Укыр чебересь, укыр йӧноесь! Нылкышно марафонлэн финалаз потӥзы 20 нылкышноос

Удмурт Дунне
By Удмурт Дунне 18 мая, 2020 11:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Чеберай-2020» проектъя ёросъёсысь чеберайёсты быръён кыстӥськиз ортчем арын сентябрь толэзьысен туэ апрелёзь. Быдэс элькунысьтымы 250 нылкышноос пӧлысь финалэ потӥзы 20-ез.

Нырысь ик быдэс Удмуртиысь 72 чеберай быръемын вал. Нош собере 7 нунал ӵоже куара сётон радъяськиз 10 вормисез быръён понна.

— Куара сётон дунын ке но вал, аслэсьтыз мылкыдзэ вераз 7 сюрс 847 адями! — вера «Чеберай» проектлэн кивалтӥсез Ксения Широбокова. — Ми адӟимы, макем нылъёс сюлмаськизы финалэ шедьыны, макем тыршизы. Кема малпаськеммы бере огкылэ вуимы: финалэ 20 муртэ поттоно. Угось ваньзы сыӵе быгатӥсесь, котыр ласянь адӟем карымонэсь. Ми туж шумпотӥськом, сыӵе бадӟым ужлэн емышез адӟиське ни шуыса. Финал — бадӟым гала-представление — октябре Ижысь «Аксион» культура юртын луоз. Али 20-ез ик нылъёсмы та ужрадлы дасясько ни, сцена вылтӥ чебер ветлыны, асьсэды возьматыны сюлмасько. Со понна соослы нимысьтыз мастер-классъёс радъяськозы.

18-35 аресъемъёс пӧлын

Котькуд нылмуртлы видеоролик лэсьтӥськоз. Тазэ ми асьмеос, радъясьёс, дасяломы. Представление дыръя котькуд нылкышно ас палысьтыз удмурт дӥськутэз возьматыны кулэ луоз. Котькудӥзлы нимаз фотосессия лэсьтомы на. Эшшо нылкышноос тыршозы асьсэ бизнес-проектсэс дасяны.

Со вискын ми ужаськомы на «Чеберай» нимо журнал поттон бордын. Туэ июле-августэ со дась луоз ини. Журналын луозы полуфиналэ потэм 72 нылъёсмы, соослэн творчествозы. Татчы ик пыртом на бизнесэн вырись удмурт нылкышноос сярысь материалъёсты но, — пусйиз проектлэн кивалтӥсез.

Оглом учкыса, «Чеберай» марафон удмурт нылкышноос сярысь трос тунсыкозэ усьтӥз. «Удмурт Кенеш» огазеяськонысь специалистъёслэн верамзыя, «Чеберай» проектэ пыриськем тужгес мӧйыез кышномурт — Грак ёросысь Зоя Колесникова. Солы 70 арес ни. Нош тужгес егитэз — Пичи Пурга ёросысь 18 аресъем Наталья Михайлова.

— Ми паймимы: удмурт кышномуртъёс пӧлын трос вылэм юморез яратӥсьёс, — азьланьтэ Ксения Широбокова. — Шоро-куспо но бадӟым арлыдъем кышномуртъёслэн сцена вылын номеръёссы ӵемысь серемес лэсьтэмын вал. Совето вакытъёсы будэм адямиос туала улонын но шуг-секытъёслы уг сётско вылэм, ваньмыз шоры кӧня ке серемпыр учкыны быгато. Зол паймытӥзы киужъёс. Мӧйыос туж быгатыса чильпасько, керттӥсько. Нош егитъёсызгес бисерен киужъёс лэсьто, вурисько. Конкурсын визь сынан но луоз шуыса тодо вал бере, нылкышноос азьлапал ик дасяськылӥзы. Бӧрысь милемлы тау карылӥзы. Тӥледлы луыса, пе, библиотекае ветлыны кутским, удмурт калыкмы, гуртмы, культурамы сярысь тросгес тодӥм. Куд-огез удмурт инты нимъёсын но тунсыкъяськыны кутскем.

35-55 аресъемъёс пӧлын

Устоосыз пӧлысь устооссэ бырйыны туж секыт. Куд-огезлэн картъёссы но палэнысен учкыса сылыны ӧз ни чидалэ, кышноосынызы ӵош номеръёс пуктӥзы, кырӟазы, эктӥзы, куара сётон дыръя вотэс бамъёсын эшъёссэс ӝутъязы. Нош мар луоз гала-концерт дыръя?! Али ик ӟырдам мылкыд сӥзьылозь эшшо золгес араны кулэ.

Тодады вайытӥськом, удмурт нылкышно чеберлыклы, творчестволы сӥзем «Чеберай» марафон — «Удмурт Кенешлэн» но элькунысьтымы Калык творчествоя коркалэн проектсы. Со улонэ пыӵаны кутскиз кылем арын июль толэзе Президентлэн грантэзлы луыса. Проект 3 ӧръя радъяськиз: «Интерчеберай» интернет-конкурс, чеберлыкъя но творчествоя «Чеберай» конкурс но нылкышноосты бизнес-проектъёс гожъяны, блогъёс нуыны дышетон.

55+ аресъемъёс пӧлын

________

Елена МИННИГАРАЕВА

Удмурт Дунне
By Удмурт Дунне 18 мая, 2020 11:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<