Кызьы чаклало самоизоляциын пукисьёсты

Удмурт Дунне
By Удмурт Дунне 1 мая, 2020 10:06
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шаерамы кунгож сьӧрысь, мурт улосъёсысь вуисьёс 2 арня карантинын пукыны кулэ. Быдэсто-а, уг-а соос та куронэз — тае чаклало полицейскойёс, соослы юрттыны кутскизы волонтёръёс но.

Та дырлы Иж котырысь сюресъёс вылын югдурез чаклало 6 КПП-ос. Котькудаз уен-нуналэн дежурить каро 4 полицейскойёс, 2 адями — Росгвардиысь, 2-3 мурт — Иж город администрациысь. Машиналэн номерез бордын «18» лыдпус (Удмуртилэн кодэз) вань ке, адямиослэсь документъёссэс-прописказэс, шоркаре ма муген вуэмзэс, справкаоссэс эскеро. Нош кин Иже вуэ мурт улосысь, таослы КПП-ын кемагес ӝегатсконо луэ. Россиысь санитарной врачлэн постановлениезъя но элькун Тӧролэн распоряжениезъя палэнысь вуисьёс табере нимысьтыз анкета гожтыны кулэ. Отчы пусйиське адямилэн кыӵе улосысь но ма муген Иже вуэмез.

— 2 нунал куспын, 20-тӥ апрельысен 22-тӥ апрелёзь палэнысь вуисьёслэсь 277 анкета люкаськиз. Лыдпус нуналлы быдэ вошъяське. Сюресъёс вылысь КПП-осын сяна, уен-нуналэн эскериськомы чугун сюрес вылтӥ, озьы ик самолётэн вуисьёсты. Роспотребнадзорлэн косэмезъя, тужгес но сак чакланы косэмын Москваысь, Москва улосысь, Санкт-Петербургысь вуэмъёсты. Соосты котькудзэ гожтыса кельтӥськомы, доразы карантинын пукыны косӥськомы, — шуиз Иж городлэн йырыз Олег Бекмеметьев.

Чаклало-а, уг-а та адямиос косонъёсты — тае эскерон борды, югдурез утисьёс сяна, басьтӥськизы Иж город администрациысь специалистъёс. Соос карантинэ пуктэм адямиос дортӥ ветло, юаллясько. Со понна Ижын котькуд ёросын кылдытэмын нимысьтыз штаб. Вань кулэ луись ивор соослы вуэ: сояз я таяз ёросэ кӧня адями палэнысь вуиз, кытын со улэ-вылэ карантинын пукон вакытаз.

Иж город администрациысь мугорез кыдатонъя но егитъёсын ужан политикая управлениысь специалист, Ижысь спортъя комплексной школалэн кивалтӥсез Андрей Васюков кыл кутэ Первомай ёрос понна. 22-тӥ апрельлы та ёросын карантинын пукыны косэмын 21 муртлы. Соос ваньзы сямен ик вуэмын Москва, Санкт-Петербург городъёсысь.

— Штабамы 6 волонтёр, куспамы люкылӥмы урамъёс­ты. Али списокамы 21 мурт. Но ивор вуиз ни, ӝытозь та лыдпус 3-лы уноялоз шуыса. Озьыен, ужмы йылоз. Калык доры юри пӧртэм вакытэ вуылӥськом. Одӥг нунал — ӵукна пал, ӵуказеяз — нуназе я ӝытазе. Калык дортӥ юри тупатэм графикъя ветлӥд ке, эскеронмы юнме луоз: дорысьтыз потыны амал утчась адями ми вуон вакытэ гинэ карантинын пукемъяськоз, — шуэ А. Васюков.

Вераны кулэ: списоке шедем адямиос доры та волонтёръёс куное уг пырало. Дораз-а адями, ӧвӧл-а, эскерыны юртто мукет амалъёс: домофон, телефон но… укно. Ӵапак берпуметӥ амалъёс кулэ луизы А. Васюковлы, Пушкинской урамысь одӥгаз юртын улӥсез эскерыкуз — воргорон валлян гинэ Москва палъёсысь вуэм.

Андрей Васюков солэн домофоназ «йыгаськиз» — нокин вазись ӧз луы. Телефонэн жингыртӥз: таяз радэ воргорон трубказэ кутӥз ни. Но кызьы валалод, адями дорысеныз-а тонэн вераське. Волонтёр юаз, кӧняетӥ этажын улэ, кудпала учко квартираезлэн укноосыз.

Воргоронэз укнооссэ усьтыны но ӝамдэлы йырзэ мычыны косӥз. 5-тӥ этажысь укноысь форточка усьтӥськиз но — отысь пиосмуртлэн йырыз мычиськиз.

— Озьыен, дораз пуке. Семьяез но вӧзаз, шӧдске — вераськем куараосты кылӥ. Карантинэ пуктэм муртлэн семьяезлы но угось, нокытчы потатэк, дораз пукыны косэмын. Табере дыртоно Воровский урамысь юртэ, — шуиз А. Васюков но бадӟым вамышъёсын азьлань дыртӥз.

Сьӧраз шок-пуль бызёнъям, юалляськисько: нош карантинэ келям мурт дораз ӧй луысал ке? Мар карысалды сыӵе дыръя? А. Васюков валэктӥз: адямиез дорысьтыз ум шедьтӥське ке, соку ик ивор келяськомы МВД-лэн Первомайской ёросъя ёзаз. Таӵе учыръёсты эскерыны отын нимаз сотрудникъёс юнматэмын. Косонъёсты тӥясьёсты соос кыл кутонэ кыско. Тыриськонлэн тужгес пичиез быдӟалаез — 15 сюрс манетысен 40 сюрс манетозь.

Семьялы дорысьтыз потаны уг яра, жуг-жаг куштыны гинэ но. Нош сиён-юонзы, эмъюмзы быриз ке? А. Васюков шуиз: нокин но сютэм уг пукы, сиён вутто волонтёръёс, соослы ивор гинэ сётоно. Нош висьыны усизы ке, эмъясьёс доразы лыктозы. Коронавируслэн тодметъёсыз шараяськизы ке, больницае вуттозы.

Иж городлэн йырыз Олег Бекмеметьев шаерамы улӥсьёслы вазиськиз: шоркаре вуылыны лэчыт мугды ӧвӧл ке, сюрес вылэ потанлэсь во­зиське. КПП-ос Иже пырыны лэзёзы таӵе учыръёсы: адямилэн пропискаез Ижын ке, улэ ке гуртын, нош ужа Ижын, соку справкаез луыны кулэ. Озьы ик лэзё калыклы юрттэт сётӥсь, югдурез утись, кышкытлык­лэсь утись ёзъёсысь машинаос­ты. Направленизэс возьмато больницае мынӥсьёс, нош сад-бакча возисьёс — солы кузё луэмзы сярысь документъёссэс. Шоркаре огшоры куное лыктыны чакласьёс доразы бертоно луозы.

________

Елена НИКИТИНА

Удмурт Дунне
By Удмурт Дунне 1 мая, 2020 10:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<