Вормон нуналлы сӥзьыса азбаръёсын концертъёс ортчыло

Удмурт Дунне
By Удмурт Дунне 7 мая, 2020 13:49
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

4-тӥ майысен кутскыса, Ижкарын ортче Вормон Нуналлы сӥзем «Тонэн артэ улэ ветеран» акция. Туэ 9-тӥ мае бадӟым концерт но уз лу, парад но уз ортчы — со понна пичи агитбригадаос, ветеранъёс доры вуылыса, азбаръёсын концерт ортчытъяло.

Ижысь ветеранъёс понна П. Чайковский нимо камерной хорысь артистъёс войналы сӥзем кырӟанъёсты азбарын быдэсто.
Туспуктӥз Максим Егоров.

Война вакытэ артистъёс ожгарчиослэсь мылкыдзэс ӝутон вылысь солдатъёс дӥне вуыло вал. Нош али Ижкарысь культурая учреждениосысь ужасьёс — ог 10 агитбригада — Быдӟым ожез ортчемъёсты концертъёсын шумпотто, Вормон Нуналэн ӟечкылало. Война вакытысь машиналэн кузоваз тубыса, артистъёс война сярысь тодмо кырӟанъёсты быдэсъяло, кылбуръёс лыдӟо, ож сярысь тодмо произведениосъя пичи сценкаос возьмато.

Туспуктӥз Максим Егоров.

6-тӥ мае ветеранъёсты кырӟаса ӟечкылазы Ижысь Пётр Чайковский нимо камерной хорысь артистъёс. Артистъёс нырысь ик вуылӥзы Октябрьлы 10 ар урамысь 4 номеро коркан улӥсь Александр Семёнович Пронин ветеран дӥне. Концертэз ветеран балконаз учкиз — гадь вылаз орденъёсыз но медальёсыз чилязы, вӧзаз пукиз кузпалыз Раиса Васильевна. Хорысь артистъёс мылкыдэз бурдъясь но ӝоже уськытӥсь гуръёсты быдэстӥзы, «День Победы» кырӟанэз ӟучен но удмуртэн кырӟазы.

Концертэз трос калык учкиз — коркан улӥсьёс балконъёсазы потӥзы, йыръёссэс укноосысьтызы мычылӥзы. Адямиослэн киосазы горд шарикъёс тэтчазы, Россилэн флагез лопыръяськиз. Куд-огезлэн укнооссы Вормон Нуналлы чеберъямын вал «Окна памяти» акцие улсын: пиялаос вылын бумагалэсь туриос ошылэмын, укно дуръёсы ветеранъёслэн туспуктэмъёссы интыямын.

Та дырлы Ижкарын войнаысь 94 ветеран кылемын.
Туспуктӥз Максим Егоров.

Азбаре матысь юртъёсысь учкисьёс но люкаськизы. Соос, 1 но ӝыны метр кусып возьыса, ымныръёссэс маскаос сьӧры ватыса, сылӥзы. Учкисьёс артистъёсын ӵош кырӟанъёсты нёръязы, «Ура-а!» кесяськизы, ветеранлы шуныт кылъёс веразы. Таӵе ӟечкыламлэсь Александр Семёнович концерт ӵоже синвуоссэ ӵушылыса пукиз.

Ветеранэз ӟечкыланы вуылӥз Ижлэн йырыз Олег Бекмеметьев но. Со шуиз: секыт югдурен сэрен трос ужрадъёс ортчытэк кылизы, но Вормон Нунал пусйытэк нокызьы уз кыльы, угось со нырысь ик сюлэмъёсамы ортче.

Та дырлы Ижкарын войнаысь 94 ветеран кылемын. 9-тӥ маёзь тросэз дӥне концертъёсын вуылозы, куд-ог азбаръёсын пичи парадъёс ортчозы. Туэ 9-тӥ мае бадӟым парад уз ортчы — озьы ке но котькуд юртын но азбарын шумпотон пушъёз но тау карон кылъёс чузъяськозы.

Анастасия Шумилова

Удмурт Дунне
By Удмурт Дунне 7 мая, 2020 13:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<