Шур ӧз улӟы на, чорыгасьёс!

Related Articles

• Алексей Трубачев. Чечы отпуск. Юмок учыр 0 15.Май
• «Шудком»: Йыр ужа, лул шутэтске 0 02.Июн
• Калыкез огазе люказ концерт 0 25.Мар

Шунды зол пиштэ ни ке но, шур ӧраз пыремын но шунамын ӧвӧл на. Соин ик чорыг умой уг сюры ай. Арня чидалэ на, чорыгасьёс.

Мынам но сюлэмы, конечно, уг чида, шур дуре куриське. Шутэтскон нуналъёсы вуизы гинэ но, визнанме кутыса, лещлы кошки. Сьӧрам кутӥ нумыръёс, чорыг сиён: тае ачим лэсьтӥсько кыдлэсь (жмых) но ю тысьлэсь. Но ушъяськыны номырин на вылэм. Ӝыны нунал пукеме бере кӧня ке пол гинэ зыгатъяз. Ӵукна 10 час бере ӝыны килограммъем чорыг шедиз ик вал но, ярдурозь вуыса, эх! курикеным валче берен шуре чальтчиз. Нуназе котырын нумыр вылэ пичи головня (голавль) сюриз на.

Оглом вераса, лычсузьмозь чорыганы дыр ӧз вуы на. Нырысь ик, ву чылкыт ни ке но, со трос на, шур ӧраз пыремын ӧвӧл ай. Вулэсь лэзькемзэ но шунамзэ арня пала возьмано на. Кыкетӥез, мызь лэземзы бере мумы чорыгъёс лябӟемын. Толалтэзэ мызё чорыгъёс зыгатъямысь ӧз дугдылэ ке, али шыпыт уло. Курик вылэ одӥг-ог айы чорыгъёс гинэ сюро. Кылсярысь, 3 арня талэсь азьло спиннинген 3 чипей кутӥ ке, соос ваньзы айыос вал. Со сяна, чорыгъёс ваньзы кир-пазь пазьгиськемын, тросэз каръёсысьтызы али гинэ потаны кутско ай, кыдэн, ю тысен сюдӥськод ке но, сиськыны мылзы уггес поты на, огазе
уг люкасько.

Таяз гужем чорыганы мон зол дасяськи: выль силиконовой приманкаосты, блеснаосты, воблеръёсты уж вылын эскероно. Утчано выль интыос, кытын таза карасьёс, лещъёс уло. Жаляса верано, али соос векчи кылемын ни. Со сяна, тросаз тыметъёсын чипейёс аляло, соос пичи чорыгъёсты гужем куспын быдто.

________

Пётр ПЕТРОВ