Семьязэс утё… люкиськыса

Удмурт Дунне
By Удмурт Дунне 1 мая, 2020 13:32
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ижысь но Дэри ёросысь 18 гостиницаос дась луэмзэс веразы эмъ-
ясьёсты самоизоляция режиме басьтон вылысь. Больницаын ужасьёслы но волонтёръёслы-эмъясьёслы нимаз улыны луонлык кылдытон понна сюлмаськиз Удмуртилэн Тӧроез Александр Бречалов.

Эмъясьёсты — гостиницае

Коронавирусэн черламъёсты куто Ижысь инфекционной больницае, Дэриысь ёрос больницае. Та учреждениосысь эмъясьёс, озьы ик «скоройын» ужасьёс табере доразы уз бертылэ, семьяосазы кышкыт чер уз вуттэ. Сменазы бере соосты вуттозы гостиницае.

— «Амакс» кунокуаын уло ни «скоройысь» 6 фельдшеръёс, 19 врачъёс но 5 волонтёръёс. 1-тӥ мае татчы эшшо 20 мурт интыяськоз — «скоройысь», Завьяловоысь, Ижысь врачъёс, вокзалысь постъёсын ужасьёс. Ӝоген итӥськозы мукет гостиницаос но. Эмъясьёс быгатозы тыро-пыдо шутэтскыны, нош гостиницаос — ужзэс азинтыны, — вераз Александр Бречалов.

Гостиницаын эмъясьёсты сюдо, уж дуразы нуо-ваё.

— Завьяловоысь больницаямы кылдэм югдурез капчи уд шуы. Но мылкыдмес ум куашкатӥське. Туж усто луысал, больницаямы компьютер томограф вуысал ке, — мылкыдзэ вера гостиницаын улӥсь врач-терапевт Марина Жуйкова.

— Семьялэсь нимаз улыны мӧзмыт, но али матысь адямиосме висёнлэсь утеме потэ. Соин гостиницае кариськи, — шуэ Дэриысь мукетыз терапевт Андрей Емельянов.

Вахтовикъёсты — санаторие

Ижысь «Металлург» санаториез чакламын обсерватор карыны. Татын озьы ик самоизоляциын улыны быгатозы эмъясьёс но, мукет кунъёсысь, вахтаысь бертӥсьёс но. Татчы ог 300 адямиез интыяны чаклало.

Самоизоляцие пырисьёслы висъямын луозы нимаз номеръёс. Котькудаз нимаз душез-туалетэз. Адямиосты сюдозы, соос понна озьы ик чакламын дунтэк Интернет. Валтӥсь курон — 14 нунал ӵоже номерысь потаны уг яра.

Мукетыз обсерватор усьтӥськоз Глазовын.

— Азьло Москваысь поездэн Глазове сутка куспын 15-20 мурт вуэ вал. Али 30-тӥ апрельлы 200 билет басьтэмын. Соин вань вуисьёсты нырысь ик чаклано, собере самоизоляцие интыяно, Иже нуонэз-ваёнэз медаз луы, — вераз Александр Бречалов.

Удмуртилэн Тӧроез верамъя, республика йылэтӥз Россиысь Правительстволэсь пуктэм планзэ. Косэмын вал висисьёслы 751 койка дасяны. Кылдытэмын ни 935 инты. Со пӧлысь 639 койка вӧзын кислород сётӥсь аппаратъёс вань.

________

Елена СКВОРЦОВА

Удмурт Дунне
By Удмурт Дунне 1 мая, 2020 13:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<