Калыкен артэ — калык сямъя

Удмурт Дунне
By Удмурт Дунне 7 мая, 2020 11:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Владимир МЕДВЕДЕВ Удмуртиысь гурт удысысь дано ужась луэ.
Туспуктӥз Людмила СУРЧАКОВА

Алнаш ёросысь гурт удысъя управлениен 14-тӥ арзэ кивалтэ ни Владимир МЕДВЕДЕВ. Хозяйствоосын кивалтӥсьёс солэсь визь-кенешсэ котьку санэ басьто. Ачиз но угось ас вакытаз ӝутыны быгатӥз «Колос» эштосэз. Владимир Алексеевич Удмуртиысь гурт удысысь дано ужась луэ. Пусъемын Правительстволэн но Кун Кенешлэн данъян грамотаосынызы, «За труды по сельскому хозяйству» Россиысь медален. Та нуналъёсы солы тырмиз 60 арес.

Будон

Владимир Алексеевич вордӥськемын Алнаш ёросысь Шадрасак-Кибья гуртын. Анаез Ульяна Алексеевна дояркаын ужаз, солы али 87 арес. Атаез Алексей Николаевич колхозын водитель вал, отӥяз, тазалыкез лябӟемен, пӧртэм ужъёсты быдэсъяз. Улонысь вазь кошкиз. Озьы нылпиос 8 кузя бубытэк кылизы. Вань секытэз бадӟымез апайзы вылэ усиз, солы 18 арес вал ни. Владимир Медведев соку 9-тӥ классын дышетске вал. Анайзы сюлмаськиз ни будэтыны, ваньзылы образование сётыны.

— Туннэ ваньмылэн улонмы радъяськемын, — шуэ Владимир Алексеевич. — Котькудмы турттӥм анайлы юрттыны. Пичиослы адӟымон луыны тыршиськиз. Кытӥяз утьыны, кытӥяз алыны, кытӥяз мылкыдзэс ӝутыны сюлмаським.

Анаез огназ 8 нылпиез будэтӥз.

Владимир Алексеевич ужлэсь ноку ӧз кышка. Со 11 аресысеныз колхозэ поталляз. Пичиысен кутскиз валэн ужаны. Гырыны быгатӥськод ке, туж шумпотоно вал, бадӟым ужез быдэстэм кадь, шуэ.

Пичи дыръяз военной луэмез потэ вал. Атаезлэн но мылкыдыз вал: тонэ одно военной училищее келяло, шуылӥз. Бубызэ малпаса, озьы вералляз, дыр: со Быдӟым ожын снайпер вал. 1943-тӥ арын сӧсырмыса бертӥз. Но Владимир Медведевлэн военной училищее пырон сярысь малпанэз быдэсмытэк кылиз.

Школаез йылпумъямез бере службазэ нуиз Пермьын. Гуртэ бертыса, ужаны кутскиз «Звезда» колхозын. Пумен кладовщике зерноскладэ юнматӥзы, бригадирлэн юрттӥсез луиз, отӥяз тракторной бригадалы
кивалтӥсе пуктӥзы, озьы механизаторлэсь гырон-кизёнзэ чоталляз, кутсанэз радъялляз. Ужан висказ Сарапулысь сов­хоз-техникумын агрономлы дышетскиз. Соку отын гинэ агрономъёсты заочно дасяло вал. Колхозын кыл кутон но трос люкаськиз. Шадрасак-Кибья но Ляли гуртысь «Звезда» колхозэз Ӟатча котырысь «Красное знамя» хозяйствоен огазеязы. Со ёросысь огез бадӟымез луиз. Ужаны пӧрмытэ, калыкен огкыл шедьтэ шуыса, хозяйствоен кивалтӥсь Илья Китов Владимир Алексеевичез Ляли фермаен кивалтыны пуктӥз. Со вакытэ, Медведев сюлмаськемен, ужасьёслы профилакторий усьтыны быгатӥзы.

Быгатонлыкъёссэ адӟыса, райком сое 1988-тӥ арын Свердловске вылӥ парт­школае дышетскыны келяз. Соку Владимир Алексеевич 2 пичиесь нылпиосыныз но кузпалыныз ӵош 4 арлы Свердловске выжоно луизы.

Со вискын колхозын воштӥськонъёс луизы. Председателе бырйизы Юрий Зиновьевез. Свердловскысь дышетскыса бертэмез бере Владимир Медведевез председатель вӧзы воштӥсе пуктӥзы. Со сяна, Владимир Алексеевичез парторге юнматӥзы. Секытлэсь
ӧз курда. Юрий Андреевич вӧзын ужаны дышетски, шуэ Владимир Алексеевич.

Ӝутӥськон

1990-тӥ аръёслэн кутсконазы гуртын югдур капчи ӧй вал. Колхозъёсын уксё ӧз тырмылы. Соин ик шадрасак-кибьяос но лялиос нош ик вераськон ӝутӥзы нимаз колхозэ кариськон пумысен. Пичи хозяйствоын та вакытэ ужаны но улыны капчигес луоз шуыса малпанэ вуизы. 1994-тӥ арын огъя сходын гуртоос председателе Владимир Медведевез бырйизы, колхозлы «Колос» ним сётӥзы.

— Юрий Зиновьев берло вераз: люкиськеммы бере, пе, куректӥ, таос нимаз улыны быгатозы меда шуыса. Выль кылдэм «Колос» хозяйствоын угось югдур капчи ӧй вал. Но мыным дурбасьтӥзы бере, оскисько вал, огкылысь ужаломы, кылзӥськозы, юрттӥськозы шуыса. Нырысь ик команда люкан, специалистъёс утчан борды басьтӥськи. Кин ужамъяз дышиз, кин мынэсьтым адӟем кариз. Соку огмы но дыр шоры ӧм учкылэ. Ачид тыршиськод ке, калык но турттэ, — шуэ Владимир Алексеевич.

Егит дыр.

1994-тӥ арын Шадрасак-Кибья гуртын гидъёс ӧй вал ни.
Татысь калык 1970-тӥ аръёсы ик пазьгиськыны кутскиз. Озьы гуртэ ферма пуктоно кариськизы. Отчы 80 йыр скал вайизы — ферма
усьтӥськиз, калыклы ужан инты кылдӥз.

1995-тӥ арын куазь туж пӧсь кариськиз, шунды вань урожайзэс сутӥз. Гектарлы быдэ 7 центнер гинэ пудо сиён люказы. Пудоез утён вылысь ёросысьтызы хозяйствоосысь сиён ворттӥзы, туж зол юрттӥз «Родина» эштос. Озьы ик сюрес лёгизы Татарстанэ. Йӧл поттонзы соку юн усиз — араз 450 тонна гинэ люкаськиз. Со кӧс арлэсь бервылзэ 3-4 ар тупатыны выризы на. Котьма ке но пудо йырез утизы. Табере гектарлы быдэ 30 центнерлэсь ичи урожай уг люкало.

Нимаз улыны кутскыкузы, техниказы но ляб вал. Со вадес бадӟым юрттэт сётӥз РТП. Соин кивалтэ вал Сергей Токарев. Отын 4 кормоотряд ужалляз. Соос районысь 70 процентсэ пудо сиёнэз дасяллязы. Соку тросэз колхозъёс асьсэ коже сиён люканы ӧз быгатылэ. Отӥяз «колосъёс» асьсэос техника басьтӥзы, соин валче улонзы капчигес луиз.

— 1994-тӥ арын 760 йыр пудомы вал, 230-эз — кысконо скалъёс. Соку йӧл поттӥськомы вал ваньзэ-ӧвӧлзэ 505 тонна. Скаллы быдэ 2 сюрс 400 килограмм люкаськылӥз. Ёросын шоро-куспо лыдпуслэсь со улӥынгес вал. 2006-тӥ аре, монэ ёросысь гурт удысъя управление басьтыкузы, 1 сюрс 700 тонна йӧл поттӥськомы вал ни. Скаллы быдэ 6 сюрс 100 килограмм йӧл кыскимы. Пудо йырез
1 сюрсозь вуттӥмы, 300-эз — кысконо скалъёс. Ваньмыз со калыклэн юрттэменыз но сюлмаськеменыз, — вера кивалтӥсь.

Котыразы нюлэсъёс уг будо бере, пуэн но югдур секыт вал. Сюрессы потыны луонтэм
напра. Адямиос мукет азе улыны медаз кошке шуыса, нырысь ик соослы улон коркаос пуктыны юрттон борды басьтӥськизы. 13 ар ӵоже 100 котыр выль кирпич коркаос ӝутӥськизы. Хозяйство юрттэ вал транспортэн, стройматериалэн, нюлэсэн. 1998-тӥ аре колхоз газ кыскыны юрттӥз Ляли гуртэ. 2004-тӥ арын кун программая чагыр эстӥськон вуиз Шадрасак-Кибьяе. Кылем арын гуртозь асфальт сюрес лэсьтэмын. Тросэз чаклам малпанъёсы быдэсмизы, шуэ Владимир Медведев. Калык кошкемысь дугдӥз. Оскиз, лэся, азьланезлы. Туннэ Лялиын 500-лэсь трос улӥсез, Шадрасак-Кибьялан — 200 котыр. Та 2 гуртъёсысь школае ветлэ ог 100 пинал. Егитъёслы шутэтскон но мугорзэс кыдатон инты кулэ на. Клубзы 1965-тӥ арын пуктэмын, улыно-вылыно пу юрт вужмемын ни. Сое выльдыны луысал ке, гуртлэн тусыз ик чебертӥськысал, шуэ. Ог 30 ар талэсь азьло калыкен ӵош кылдытэм «Задор мылкыд» ансамбль туннэ ке но шумпоттэ. Нялтас вераса, Ляли бадӟым гуртъёс пӧлы пыре. Кыдёкын ик ӧвӧл Варзи-Ятчи санаторий. Тросэз нылкышноос отын тыршо, кузпалъёссы хозяйствоын механизатор луо.

— Огез шугъяськытэ: уждун гурт удысын пичи. Хозяйство ас поттэм коньдонэныз улэ. Барышез пӧлысь 25-30 процентсэ уждунлы келя. Солэсь троссэ висъяны уг быгаты — производство дугдоз. Субсидиос ӧй луысалзы ке, хозяйствоос прибыле потыны ӧй быгатысалзы, — шуэ Владимир Медведев.

Лябъёссэ юнматон

2006-тӥ ар пумын ёросэн кивалтӥсьёс, шаерысьтымы кадръёсты дасясьёс Лялие ӵем вуылыны ӧдъязы. Со вакытэ гурт удысъя управлениын инты бушаз уго. Владимир Алексеевичлэн шӧдонэз вал, со пумысен уг вуыло меда шуыса, но аслыз нокин меӵак та сярысь ӧз вералля. Декабре сое администрацие ӧтизы. Со нуналэ колхоз кивалтӥсьёсын кенеш ортчиз. Отысен ни ялӥзы, управлениен кивалтӥсе но огдыре ик ёрос йырлы воштӥсе Владимир Медведевез ӵекто шуыса. Соку ассэ но, хозяйствозэ но ёросын тодӥсьтэмез ӧй вал ни. Колхозэз ӝутыны быгатэменыз адӟем карымон луиз. Соин ик ваньзы дурбасьтӥзы. Хозяйствозэ кинлы кельтыны вал — специалистъёс будэмын вал ни.

Тамара кузпалыныз 40 ар тупаса уло ни.

— Калыкен мыным котьку но котькытын удалтылӥз. Оген мар лэсьтод? Коллективмы кужмо вал, калык понна сюлмаськыса ужамы. Али кадръёс выльдӥськизы ке но, ог-огмес валаса тыршиськомы, — шуэ Владимир Алексеевич.

Гурт удысъя управлениез со ас кияз секыт вакытэ кутӥз. Кивалтӥсьёссы ӵем вошъяськемен, куд-ог предприятиос лябӟыны кутскизы, мукетъёсыз банкрот кылизы. Банкъёс ужзэс азинтыны кредит висъямысь дугдӥзы. Мукет хозяйствоос но озьы ик медаз быре шуыса, лябъёссэ юнъёсыныз огазеян борды басьтӥськизы. Озьы 21 хозяйство пӧлысь туннэ ужало 14-ез, вань на Асан совхоз-техникум. Колхозъёсты огазеяса умойгес луоз шуыса, калык но валаз. Таин сэрен производствоез утьыны луиз. Одӥг гектарез но музъем аналтэмын ӧй вал.

— 2006-тӥ арын 32 сюрс тонна йӧл поттӥськом вал. Кылем арын 52 сюрс тоннаозь будӥмы. Скаллы быдэ ог 5 сюрс килограмм йӧл кыскиськомы вал. Туэ малпаськомы 7 сюрс килограммозь вуттыны. Скалъёсмы 1 сюрс йырлы будӥзы, 3 сюрслы йылӥз сюро таза пудо. Урожай гектарысьтыз ог 25 центнер люкаськомы. Со ваньмыз алнашъёслэсь ӟеч ужамзэс возьматэ, — шуэ Владимир Алексеевич.

Гуртоослэн улонзы куазь бордысь потэ. Озьы 2010-тӥ арын, шунды сутэмен, ваньзэ-ӧвӧлзэ гектарлы быдэ 8 центнер гинэ ю тысь калтӥзы. Со кидыслы сяна уг тырмы вал. Нош пудо сиён толбыт быдэс Россиысь нуллӥзы. Чидазы адямиос но, животъёс но.

— Пудоез нуналаз 1 пол сюдӥмы. Турттӥмы йӧлэз возьыны. Туж курадӟизы кунянъёс но ветылъёс. Нош умой сюдымтэ кунянлэсь ӟеч скал уг пӧрмы ни. Соку хозяйствоосмы ог 300 миллион манет тыр ыштон адӟизы, солэсь оглюкетсэ берыктон вылысь кун бератаз висъяз 105 миллион манет. Та югдур милемыз 3-4 арлы мышлань куштӥз. Со секыт ар пыртӥ потыса, выльысь кукуруза кизьыны кутскимы, таид сиёнтэк ноку уз кельты шуыса. Али сое 5 сюрс гектар кизиськомы. Выль сеялкаос октыны кутскимы.

Выльысь пуктӥськон борды алнашъёс басьтӥськизы 2012-тӥ арын гинэ: быдэн 400 йырлы Писэйгуртын но 2014-тӥ арын Ӟатчалан фермаос ӝутӥзы. 2016-тӥ арысен рос-прос пуктӥськон пуромиз. Субсидия сётъяны кутскизы: 1 скал интылы — 50 сюрс манет. Со арын
5 хозяйствоын — «Решительный», «Писеево», «Родина», «Палэп», Константинов ужбергатӥсьлэн — 1 сюрс 160 скаллы инты лэсьтӥзы. 2018-тӥ арын «Оркиноын» «Ёлочкаен» ужась гид усьтӥськиз. Кылем арын 6 скал гид пуктӥзы. Озьы «Родинаын» роботъёсын скал кыскыны ӧдъязы. «Оркиноын» выльдӥськизы. Прохоров, Никитин, Степанов фермеръёс ферма ӝутӥзы. Берло дыр ӵоже оглом 13 скал гид но 12 кунян гид лэсьтӥзы ни. Али пуктӥськон мынэ «Молодая гвардияын»: 800 йырлы комплекс ӝужа, ужалоз со «Карусель» установкаен. Озьы ик пуктӥськыны ӧдъя «Прогресс» — татын али тужгес трос йӧл кыско. Ёросын 2 племрепродуктор,
1 племзавод ужало.

— Ӟеч пудо сиён дасян понна ӟеч техника кулэ. Тае валаса, тросгес тыршиськомы энергонасыщенной техника басьтыны. Ю-нянь утялтыны 130 комбайнэн потӥськомы вал, али тырме 60-эн. Гыроно-кизёно музъем со быдӟа ик кылиз. Туннэ ёросысь гурт удысын ужа
1 сюрс 400 адями. Кутскыкум 2 сюрс 500 пала вал ай. Огвадес, кузётэм кылем музъем мед утялтӥськоз шуыса, егитъёсты фермере потыны ӝутъямы. Али музъемлы вожмасько. Ёросын табере 53 фермеръёс ни, 23-ез пудо вордэ. Ог-огзылэсь адӟыса, гид пукто, ялан азьлань вамышто, — шуэ Владимир Алексеевич.

Ӧркагуртысь хозяйствое вуылыкуз.

Ваче син

— Берло дыре тросгес дистанционно ужано, шуо. Луэ телефон пыр вераськыны, соцсеть пыр кусып возьыны.
Таӵе амал ӝоггес ужаны юрттэ. Но адямиен ваче син вераськонэз нокин воштымтэ на, солэн котьку дуныз бадӟымгес. Асьмеос озьы дышемын: гуртоослэн адӟемзы потэ ёросысь начальствоез. Фермае пыриськод ке, ужась калык шуэ: кемагес ветлэмды луиз вал ни, милям тӥледыз ӵемгес адӟеммы потэ. Одӥг ласянь, кепыр вайыны кутсконо, мукет ласянь, шумпотоно, возьмало шуыса. Хозяйствоослэн кивалтӥсьёссылэн ноку верамзы ӧвӧл, малы татӥ ветлӥськоды шуыса. Котьку шумпотыса пумитало. Визь-кенеш но кулэ уго. Улонын оломар но луэ. Кивалтӥсь — со сыӵе ик адями. Солэн аслаз сюлмаськонъёсыз дораз но, ужаз но. Ужась калык пӧлы потыку, одно ик кыӵе ке ивор сётыны тыршиськод, вераськиськод, чакласькод улэм-вылэмзэс. Адӟиське ук, адями мар ке понна сюлэмшугъяське я уг. Шуг-секытъёс кылдо ке, югдурез рос-прос тодытэк, адямиос оломар но малпаны кутско, ӧвӧлтэмзэ вань карыса верало, куректо. Соин адямиосын ялан вераськыны тыршисько. Асьме калык валась. Кин ке юанэн вазиське ке, шумпотӥсько, адями мон доры оскыса лыктэ шуыса.

Туннэ Алнаш ёрос — огез ӟеч улӥсез ёрос. Гуртъёсмы чебересь. Котькуд гурт улэ хозяйство котырын. Хозяйство юн ке, гурт калык но юн. Кивалтӥсь быгатыны кулэ котыраз адямиосты
бинялтыны. Нош котырысьтыд калыкез пазяны визь бадӟым кулэ ӧвӧл.

Улын Котныр гуртысь фермаез усьтон.

Али ёросысь котькуд кивал­тӥсь сярысь трос умойзэ вераны луэ. Уноез кема аръёс ӵоже ни быгатыса нуо ас удыссэс. Данъяськисько соосын. Калык но соосты дунъя. Соосын артэ будо пинал кивалтӥсьёс.

Управлениен кивалтӥсьлэн улонэз каньыл шуыны уг луы: вылласянь но, улласянь но мед валалозы кадь потэ. Аслэсьтыд малпандэ, адӟондэ пыӵатэм потэ. Со капчи ӧвӧл. Тросгес валэкъяськид ке, тонэ нош валамысь дугдозы. Соин ик ваньзылэсь сямзэ чакланы турттӥськод. Кивалтон — шальыен шонаськем кадь гинэ ӧвӧл, — шуэ Владимир Алексеевич.

Со котьку котькинэн лякыт. Нокинлы урод кылзэ верамез ӧвӧл. Та сям выжыысь, дыр, шуэ.

— Асме шудо адямиен лыдъясько. Улонэ пӧрмиз шуыса, Инмарлы тау карисько. Кузпалы котькыӵе вакытъёсы артэ. Мыным удалтӥз соин. Ми Тамара Арсентьевнаен одӥг классын дышетскемын. Ӵош улэммылы 40 ар тырмоз ни. Со эмсузэр луыса пыр ужа. Пиналысенымы калык сямъя трос пудо вордӥськом. Нылы но пие асьсэды та улонын шедьтӥзы. Пие мынэсьтым ужме азинтэ. 3 внуке но 1 внучкае ни.

Мылкыд секыт ке, мушъёс доры потӥсько. Пичи дырысеным атае вӧзын мушканы дыши. Кытӥяз машинае пуксисько но бусыосты
котыръясько. Музъем кужым сётэ.

________

Елена САРАМАТОВА

Удмурт Дунне
By Удмурт Дунне 7 мая, 2020 11:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<