, сьӧраз ортчыны уг яра.

Ӝожтӥськыса уг пуко

Но кудӥз-огез ныр улэ вуттэмзэ гинэ возьмаса уло ке, мукетъёсыз секыт вакыт вылэ ӝожтӥськыса уг пуко. Тани Ижкарысь Константин Двойничков ужбергатӥсь 10 сюрссэ ӟеч ужлы ӧз жаля — та коньдонэн шоркарын улӥсьлы Валентина Жильцовалы 3 толэзьлы тырмымон эмъюм басьтэмын вал.

— Одӥг пол волонтёръёс сиён-юон вайизы, вераськон куспамы курадӟонэ сярысь но поттылыны шедьтӥ, — вера Валентина Лифантьевна. — Толэзьлы быдэ 3 сюрс 500 манет тыр эмъюм октӥсько, нош пенсие 12 сюрс гинэ. Вераме бере 10 минут но ортчиз меда, волонтёръёс жингыртӥзы ни, мыным юрттыны дась луись ужбергатӥсь вань, пе. Тау бадӟым, солы луыса табере сӥзьылозь эмъюм понна сюлмаськоно уг ни луы.

Волонтёръёс куд-ог адямиосты коронавирус ортчем бере но син азязы ялан возён сярысь малпаськизы ни. Дэри ёросысь «Мы вместе» акцилэн огез волонтёрез Марина Поварёнкина али отпуске потэмын, но дораз уг пукы — арлыдоослы юрттӥське.

— Сиён-юон нуллыкум, тодматски егит кышномуртэн, со инвалид, бабушеныз гинэ улэ, — вера нылмурт. — Табере мукет егитъёсын ӵош малпамы сое асьме ужрадъёсамы ӧтчаны.

Дэриысь 78 аресъем огназ улӥсь Пётр Кочуровлы но огпол гинэ ӧз юрттылэ ни мыло-кыдоос. Воргорон висён вӧлмемлэсь азьло ачиз ик черкогуртысен рейсовой автобусэн Кабанихае ошмес вулы ветлэ вал. Кран улысь бызисьсэ юэме уг луы, пе. Табере волонтёръёс асьсэ машинаен огкутскемен 50 литр вайыса кельто. Пиосмуртлы со кӧня ке арнялы окме.

Висён вӧлмон дыръя шуге-леке вуэмъёслы юрттӥськыны ӝутӥськизы Ува ёросын но. Каргуртын «Мы вместе» акцилэн телефонэз пыр вуэм 40-лэсь уно куронъёс быдэстэмын вал. Но кӧня ӟеч уж лэсьтэмын, телефон пыр вуэм вазиськонъёсъя гинэ лыдъяны уг луы. Волонтёръёслэн кивалтӥсьлы Светлана Тарасова верамъя, каргуртысь тросэз адямиос вотэс бамъёсазы ялонъёс поттылӥзы, сиён-юон, эмъюм басьтыны яке кыӵе ке мукет ужез быдэстыны дась луэмзэс вераса. Нош гуртъёсын бускельёслы юрттӥськон вӧлмиз.

________

Ангелина СНИГИРЁВА

Удмурт Дунне
By Удмурт Дунне 15 июня, 2020 13:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<