«Кунь ар бӧрдэм синкылиме татчы кельтӥсько…». Удмурт нылкышно движенилы — 100 ар.

Удмурт Дунне
By Удмурт Дунне 14 мая, 2020 14:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Октябрь революция потэм бере кунь ар ортчиз ини. Та вадесын оломае но адӟиськиз ини. Удмурт калык но виль улон сям поттыны куськиз. Революцияез валаса улон ялан вӧлдӥське но вӧлдӥське.

1920-тӥ арын Россиысь удмурт нылкышноослэн нырысетӥ ӧтчамзы ортчиз.

Табере удмуртлэн азьвет­лӥсь­ёссы бере кылем удмуртъёсыз ӝутыны, валэктыны туртто. Со понна ик 26 декабре вань удмурт пушкись нылкышноос ӧтчаме люкаськизы. Ваньмыз 93 бырйыса лэзем мурт люказы.

Азьлон-ик юаса та пушкись тросэз гожтэт тодымтэ муртъ­ёс лыктӥллям. Со пушкись ньылез партие пырем мурт, 9 пинял егитьёслэн союзазы пырем муртъёс оти­ыз нош огшоры муртъёс вал. Конференциын «коммунист» шуон кыллэсь нырись кышкаса улӥзы. Со сярысь узыр муртлэн кышкатэмез удмурт пӧлы но вӧлдӥськем вылэм. Нылкышноослы валче кариськыса ужамез но коммунист партияез валэктэм бере, ӧтчамын кенешмы ӟеч луыны куськиз. Валче огине кариськись ужанлэсь ӟечсэ, капчи луонзэ удмурт нылкышноос шэдӥськизы.

Та ӧтчамын веран ужпуммы укыр трос вал. Удмуртлэсь нимаз кариськонзэ но, нылпиез но мумиез (анаез) уськон сярись, куанер муртлы юрттӥськон сярысь, дышетӥськон сярысь, тазалыкез утялтон сярись, азьвыл ужъёс сярись кенеш карыны пуктэмын вал.

Кыкетӥ нуналаз ик удмурт нылкышноос ӧтчамамы туж ено пукизы. Кенешмы огыр-бугыр ӧз луы. Кулэ иньтӥяз султо но юало, кылдӥсько но иньтӥяз туж кылдӥськемзы потыса кылдӥськизы. Сыӵе-таӵе люкаськонын асьме удмурт нылкышно сэргынгес, кышкасагес улоз вал ук. Табере кытын со. Асьме нылкышно муртлэн котьмае но тодэмез потэ ни, котьмае но адӟемез потэ.

Та вадес ужпумез валэктыкы мукет кунъёсын вузкароно шуизы. Мукет кунъёслы асьмелэн нянез но мар ке лэсьтымтэ вузэз келятэк уг ло шуыса веразы. Озьы веракызы удмурт нылкышноос марлы, пе, нянез отчы сётоно, асьмелы но уг тырмы (уг окмы). Асьмелы нош коть кӧӵэ машинатэк, эмъюмтэк но заграницаысь вузтэк улыны уг ло шуса валэктэм бере, зӥбыт кариськизы. Тае но валам бере, асьме удмурт нылкышно асьсэ гуртсэ гынэ малпаса уг улы, табере соос ваньзэ
чакласа ужало.

Удмуртэз нимаз карон сярись, Автономия сярись удмурт нылкышноос кылӥльлям вылэм ини. Удмурт Автономиез туж ярано шуса вераськизы. Сое кылдытыны, поттыны асьмеос но юрттӥськом шуса кенеш пуктӥзы.

Собере та ӧтчамын удмурт пушкын кунь ар революция пала луса ужамез но веразы. Удмурт Комиссариатлэн ужамезлы, туж ӟеч, трос ужам шуса, ныл­кышноос паймизы (абдразы). Табере удмурт нылкышнолы но книга, газет кулэ вылэм. Гудыри газеттэс Исполкомын тамак кыскыса бытто шуса кесясько, удмурт книга эжыт (ичи) вуэ шуо. Озьы тӥни нылкышноос книгалэсь ӟечсэ туж валаны куськиллям.

Удмурт нылкышнолэн семьяен улон сярись но солэсь эриксэ та ӧтчамын веразы. Верасез удмурт нылкышнолэсь шуген-а, капчиен-а улэмзэ одӥг интызэ но ӧз кельты кадь. Кызьы астэ ачид сӥнь уськонӥсь адӟиськод, озьы ик та ӧтчамын нылкышноос улон-вылонзэс «Озьы уго, озьы» шуыса, кылдӥськизы.

Ужез чаклан сярись но мумиез, весчи нылпиез виль сяин утялтон сярись делегаткаёс азьлон кылӥллямтэ вылэм. Тае веракы но нылкышноос туж чалмыт кылдӥськизы.

Дышетӥськон сярись но тазалыкез утялтон сярись ваньмыз ик туж мылкыдэн виль сяин улыны туртто. «Шуг, туж шуг гожтэт тодытэк», — шуэ одӥг ныл­кышно мурт. «Тани ваньзэ гожьясал но, серам нусал. Уг луы, бертыса мар веран но ёрмо ни», — шуэ нош кыкетӥез. Шумпотыса, ачиз серекъясь, пинялгес нылмурт делегатка: «Мон, пэ, уг тодӥськы вал но алигес дешетӥськи. Аслым валамон тодӥсько» — шуэ.

Собере нылкышноос асьсэ пушкись Удмурт Комиссариатын ужаны, нылкышноосыз валэктыса улыны кунь мурт бырйизы.

Та ӧтчамын весчи нылпиез вордон сярись туж тодэмзы потыса юалляськизы. Нылпи сад шуськоды но, отын коммунисэ гожто уг», — шуса чырекъясь луиз. Соин юри ваньмы делегаткаёс вез люкаськыса, «Нылпи садэ» ветлӥмы. Нылпиёслэсь отын ӟеч улэмзэс адӟыса: «Этчӧсь, этчӧсь кӧӵе гынэ уло. Ми но пинялысь тазьы валэктэмын лусалмы ке, табере мукет лусалмы уг», — шуо. «Нылпи садын» нылпиёслэн улэмзы делегаткаослы туж кӧтазы, мылкыдазы тупаз.

Со сяна делегаткаос вашкала улонэз, вашкала тӥрлыкез люкам иньтӥе (му­зее) ветлӥзы. Собере одӥг ӝыт «Пельляськись» шуон пьесаез пуктӥзы. Спектакль дырья удмурт кырӟамэз но мар кырӟазы. Таӵе виль улонэз адӟылыса бӧрдымтэ нылкышно эз кыль, лэся. Сокем пушсы тырыса кошкизы. Ма, кызьы бон уд бӧрды? Туж сантэм возизы ук асьмемыз. Одӥг кышномурт: «кунь ар бӧрдэм синкылиме татчы кельтӥсько уг», — шуса эшезлы вера.

Та этчаммы туж трос пайда ваиз. Удмурт нылкышно виль улонэз троссэ валаз. Кошкыкызы сюанӥсь кадь шумпотыса бертӥзы. «Ми пар валэн бертом», шуо. «Луоз, луоз, кык кузя ке бертӥды», — шуисько мон, — Удмурт Автономной Область потӥз ке, автомобилен но нулдом али», — шуса ӟеч кыл вераса люкиськимы. Та толалтэ кузь уйёсын удмурт нылкышноос кенеш каремез, адӟымтэ мае ке адӟемез кема вералозы ини. «Удмурт областьын удмурт нылкышно пиёсмуртлэсь бере уз кыль» шуса кенеш пуктэмъя оскиськом ини, нылкышноослэсь виль улонэз поттэмзэс адӟом ини. Ӟеч, тазалыко мед улоз нылкышно мурт!

________

Трофим БОРИСОВ

Орфографиез аслаз ик кельтэмын

Удмурт Дунне
By Удмурт Дунне 14 мая, 2020 14:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<