Улляло, ушъяло, вешало, жуго. Иосиф Бродскийлы — 80 арес тырмысал

Удмурт Дунне
By Удмурт Дунне 2 мая, 2020 17:10
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

24-тӥ куартолэзе 80 ар талэсь азьло вордскиз Иосиф Александрович Бродский (1940-1996) — ӟуч поэт, переводчик, Нобель нимо премилэн лауреатэз.

Совето Союзын ужасьтэм муртъёсын, «дасьсэ сиисьёсын» нюръяськыны выризы. 1961-тӥ арын соослы пумит закон кутэмын вал, трос судъёс ортчизы. Тунеядецъёс пӧлы искусствоен вырись адямиосты но ӵем пырталлязы. Огаз сыӵе судын «тышказы» Иосиф Бродский кылбурчиез. Сое 5 арлы Архангельск улосвылысь гуртэ келязы. Егит поэтлэн эшез Анна Ахматова соку шуиз: «Какую биографию делают нашему рыжему!» Но солэн сюлмаськеменыз ик (егит кылбурчи понна дурбасьтӥзы на Корней Чуковский, Константин Паустовский но мукет писательёс), И. Бродский ссылкаын, 5 ар интые, улӥз 1 но ӝыны ар. Бӧрысь кылбурчиез СССР-ысь уллязы — кошконо луиз нырысь Венае, собере Америкае.

Перестройка кутскыса, тышкам поэтэз вешаны ӧдъяло. Кылбурчи дор палаз тодмо луэ — 1989-тӥ арын сое реабилитировать каро, кылбуръёссэ зӧк журналъёсын печатланы ӧдъяло, бӧрысь нимаз книгаосын но потто. Али И. Бродский ӟуч кылбурчиос пӧлысь огез тодмоез луэ. «Не выходи из комнаты, не совершай ошибку…» кылбурзэ тодӥсьтэмез ӧвӧл, дыр.
И. Бродский «модной» луиз. Егитъёс солэсь кылбуръёссэ соцсетьёсазы поттало, кылбур бичетэныз туспуксё, фотооссэс «Инстаграме» интыяло — учкелэ ваньды, кыӵе мон визьмо, кылбур лыдӟыны яратӥсько… Со понна «зэмос интеллектуалъёс» И. Бродский сярысь вераськыны кутскизы, сое пичияк ултӥяса. Сое, пе, укыр ушъяло, поэт, пе, аслыз «чебер» тус кылдытыны быгатӥз.

Ваньмыз та возьматэ, асьмеос, поэзиез дунъякумы, кылбур шоры ӵемысь ум но учкиське шуыса — авторлэн сямыз, улон сюресэз произведениоссэ вужере кельто. Кин тодэ, кудпала кошкоз мода ӵуказе? Но со дыре ик куд-ог кылбурчиослэн книгаоссы асьсэос кие курисько кадь. Соцсетьёсы чебер фото поттон понна уг, соосты зэм но лыдӟем потэ.

М. Б.

Иосиф БРОДСКИЙ

Ӟыгыртыса пельпумъёссэ, адӟи

ваньзэ, мар вал солэн тыбыр сьӧраз,

син югдытэм борддор шоры мертчиз,

ӝӧклэсь пегӟем пукон борды чуказ.

Ӟырдам езтылпульы* пиштӥз яркыт,

со котырлэсь туссэ каре вал шуш,

вужмем курень диван, кудӥз сэргын

чиля вал куэныз, адскиз ӵуж-ӵуж.

Ӝӧк выл вал буш. Пиштӥз ӵабъям паркет.

Гур вал пеймыт, нош тузонӟем янак

пушкын вал куазьсуред. Соку буфет

лултэм коркан улэп потӥз шуак.

Но бубыли лобаз та чус юртын,

котыр бордысь синме со вырӟытӥз.

Улӥз ке но куке ишан татын,

кельтӥз ни со та коркаез. Кельтӥз.

*лампочка

Удмурт Дунне
By Удмурт Дунне 2 мая, 2020 17:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<