Азбарез чебер каре… сюрес

Удмурт Дунне
By Удмурт Дунне 17 июня, 2020 15:47
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Пичи Пурга районысь Гожня гуртысь Анатолий Дедюхин капка азяз но, азбараз но, лапас улаз но плиткалэсь чебересь сюресъёс вӧлдӥз. Плиткаез воргорон ачиз ик лэсьтыны дышетскиз — гаражаз «кынтэ».

Пичи Пурга ёросысь Гожняысь А. Дедюхин ачиз плитка лэсьтэ.
Туспуктӥз Елена Скворцова

Та уж борды атаезлы басьтӥськыны ӵектӥз Роман пиез. Ачиз ик пластиклэсь формаос басьтыса вайиз, материал октӥз. Плитка лэсьтыны 2 пумо форма быр­йизы: огез бадӟымгес, мукетыз пичигес. Котькудзэ быдэн 100 штука басьтӥзы. Со сяна, кулэ луизы на бордюрлы но ву кошкон дырдылы чаклам формаос.

— Вань формаосы раствор кисьтыса, оглом 8 кубометр пала плитка пӧрме. Соосты тырмытыны гинэ 2 час мында дыр кошке. Нош раствор лэсьтӥськод ке, вис карытэк ужаськод ни. Котьку но Нина кышное вӧзам юрттӥське, — вера Толя агай.

Раствор лэсьтыны кулэ цемент, ПГС, ву но нимысьтыз отвердитель. Соку плитка юн пӧрме, уг тэшка. Толя агай плитказэ пурысь гинэ уг лэсьты. Чебер сюрес вӧлдон понна буёлозэ но лэсьтоно, шуэ. Соин кыӵе ке краска ватса. Озьы пурысь плитка вӧзы гордалэссэ но лэсьтэ.

Пыжиськонын сямен ик, нырысь котькуд формаез вӧйын зырано, сотэк плиткаез формаысь поттыны шуг луоз. Кин ке та понна машина вӧйлэсь отработказэ кутэ. Нош Толя агайлы та амал уг кельшы — соку, пе, плитка кырсёмыны быгатэ. Соин формаез зыраны огшоры кӧсвӧй но мынэ.

Ужзэ чаляк радъян вылысь Толя агайлэн аслаз амалъёсыз вань. Кылсярысь, формае растворзэ кисьтыны тупась кобыос шедьтӥз. Бадӟым посудаен — бадӟымаз формае, пичиенызгес — пичияз. Мултэс номыр уг вия, уг изъянмы. Собере форма вылтӥ мастерокен гинэ волятыны кыле на.

Котькуд формаез воргорон интыя зуркатӥсь (вибро) ӝӧк вылэ. Зуркатыса формаысь раствор пушкы кылем омыр потэ. Соку плитка пушкын нокыӵе пась уг кылды, со
чурыт пӧрме.

— Формаосын нимысьтыз пазъёс вань. Чакламын, растворен тырмытыса, соосты вылысьтыз вылаз люканы. Но таӵе амал мыным ӧз кельшы. Нырысь ик выж­лэсь уровеньзэ ӧйгес чакла, соин куд-ог плиткаос пӧртэм зӧкталаен луизы. Мон мукет сямен малпай. Уровенез чак­ласа, выж вылэ ОСБ плита тыри. Со вылэ чурен-чурен растворен тырмытэм формаосты пуктылӥсько. Та радъёс тырмо ке, вылаз эшшо ОСБ понӥсько. Озьы парилка кадь но луэ, плитка но шонер кынме, инты но тырме, — валэктэ Толя агай.

Толалтэ воргорон гаражзэ пичияк эстэ. Но укыр пӧсь луыны кулэ ӧвӧл, пе. Угось плиткалы уг кельшы мултэс пӧсь но, мултэс мускыт но. Кылсярысь, толалтэ формаысь плиткаос 2-3 нунал куспын кынмо, гужемзэ уй-нунал ӵоже юнмало.

Тужгес акылес уж — формаосты сузян-миськон. Уго сэрегъёсаз, висъёсаз вуж раствор кылиз ке, выль плитка лэсьтыку, шекъёс кылдыны быгатозы. Формаосты сузяны Толя агай усто амал шедьтӥз — мунчоын зыраськон вуж мучоло туж капчиен юрттэ кылем-мылемзэ пыргытыны. Валамон, та ӝег ужез нош ик кышноез быдэс­тыны юрттэ.

Толя агайлэн лэсьтэм плиткаосыныз юрт котыразы сюресъёс вӧлдӥз ни Роман пиез. Таӵе ик чебер луоз мукет пиезлэн азбараз но. Воргорон доры вазисько ни ӵыжы-выжыоссы но, плитка лэсьтыны курыса.

Нош Толя агай шумпотыса учке быдэстэм ужез шоры: тротуаръёс 2 толэз чидазы ни, огез но плитка ӧз пырды,
ӧз пилиськы.

________

Елена СКВОРЦОВА

Удмурт Дунне
By Удмурт Дунне 17 июня, 2020 15:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<